Եթե չեք ուզում կորցնել ձեր սիրելիին, երբեք մի արեք այս հինգ արտահայտությունները

Եթե դու վախենում ես կորցնել սիրելի տղամարդուն կամ պարզապես չես ցանկանում ստվեր գցել ձեր հարաբերությունների վրա, երբեք մի’ ասա հետևյալ արտահայտությունները.

«Քո մայրիկն անտանելի բնավորություն ունի»:

Ոչ մի զարմանալի բան չկա նրանում, որ սիրելիդ պատմում է քեզ մայրիկի հետ ունեցած իր խնդիրների մասին: Չի բացառվում նաև, որ նա երբեմն բացասաբար արտահայտվի մոր բնավորության, մտածելակերպի մասին: Բայց դա ամենևին չի նշանակում, որ դու պետք է օգտվես առիթից և նույնպես արտահայտես քո քննադատական կարծիքը: Բավական կլինի, եթե դեմքիդ պատկերես խելացի ընկերուհու լուռ ժպիտ. Տղամարդուն պետք չեն քո մեկնաբանությունները, նա ուղղակի ուզում է, որ իրեն լսեն: Բայց այդ ամենով հանդերձ` նա երբեք չի հանդուժի, որ որևէ մեկը վատ արտահայտվի իր մոր մասին: Բանը միայն այն չէ, որ մոր և որդու միջև ողջ կյանքի ընթացքում ենթագիտակացական կապ գոյություն ունի: Մեծանալով` որդին սկսում է իրեն զգալ նաև մոր պաշտպանը` որպես ուժեղ սեռի ներկայացուցիչ: Այդ պատճառով էլ ցանկացած բացասական խոսք նրա «պաշտպանյալի» հասցեին վտանգի առջև է կանգնեցնում ձեր հարաբերությունների ջերմությունը:

«Ինչի՞ս է պետք այսպիսի նվերը»:

Շատ կանայք անկեղծորեն չեն հասկանում, թե ինչի համար է սիրելին նման հիմար իր գնել: Ավելի հեշտ ու ճիշտ կլիներ, եթե գումարն իրեն տար, իսկ ինքը կգներ այն, ինչ, իրոք, պետք է: Կանայք չեն հասկանում, որ տղամարդիկ նման քայլով ցուցադրում են իրենց զգացմունքը: Ինչպես հայտնի է` տղամարդու համար նվեր ընտրելը մեծագույն տանջանք է: Եվ եթե նա գիտակցաբար գնում է դրան, նշանակում է այդ կինը նրա համար, իրոք, թանկ է: Չէ՞ որ այդ իրի մեջ նա դրել է իր ողջ սերը նրա հանդեպ: Եվ եթե շնորհակալության փոխարեն նա քննադատություն է ստանում, ավելի քչախոս է դառնում զգացմունքների արտահայտման մեջ: Չզարմանաք, եթե նա իր նվերների համար նոր հասցեատեր գտնի, որն ավելի նրբանկատ է:

«Աշխատավայրում բոլոր տղամարդիկ սիրահարված են ինձ»:

Եթե նույնիսկ իրականում ամեն ինչ այդպես է, և մասսայական հիացմունքն ու հաճոյախոսությունները քո մշտական ուղեկիցն են, միևնույնն է, չարժե այդ մասին տեղյակ պահել սիրելիիդ: Քեզ թվում է` դրանով բարձրացնում ես քո գնահատականը, և դրանից հետո նա քեզ ավելի բարձր կգնահատի: Բայց իրականում դու դրանով միայն կասկածներ կհարուցես նրա մեջ քո հավատարմության ու նվիրվածության վերաբերյալ: Միշտ պետք է հաշվի առնել, որ տղամարդիկ այլ կերպ են մտածում: Կինը ցանկանում է ասել . «Տեսնու՞մ ես, ինչքան ուժեղ եմ քեզ սիրում, որ անտեսում եմ բոլորի սերը, հիացմունքն ու կրքոտ ակնարկները»: Բայց տղամարդը դրա փոխարեն լսում է. «Եթե դու ինձ չվերաբերվես այնպես, ինչպես ես եմ ուզում, ես հեշտությամբ քեզ փոխարինող կգտնեմ»: Ինչպես հայտնի է, տղամարդկանց սպառնալիքներով չես պահի: Բացի այդ, նրա ականջներում միշտ կհնչեն իր մրցակիցների երևակայական կրքոտ խոսքերը` ուղղված քեզ: Իսկ դա ոչ մի լավ բանի չի բերի:

«Ինչ հիանալի մարդ է քո ընկերը»:

Շատ հնարավոր է, որ նա իսկապես շատ լավ ու բարի ընկեր ունի: Ու նաև հնարավոր է, որ այդ ընկերը երբեմն տրամադրել է իր ուսը, որպեսզի դու հենվես դրան ու լաց լինես սիրելիիդ հետ հերթական վեճից հետո: Բայց ահա այդ նույն սիրելիին հաստատ դուր չի գա այդ տեղեկությունը: Այն մասին, որ իր ընկերը լավ մարդ է, նա առանց քեզ էլ գիտի: Հիմա պատկերացրու սիրելիիդ հոգեվիճակը, երբ նա սկսում է մտածել, որ իրեն փորձում են դավաճանել միանգամից երկու մտերիմ մարդիկ: Ընդ որում, այդ իրավաիճակում նա, ամենայն հավանականությամբ, կձգտի պահպանել հարաբերություններն ընկերոջ հետ: Իսկ ինչ վերաբերում է այդ ամենին քո մասնակցությանը, այստեղ հնարավոր են մի քանի տարբերակներ: Բայց դեպքերի ցանկացած դասավորվածության դեպքում քո հանդեպ անվստահությունը միշտ կմնա:

«Դու այնքան նման ես (չես) իմ նախկին ընկերոջը»:

Նման է նա քո նախկին սիրեցյալին, թե ոչ, այժմ ոչ մի նշանակություն չունի: Երկու տղամարդկանց համեմատությունը նրանցից մեկի ներկայությամբ ոչ մի լավ բանի չի բերի: Սիրելիիդ համար հատկապես տհաճ կլինի լսելը, որ նախկինին ինքը շատ նման է: Հաշվի առ, որ վերջինիս նա «նախկին» չի համարում, քանի որ տղամարդու հոգեբանությունն այնպիսին է, որ նա իրեն մրցակից է համարում երկրագնդի վրա բնակվող յուրաքանչյուր տղամարդու: Նրա համար առավել տհաճ է հիշելն այդ տղամարդկանցից մեկի մասին, որը նախկինում զբաղեցրել է իր տեղը: Իսկ եթե անգամ դու համեմատությունը նրա օգտին անես, միևնույն է, նա միայն կնկատի, որ դեռևս մտածում ես այդ տղամարդու մասին, որ այդ «նախկին» կոչեցյալը դեռ զբաղեցնում է քո միտքը, և որ ամենասարսափելին է` քո սիրտը նույնպես: