Ամեն ինչ՝ առեղծվածային ծլիկի մասին

Ծլիկի չափսի և հնարավորությունների մասին նոր հայտնագործությունները խոստանում են, որ խենթացնող հաճույքն ավելի քան հասանելի է:
Եթե որևէ մեկը խնդրեր քեզ բացատրել ծլիկի կոնկրետ դիրքն օրգանիզմում, ի՞նչ կպատասխանեիր: Հավանաբար կասեիր, որ այն հեշտոցի վերևում գտնվող կոճականման կետ է: Իսկ ինչպե՞ս կվերաբերվես «Ծլիկը բազմաթիվ մասերից բաղկացած ներքին կառույց է, որը շրջապատում է V օրգանը բոլոր կողմերից» բացատրությանը: Անսպասելի է, այնպես չէ՞:
Վերջին նկարագրությունն այն է, ինչ կա իրականում, սակայն դու, թերևս, չէիր լսել այն մինչ այդ: Չնայած բժշկության ժամանակակից նվաճումներին, այս օրգանի մասին շատ քիչ է հայտնի (այո՛, ծլիկը օրգան է): Բարեբախտաբար, վերջին տարիներին մասնագետները սկսել են արժանի ուշադրություն ցուցաբերել մեր մարմնի այս հատվածին` պարզելով, որ այն, ինչ մենք սովորաբար անվանում ենք ծլիկ, ընդամենը սառցաբեկորի վերին, փոքրիկ մասն է, և ըստ էության, հաճույք վայելելու մեր հնարավորությունները շատ ավելի մեծ են, քան կարծում էինք: Իրոք որ, հիանալի նորություն է:
Լայն հնարավորություններ
Փոքրիկ կոճակը, որը երկար տարիներ համարվում էր ծլիկ, իրականում այդ օրգանի գլխիկն է և ավելի մեծ ներքին կառուցվածքի տեսանելի մասը: «Գլխիկն ունի մոտ 6000-8000 նյարդաթել,- նշում է գիտությունների դոկտոր, «Մատչելի սեքս» գրքի հեղինակ Դեբի Հերբենիքը: - Տղամարդկանց առնանդամի գլխիկը պարունակում է գրեթե նույն քանակությամբ նյարդաթելեր, սակայն ծլիկի գլխիկը շատ ավելի փոքր է, և նյարդաթելերը կենտրոնացած են ավելի սահմանափակ մակերեսի վրա: Դրանով է բացատրվում այն հանգամանքը, որ ծլիկը շատ ավելի զգայուն է, քան առնանդամը»:
Տարիներ շարունակ ձևավորված կարծիք կար, որ ծլիկը բաղկացած է ընդամենը այդ տեսանելի հատվածից և, քանի որ այն չէր դիտարկվում որպես գործառութային օրգան և չէր մասնակցում վերարտադրողական պրոցեսին, գիտնականներն այնքան էլ հետաքրքրված չէին կանացի օրգանիզմի այդ հատվածի ուսումնասիրությամբ: Ամեն ինչ փոխվեց 1990-ականներից հետո, երբ առաջադեմ սարքավորումների միջոցով հնարավոր դարձավ ավելի ընդարձակ հետազոտություններ անցկացնել: Այդ ժամանակ էլ հայտնաբերվեց, որ ծլիկի հիմնական հատվածը լիովին ներքին կառուցվածք ունի:
Կառուցվածքը
Գլխիկը միացած է ծլիկի խորշանման մարմնին (գիտական անվանումը` corpora covernosa), որը երկու կողմից շրջապատում է հեշտոցային ուղին և միզածորանը: Խորշանման մարմինը հենված է երկու ոտիկների վրա (գիտական անվանումը` crura), որոնք ունեն մոտ 8 սմ երկարություն և տեղավորված են հեշտոցային շուրթերին զուգահեռ: Ծլիկի գլխիկը, խորշանման մարմինը և ոտիկները պարունակում են գրեթե նույն քանակությամբ լարվող հյուսվածքներ, ինչ քանակությամբ առնանդամը: Պատկերացնո՞ւմ ես, մենք նույնպես օժտված ենք կանգուն հյուսվածքով: Երբ կինը գրգռվում է, ծլիկը լցվում է արյունով և պնդանում: Հենց այդ պահին էլ կինը պատրաստ է ուժգին օրգազմի:
Փոքրիկ ուսումնասիրություն
Այսպիսով, ինչպես կարող ես օգտագործել այս ինֆորմացիան սեռական կյանքը բարելավելու համար: Նախ և առաջ, զուտ ծլիկի աշխատանքը հասկանալն արդեն պոտենցիալ հաճույքը բազմապատկելու հնարավորություն է տալիս: «Երբ ես պատմում եմ կանանց ներքին ծլիկի մասին, նրանք ոչ միայն շոկի մեջ են ընկնում այն փաստից, որ իրենք գաղափար իսկ չունեն այդ մասին, այլև նոր բացահայտումներ են անում իրենց համար»,- ասում է դոկտոր Հերբենիքը:
Բացի այդ, սա ևս մեկ անգամ հաստատում է նախնական փաղաքշանքների կարևորությունը: «Վաղուց հայտնի է, որ կանայք նախաբանի կարիք ունեն,- ասում է դոտկոր Հերբենիքը,- սակայն այս նոր բացահայտումը պարտադիր է դարձնում նախնական շոյանքների առկայությունը, որպեսզի բուն սեքսին անցնելուց առաջ V օրգանը լիովին պատրաստ լինի առնանդամի ներթափանցմանը»:
Գիտնականները բոլորովին վերջերս են սկսել ծլիկի կառուցվածքային ուսումնասիրությունը և դեռևս չկան հիմնավոր ապացույցներ, որ կարելի է գրգռել ներքին հատվածները` արտաքին հատվածներին հպվելով: Սակայն ապացույցների բացակայությունն ամենևին չի նշանակում, որ դա անհնար է:«Մենք գիտենք, որ ծլիկի ոտիկները գտնվում են արտաքին շուրթերին զուգահեռ,- նշում է դոկտոր Հերբենիքը,- ուստի խնդրիր ընկերոջդ կենտրոնացնել իր հպումները հենց շուրթերի հատվածում և ձեռքի ափով մերսումներ անել՝ պարզապես մեկ-երկու մատով գխլիկի վրա կենտրոնանալու փոխարեն»: Համոզված ենք, որ քեզ սպասում են նոր փորձառություն ու անսպասելի զգացողություններ: