Ինչ կա Մոուրինյոյի մտքին՝ Մխիթարյանի պահով

ՀԺ / «Մանչեստեր Յունայթեդի» գլխավոր մարզիչ Ժոզե Մոուրինյոն կիսապաշտպան Հենրիխ Մխիթարյանին թիմից դուրս է թողնում նրան «թասիբի գցելու» համար: Նման տեսակետ է հայտնում բրիտանական The Mirror պարբերականը: Մխիթարյանը հայտավորված չէր վերջին 2 հանդիպումներում՝ Անգլիայի Պրեմիեր լիգայի 12-րդ տուրի «Նյուքասլի» դեմ խաղում, որում ՄՅՈՒ-ն հաղթեց (4:1), եւ Չեմպիոնների լիգայի խմբային փուլի 5-րդ տուրի «Բազելի» դեմ խաղում, որում պարտվեց 0:1 հաշվով: Ինքը՝ Մոուրինյոն, նշում է, որ դա տակտիկական մտահղացումների հետ է կապված, իսկ լրատվամիջոցն այլ բացատրություն ունի:

«Հասկանալի է, որ Մոուրինյոն հույս ունի, որ 5 օրում 2 անգամ հայտացուցակից դուրս մնալը Մխիթարյանին կարթնացնի քնից ու կօգնի վերագտնել իր լավագույն մարզավիճակը»,- գրում է The Mirror-ը:

Պարբերականը հիշեցնում է, որ նման շրջան Մխիթարյանը նախորդ՝ «Յունայթեդում» իր 1-ին մրցաշրջանի ընթացքում էլ է ունեցել: 2016-17 մրցաշրջանի ԱՊԼ 4-րդ տուրի «Մանչեստեր Սիթիի» դեմ հանդիպման 1-ին խաղակեսից հետո փոխարինվեց եւ մոտ 2 ամիս չհայտնվեց խաղադաշտում: Երբ կրկին շանս ստացավ, իրեն լավագույն կողմերով դրսեւորեց: