Առաջին սկանդալային քայլը

«Լրագիր»-ը գրում է․

Այսօր խորհրդարանում ընդունվել է նոր Հարկային օրենսգիրքը: Սակայն երեկվա քննարկումները, որոնք վերաբերում են մեզնից յուրաքանչյուրին, հստակեցրել են պատկերը, որը ցանկացած այլ հասարակությունում իսկական սկանդալ ու ընդվզում կառաջացներ:
Սկանդալային նորությունը հայտնել է ՊԵԿ փոխնախագահ Վախթանգ Միրումյանը: Նա նշել է, որ 47 միլիարդ դրամի հարկ չի հավաքվել: Նա 4 պատճառ է նշել՝ մետաղների գների նվազում, բանկերի եկամուտների նվազում, հեռահաղորդակցության շուկայի կրճատում եւ ալկոհոլի արտահանման կրճատում: Միրումյանի խոսքով, այդ ոլորտներում, որտեղ աշխատում են առավել մեծ տնտեսվարող սուբյեկտները, նվազումները հանգեցրել են հարկերի կրճատմանը: Ավելի ճիշտ, ոչ թե կրճատմանը, այլ նախատեսված ցուցանիշներին անհամապատսխանությանը:
Իշխանությունները վաղուց են բյուջեն լցնելու միջոցներ փնտրում, որովհետեւ եթե չլցվի, պետությունը չի կարող կատարել իր սոցիալական պարտավորությունները: Եթե Հայաստանում գոնե մի ամիս թոշակ չվճարվի, ընդվզումը երաշխավորված է: Առավել եւս, որ հուլիսին «Սասնա ծռերի» ապստամբության նկատմամբ վերաբերմունքը ցույց է տվել, որ հանրությունը կաջակցի ցանկացած ընդվզման:
Անցած տարվա ընթացքում կառավարությունը գումար էր փնտրում՝ արտաքին պարտքն ավելացնելով 1 միլիարդ դոլարով: Սակայն պարտքերը պետք է վերադարձվեն: Բացի այդ, դրսի հիմնադրամները հեշտությամբ չեն փող տալիս: Եթե հարկերը չհավաքվեն, ապա ֆինանսական սխեմաներում դա ունի իր անվանումը՝ նախասնանկացման վիճակ, բանանային հանրապետություն եւ այլն:
Պետությունը պետք է հստակ երաշխիքներ տա իր վարկունակության վերաբերյալ: Հայաստանն ի՞նչ կարող է ներկայացնել արեւմտյան հիմնադրամներին որպես գրավ: Պարտադիր չէ, որ դա նյութական երաշխիք լինի: Հայաստանը, օրինակ, որպես «գրավ» կարող է միջանցքի գործառույթ առաջարկել Իրանի եւ Եվրոպայի միջեւ: Կամ էլ, օրինակ, տարածաշրջանում անվտանգության երաշխիք տա, որի համար պետք են ինքնիշխան զորքեր եւ արտաքին քաղաքականություն:
Հայաստանը կարո՞ղ է այդպիսի երաշխիքներ տալ: Եթե նախկին պես այնպիսի մարդիկ նշանակվեն, որոնք երկիրը տանում են Ռուսաստանի հետ աբսորբացիային, ապա ոչ մի միջազգային փող էլ չի լինի եւ երկրին կսպառնա սնանկացման հեռանկարը: Եթե փոխվի կուրսը, ապա դա պարադիգմի փոփոխություն կլինի:
Իշխանություններն առայժմ ընտրել են ամենից «անվտանգ» տարբերակը: Նրանք «աննկատ» ցանկանում են մեզնից խլել մեր եկամտի եւս 2%-ը: Նոր հարկային օրենսգրքի համաձայն՝ 150 հազար դրամից մինչեւ 2 միլիոն դրամ եկամուտ ունեցողների համար եկամտահարկը 26 %-ից կբարձրանա 28 %: Հայաստանում աշխատողների մեծ մասն այդքան աշխատավարձ է ստանում: 2 միլիոնից բարձր աշխատավարձ ստացողների եկամտահարկը կլինի 36 %:
Իշխանությունները հույս ունեն, որ քաղաքացիները չե՞ն նկատի իրենց եկամուտների եւս 2%-ով կրճատումը: Սակայն այն, որ իշխանությունները գնացել են այդ ոչ պոպուլյար քայլին խորհրդարանական ընտրություններից մի քանի ամիս առաջ, վկայում է, որ իրավիճակն իրոք մոտ է կրախին: