«Շանթ»-ից պարզաբանում են՝ ինչու է «Անուղղելիներ»-ից բացակայում Համեստի կերպարը

Life.panorama.am-ն արդեն ներկայացրել է, որ դերասանուհի Անի Բայաթյանը, ով 9 տարի առաջ «Վերվարածները» հեռուստասերիալում մարմնավորում էր Համեստի կերպարն, այժմ չի նկարահանվում «Անուղղելիներ»-ում՝ համապատասխան առաջարկ չստանալու պատճառով:
Life.panorama.am-ն այսօր թեմայի շրջանակում պարզաբանում է փորձել ստանալ «Շանթ» հեռուստաընկերության հասարակայնության հետ կապերի բաժնից:

«Իհարկե, ընդունում ենք, որ Համեստի կերպարը սիրված էր ու կարեւոր, սակայն հիմա սերիալի սյուժետային գծերը դեռեւս այդ կերպարը չեն պահանջում, ինչպես մի շարք այլ կերպարներ: «Շանթ»-ի անձնակազմի եւ Անի Բայաթյանի հարաբերությունները շատ նորմալ են, որեւէ անհաշտություն չկա, նրա բացակայությունը զուտ սցենարային լուծումների հետ է կապված, այնպես որ անձնավորված խնդիր փնտրել պետք չէ: Եթե նման բան լիներ, հաստատ կողմերից մեկից նման տեղեկություններ կտարծվեին: Մեր ամբողջ խմբում շատ լավ ու հաշտ հարաբերություններ են տիրում, խնդիրներ փնտրել պետք չէ: Դեռեւս Կնյազի կերպարի բացակայությունից հետո առաջացած խոսակցություններից հետո սցենարիստ Հարություն Ղուկասյանը խոստացել էր, որ անսպասելի զարգացումներ են լինելու, այնպես որ, հաշվի առնելով դա, չենք բացառում, որ ինչպես շատ կերպարներ, այնպես էլ Համեստի կերպարը հնարավոր է, որ վերադառա: «Անուղղելիների» ցուցադրությունից հետո մեզ հասած արձագանքները թույլ են տալիս մտածել, որ այն դեռ երկար կհեռարձակվի ու նոր զարգացումներ, բնականաբար, սպասվում են: Եթե հեռուստադիտղը հիշի, տարիներ առաջ էլ Համեստի կեպարը «Վերվարածներ» մուտք գործեց հեռարձակման ընթացքում, նույն տրամաբանությամբ չենք կարող բացառել, որ նոր հերոսներ կավելանան, կամ հին հերոսները նորովի կմատուցվեն»,- նշեցին «Շանթ» հեռուստաընկերության հասարակայնության հետ կապերրի բաժնից:

Հարցին, թե այս ընթացքում հեռուստադիտողը հետաքրքրվե՞լ է արդյոք, թե ինչու է բացակայում Անի Բայաթյանի կերպարը, պատասխանեցին.

«Ինչպես Կնյազի եւ այլ կերպարների հետ կապված, այնպես էլ Համեստի հետ կապված հարցումներ ունեցել ենք: Իհարկե, Անիի բացակայությունը Արտյոմի հերոսի նման բուռն արձագանք չի ունեցել, սակայն, անշուշտ, հետաքրրվում են, ինչը խոսում է նախագծի եւ կերպարների հաջողության մասին»: