Ջաղինյանի ոտքի տակը Հակոբյանն է փորում. Shame.am

Shame.am-ում կարդում ենք․

Հանրային հեռուստաընկերության ղեկավար Ռուբեն Ջաղինյանը դեռ չի սթափվել իր անհաջող հեռուստանախագծի շուրջ բարձրացված աղմուկից, բայց արդեն նորն է հասունանում՝ այս անգամ յուրայինների ջանքերով: Նախկին ՀՀՇ-ական, այժմ ՀՌԱՀ անդամ Տիգրան Հակոբյանը, հավանաբար, տեսնելով, որ Ջաղինյանի դիրքերը սասանվում են, որոշել է օգտվել այդ առիթից ու մի հատ էլ ինքը հարվածել: Իսկ դրա համար հարմար պատրվակ կա:

Հայկական հեռուստատեսության 60-ամյակին նվիրված երեկո է եղել ու պարզվել է, որ ոչ բոլորին են հրավիրել: Շատերը նեղացել են, ոմանք էլ իրենց վիրավորվածության մասին բարձրաձայնել են: Եվ ահա այս առիթով Տիգրան Հակոբյանն էլ միացել է Ջաղինյանին դատապարտողների խմբին: Իր ֆեյսբուքյան էջում նա գրել է. «Թող մի քիչ խիտ նստեին, նույնիսկ կանգնած մնային շատերը, թող կոնյակը ոչ բոլորին հասներ... Բայց բոլորը հրավիրված և ներկա լինեին: Բոլորը, որոնց կյանքը հեռուստատեսությունն էր: Հատկապես նրանք, ովքեր անկախ Հայաստանի հեռուստատեսության կայացման էն ծանրագույն տարիներին ոտքով էին բարձրանում Նորք, ցրտահարված շենքում տեքստեր էին պատրաստում, հաղորդումներ նկարահանում, մոնտաժում կյանքից ձեռք քաշած տեխնիկայով, որը ոչ մի ձև չէր համաձայնվում աշխատել 40 հերց հաճախականության պայմաններում...»:

Հակոբյան Տիգրանը ՀՌԱՀ-ի անդամ է, այս միջոցառման մասին հաստատ ավելի շուտ է իմացել, քան այն կայացել է: Կարող էր նախապես հոգ տանել, որ խնդիրներ չլինեին: Բայց չի արել: Հակոբյան Տիգրանը (քանի որ ՀՌԱՀ անդամ է) կարող էր գնալ Ջաղինյանի աշխատասենյակ ու այսքանը նրան ասեր, ոչ թե այդ մասին գրառում աներ ՖԲ-ում: Բայց չի արել: Ու չի արել, քանի որ սիրտը ոչ թե ցավում է մոռացվածների համար, այլ ուզում է վարկաբեկել արդեն իսկ վարկաբեկված Ջաղինյանին, մանավանդ որ այս օրերին հայտնի ու անհայտ աղբյուրներով արդեն լուրեր են շրջանառվում, թե իբր Ջաղինյանի օրերը հաշված են, նրան փոխարինելու է հենց Տիգրան Հակոբյանը, ով պրոֆեսիոնալ է իր գործում և ունի բավական դրական իմիջ: Հիմա հասկացանք, թե Հակոբյանի պրոֆեսիոնալիզմը որն է ու իմիջն ինչպիսին է: