Ռուս հաղորդավարը տաղավարից դուրս է վռնդում ուկրաինացի փորձագետին /տեսանյութ/

Ռուսական НТВ հեռուստաալիքի հաղորդավար Անդրեյ Նորկինն ուկրաինացի քաղաքագետ Սերգեյ Զապորոժսկուն «ոչխար» է անվանել ու դուրս հանել կործանված «Բոինգի» թեմայով հաղորդման նկարահանման տաղավարից:

Ինչպես նշում է korrespondent.net-ը, «Հանդիպման վայր» («Место встречи») հաղորդման ժամանակ Նորկինը վեճի է բռնվել Զապորոժսկու հետ, որը հրավիրված էր որպես փորձագետ:

Հաղորդման թեման Ուկրաինայի օդային տարածքում մալայզիական ինքնաթիռի կործանման գործով հետաքննությունն է եղել: Հյուրերից մեկի հետ զրույցի ընթացքում հաղորդավարը փորձել է ապացուցել, որ միջազգային հանրությունն անտեսում է ռուսական կողմի բերած փաստարկները: Այնուհետև, հաղորդավարն ասել է, որ ինքնաթիռն ուկրաինական ռմբակոծիչի կողմից կործանվելու վերաբերյալ վարկածն առաջինը ներկայացրել է ոչ թե Ռուսաստանը, այլ մի ամերիկացի բլոգեր: Դա լսելով՝ Զապորոժսկին շտապել է հակադարձել հաղորդավարին՝ նրան անվանելով «ստախոս»:

Այնուհետև Նորկինն ուկրաինացուն վռնդել է տաղավարից՝ հանդիսատեսին ասելով, որ նման բան չի հանդուրժի «պատահած ամեն մի ոչխարից»:

Հիշեցնենք, որ Միջազգային քննչական խումբը հաստատել է, որ մալայզիական ինքնաթիռի ընկնելու պատճառը եղել է «Բուկ» ռուսական զենիթահրթիռային համալիրի արձակած հրթիռի վրա տեղադրված մարտական մասի պայթյունը: Ապացուցվել է, որ «Բուկ»-ն Ուկրաինայի տարածք է բերվել Ռուսաստանի Դաշնության տարածքից:

«Բոինգ»-ը կործանվել է 2014 թվականի հուլիսի 17-ին: 2015 թվականին Նիդեռլանդների անվտանգության խորհուրդը եկել էր եզրակացության, որ 298 մարդ տեղափոխող ինքնաթիռը խոցել են «Բուկ»-ից: