Միջադեպ Սևանում․ քաղաքապետը հայհոյե՞լ է երգչուհուն

«Հրապարակ»-ը գրում է․

Օրեր առաջ Սեւան քաղաքում Սարգիս Մուրադյանի քարոզարշավին ժամանակ միջադեպ է տեղի ունեցել: Այդ քարոզաշավը վարում էր ասմունքող, դերասանուհի Հերմինե Պետրոսյանը: Սեւանցիները մեզ պատմում են, որ միջոցառման ընթացքում Հերմինե Պետրոսյանը վերցրել է բարձրախոսը եւ ասել, որ Սեւանի քաղաքապետ Ռուդիկ Ղուկասյանը պետք է հրապարակավ ներողություն խնդրի իրենից իր եւ իր ծնողների հասցեին հասցրած լկտի հայհոյանքների համար: Կապ հաստատեցինք Հերմինե Պետրոսյանի հետ, ով այս առնչությամբ ասաց. «Այո, եղել է նման բան: Սարգիս Մուրադյանի քարոզարշավին ես որպես հաղորդավար պետք է հանդես գայի, պետք է հայտարարեի ելույթ ունեցողներին: Այս մասին իմանում է քաղաքապետ Ռուդիկ Ղուկասյանը, նախքան քարոզարշավը, զանգահարում է ինձ, սկսում ամենալկտի հայհոյանքները տալ: Ես էլ նրան ասում եմ, որ ես հաղորդավար եմ, եւ միայն իմ աշխատանքն եմ կատարում: Հայհոյանքներ է ասում ինձ. ես լսում եմ և որպեսզի պարզաբանեմ, ասում է՝ արի խոսենք»: Հերմինեն մեզ պատմեց, որ հանդիպում է քաղաքապետի հետ եւ ասում, որ որ նույն հաջողությամբ կարող է իր քարոզարշավը վարել, իսկ քաղաքապետի բերանից իր կերպարին բնորոշ լկտի հայհոյանքներ են հնչում: «Ոնց բնութագրեմ նրա հայացքը, ոնց որ թուրքը հային նայեր, իմ աչքերին նայելով՝ ընդհուպ մինչև մայր, սեռական հայհոյանքներ տվեց ինձ, որ ես 30 տարվա մեջ էդպիսի հայհոյանքներ չէի լսել: Դրա հետ մեկտեղ նաեւ ահաբեկեց, եթե դու էդ քարոզարշավը վարես, ես քեզ գլխից կխփեմ։ Ես՝ որպես մարդ, իմ ընտանիքը շատ հարգում եմ և պահանջում եմ, որ ինքը նույնպես հարգի իմ ընտանիքը: Ես հայ ու Հայաստան կարդալուց բացի, ոչ մի ուրիշ գործով չեմ զբաղվել: Ես պահանջում եմ` ինքը հրապարակայնորեն ինձանից ներողություն խնդրի։ Ավելին՝ երեկ Սեւան հեռուստաընկերությամբ իր ելույթում ինձ ավազակ անվանեց, եւ ասաց, որ ես հիվանդ երեխայի փողերը օգտագործել եմ: Երդվում եմ իմ բոլոր սրբություններով, ես բարեգործական միջոցառում եմ կազմակերպել եւ դրանով իսկ փորձել եմ օգնել իմ համագյուղացի 10-ամյա տղային: Ես միայն կասեմ, որ աթոռի համար մեր ու մանուկ ուրացել է, եւ կհորդորեմ` քաղաքապետը իր արշինով բոլորին չչափի: Ես դերասանուհի եմ եւ կատարում եմ իմ աշխատանքը,-ասաց Հերմինե Պետրոսյանը:

Հեռախոսազրույց ունենցանք նաեւ գործող քաղաքապետ Ռուդիկ Ղուկասյանի հետ:

-Պարո´ն Ղուկասյան, ասմունքող Հերմինե Պետրոսյանը պնդում է, որ ձեր եւ նրա միջեւ միջադեպ է եղել, որի ընթացքում հայհոյանքեր եք հնչեցրել իր եւ իր ընտանիքի հասցեին:

Նման բան չի եղել, ուրիշ բան է եղել:

-Ի՞նչ է եղել:

Մենք հեռուստամարաթոն էինք կազմակերպել մի հիվանդ երեխայի բուժման համար, գումար էր հավաքվել: Ծնողները ինձ ասացին, որ փողի կեսը Հերմինեն գողացել է, իրենց չի տվել, ես էլ նրան ասել եմ անհարմար է: Ինքն դրանից է վատ զգացել:

-Քարոզարշավի ժամանակ Հերմինե Պետրոսյանի չի՞ բարձրաձայնել, որ դուք հրապարակավ ներողություն պետք է խնդրեք իրենից իր եւ իր ծնողների հասցեին հասցրած լկտի հայհոյանքների համար:

Իսկ Հերմինեն ինչ էր անում քարոզարշավի տեղը, ո՞ւմ հետ էր եկել եւ ի՞նչ հաղորդավարություն էր անում:

-Առանձին հանդիպե՞լ եք Հերմինեի հետ:

Հանդիպեմ ինչ անեմ, չեմ հանդիպել, ոչ էլ ցանկություն ունեմ հանդիպելու:

Կապ հաստատեցինք նաեւ այն ծնողի հետ, ում երեխայի բուժման համար կազմակերպված հեռուստամարաթոնի շրջանակներում գումար էր հավաքվել: Տղայի ծնողը մեզ ասաց, որ հեռուատամարաթոնի ողջ գումար մոտ 3 մլն. դրամ իրենց է փոխանցվել:

Նելլի Կարապետյան