«Չեք պատկերացնի` ինչ էր ինձ համար». Սյուզան Մարգարյանը բացել է փակագծերը

EXCLUSIVE

Երգչուհի Սյուզան Մարգարյանը մի քանի օրից նոր տեսահոլովակ կներկայացնի «Ամանոր» երգի հիման վրա, որի ռեժիսորը դուստրն է` Սիրուշոն։ Երգչուհին նկարահանման հրապարակում արված լուսանկարները բացառիկ կարգով տրամադրել է Tert.am Life-ին և պատմել նոր աշխատանքի մանրամասները։

 

Երգը 2010 թվականին թողարկված «Նոր տարի» ձայնասկավառակից է, որի բոլոր երգերի երաժշտությունն ու խոսքերը հեղինակել է Սիրուշոն։ Ձայնասկավառակը ներառում է 8 երգ։

 

«Երբ թողարկեցի «Նոր տարի» ալբոմը, որոշել էինք ամեն Նոր տարվան մի տեսահոլովակ ներկայացնել, սակայն 2 տեսահոլովակ նկարահանելուց հետո դադար առանք։ Ավագ թոռնիկս ծնվեց, հետո կրտսերը... Ես շատ էի ուզում, որ Նոր տարվա շեմին  ուրախ երաժշտություն հնչի երեխաների համար։ Ցանկությունս մեծ էր, բայց չէի նախաձեռնում տեսահոլովակի նկարահանում։ Իրագործողը  Սիրուշոն էր, այս տարի նա ինձ անակնկալ մատուցեց»,– ասաց երգչուհին։

 

 

Տկն Սյուզանը իմացել է տեսահոլովակի նկարահանման մասին, երբ դուստրն արդեն ամեն ինչ նախապատրաստել էր։ Այս տեսահոլովակում Սիրուշոն հանդես է գալիս որպես ռեժիսոր. նա գիտի, թե ինչպես է պատկերացնում է դեռևս 22 տարեկանում հեղինակած երգի տեսահոլովակը։ Այնպես որ, երկրպագուները կտեսնեն Սիրուշոյի ամանորյա հեքիաթը։

 

«Նկարահանումներից 2 օր առաջ Սիրուշոն ասաց, որ պատրաստ լինեմ այդ օրվա համար։ Չեք պատկերացնի` ինչ անակնկալ էր ինձ համար։ Սիրուշոն ամեն ինչ գերազանց էր կազմակերպել։ Առավոտյան ժամը 8–ին գնացի դիմահարդարման, վարսահարդարման։ Ժամը 10–ին նկարահանող անձնակազմն արդեն ինձ էր սպասում։ Հագուստներն ու ամեն ինչ պատրաստված էին»,– պատմեց տկն Սյուզանը ու հավելեց, որ դիմահարդարումը վստահել են Ագա Քանքանյանին և Մերի Համբարձումյանին, վարսահարդարումը` Նանա Հունանյանին։

 

Տեսահոլովակի համար տաղավարը զարդարել է ստեղծագործական թիմը` ստեղծելով իրենց պատկերացրած հեքիաթային միջավայրը։ «Շատ գեղեցիկ զարդարված  տաղավար էր։ Ներս մտնելուն պես հեքիաթային մի տեղ ընկա։ Քանի որ ձայնասկավառակը հիմնականում երեխաների համար է, տեսահոլովակում  էլ շատ երեխաներ կան։ Նախատոնական հեքիաթային տեսահոլովակ է, մայրիկը  խաղում է երեխաների հետ, համեղ ուտեստներ պատրաստում նրանց համար։ Կարծում եմ` շատ բարի տեսահոլովակ է լինելու»,– ասաց նա։

 

 

Սիրուշոն իր փոքրիկներին, երբեմն, ցույց է տալիս երկրպագուներին, սակայն հեռվից։ Նկարահանման օրը Tert.am Life–ը նրա մենեջեր Նունե Խուրշուդյանից հետաքրքրվել էր` արդյոք տատիկի տեսահոլովակում ինչժոր կերպ տեղ կգտնեն նաև Սիրուշոյի որդիները, Նունեն ասել էր, որ ամեն ինչ պարզ կլինի տեսահոլովակի թողարկվելուց հետո։

 

Տկն Սյուզանը հարցին ավելի հստակ պատասխան տվեց` Սիրուշոյի երեխաները տեսահոլովակում ներգրավված չեն։ Ամանորյա հեքիաթում մասնակցություն ունի երգչուհի Լանա Խաչատրյանի դուստրը` Նունեն։ Մյուս երեխաները հայտնի ընտանիքներից չեն։

 

«Նույնիսկ չգիտեմ` ինչպես են ընտրել փոքրիկներին, քանի որ նախապատրաստական փուլին չեմ մասնակցել։ Շատ համով բալիկներ էին, նկարահանումները  շատ ուրախ մթնոլորտում անցան։ Թիմը հսկայական աշխատանք էր արել Սիրուշոյի  գլխավորությամբ։ Սիրուշոն միշտ աշխատում է օպերատոր Արտյոմ Աբովյանի հետ։ Այս անգամ էլ էին միասին աշխատել. սցենարով և ռեժիսորական աշխատանքով Սիրուշոն է զբաղվել, օպերատորն Արտյոմն էր։ Շատ շնորհակալ եմ տղաներին`լավ աշխատանքի համար։ Իրենք աշխատում էին որպես մի թիմ։ Ես ուղղակի նայում էի, հիանում ու հպարտանում»,– պատմեց երգչուհին, ապա հավելեց, որ փորձում են հնարավորինս արագ ավարտել մոտնաժային աշխատանքներն ու տեսահոլովակը ներկայացնել հանդիսատեսի դատին։

 

 

Սյուզան Մարգարյանը վերջին տարիներին ակտիվ գործունեություն չի ծավալում որպես երգչուհի։ Նա նշեց, որ դա պայմանավորված էր ի հայտ եկած առողջական խնդիրներով, որոնք հաղթահարել է։ «Հուսով եմ, արդեն կշարունակեմ գործել։  Ստեղծագործական բացն ինձ համար լրանում էր թոռնիկներովս»,– ասաց նա։

 

Երգչուհուց հետաքրքրվեցինք, թե ինչպես են թոռնիկները` Ռոբերտն ու Միքայելը, արձագանքում տատիկի կատարմամբ մայրիկի հեղինակային երգերին։ Պարզվեց` նրանք էլ են երգերի երկրպագուները։

 

«Լսում են, ուրախանում։ Շատ են սիրում թե՛ իրենց մամայի, թե՛ իմ երգերը։ Մեծը, նույնիսկ, երգում է բառերը, իսկ փոքրը շատ ոգևորվում է։  Երաժշտություն լսելու առումով երկուսն էլ ակտիվ են, կատարողական առումով դեռ չեմ կարող ասել»,– ասաց տատիկը։