Վիկա Մարտիրոսյանը` Նանուլին «Մանկական Եվրատեսիլ» ուղարկելու մեկնաբանությունների և Արթուր Գրիգորիչի սանը դառնալու մասին

Պարուհի Վիկա Մարտիրոսյանի դուստրը` 7-ամյա Նանուլը, վերջերս ներկայացրեց նոր տեսահոլովակ «Նանուլի պարն ա» երգի հիման վրա։ Մեկուկես տարվա դադարից հետո ներկայացված տեսահոլովակից հետո Նանուլի հասցեին ակնառու քննադատություններ չեն հնչել, ինչպես նախորդ անգամները։  Tert.am Life–ի հետ զրույցում Վիկան պատմեց նոր աշխատանքի արձագանքների, Նանուլին «Մանկական Եվրատեսիլ» ուղարկելու կոչերի և առաջիկա անելիքների մասին։

«Սա մեր առաջին տեսահոլովակն է, որի վերաբերյալ ունեցել ենք գրեթե 100 տոկոս դրական կարծիքներ։ Բոլորը միաձայն ասում են, թե Նանուլիկը  պարի, երգի, արտիստիզմի առումով որքան է  փոխվել դեպի լավը։ Կարծում եմ`  դա պայմանավորված է նրանով, որ Նանուլիկը մի փոքր մեծացել է։ Ավելի խելացի է դարձել և խելքով է մոտենում այս ամենին։ Նա միշտ օգնում է ինձ։ Նա իր տարիքից հասուն է` շատ պատրաստված երեխա է, ուղեղը ճիշտ է աշխատում և աշխատասեր է»,– նշեց մայրիկը։

Նանուլի պարը բեմադրել է Վիկան, սակայն 7-ամյա աղջնակն անմասն չի մնացել ստեղծագործական պրոցեսից։ Պարզվում է` Նանուլն արել է իր առաջարկը, որն էլ դարձել է իր պարի հիմնական շարժումը։

«Տեսահոլովակից առաջ երկար ենք աշխատել` մոտ 3 ամիս։ Նանուլն իր ներդրումն է ունեցել  նաև պարի բեմադրման մեջ։ Կրկներգի ժամանակ կրկնվող թաթիկներով շարժումն ինքն է հուշել ինձ։ Երկար տանջվում էինք, թե ինչ անել, նա առաջարկեց  շարժումն ու հասկացա, որ այն գեղեցիկ է նայվում իր վրա,– պատմեց Վիկան ու հավելեց, որ դուստրը շատ է սիրում այս երգը –Ասում է, այս երգն ուրիշ ձև եմ սիրում, մամա ջան»։

Պարուհուն ոգևորել է այն փաստը, որ հանդիպել է մեկնաբանությունների, որոնք կոչ են անում Նանուլին ուղարկել «Մանկական Եվրատեսիլ»։ «Շատ գովելի է այն փաստը, որ, գրեթե, ամեն երրորդ մեկնաբանությունն այն մասին է, որ Նանուլիկը պետք է գնա «Մանկական Եվրատեսիլ»։ Ինձ համար հաղթանակ է, որ երեխային նման մեկնաբանություններ են գրում,– ասաց Վիկան, իսկ հարցին` ինքը տեսնո՞ւմ է դստերը այս մրցույթում, պատասխանեց,– Դեռ չեմ կարող ասել։ Ով ուզում է լինի, եթե տաղանդավոր է և հնարավորություն ունի իդեալական երգել կենդանի, կկանգնեմ կողքին։ Այս պահին ոչինչ ասել չեմ կարող։ Միայն կարող եմ ասել, որ Նանուլիկն արդեն անհատական պարապելու է Արթուր Գրիգորիչի հետ»։

Վիկան նշեց, որ մինչև 7 տարեկան Նանուլը չի գնացել վոկալի պրոֆեսիոնալ դասերի և չի ունեցել որևէ հիմք։ Մայրիկը հանգիստ է, որ դստեր մոտ այդ հիմքը կդնի Արթուր Գրիգորյանը։ «Ես արդեն շատ հանգիստ եմ, որովհետև իմ աղջկան վստահել եմ ամենապրոֆեսիոնալ ձեռքերին։ Պարարվեստի հետ կապված ես ամեն ինչ կանեմ, սակայն ինչ վերաբերում է երգարվեստին, աչքերս փակ կարող եմ վստահել Արթուր  Գրիգորիչին»,– ասաց նա։

Վիկայից հետաքրքրվեցինք, թե ինչպես է արձագանքել Գրիգորիչը` լսելով Նանուլիկին։ Նա հայտնեց, որ դուստրը երկար լսումներ է անցել նրա մոտ, մինչև պարապմունքները սկսելը։ «Գրիգորիչը միշտ սիրել է Նանուլիկին։ Իրեն հետաքրքիր էր` Նանուլիկի երգի տվյալները, ասաց, որ հիմք կա, որպեսզի իր հետ աշխատի»,– ասաց մայրիկը։

Պարուհին նշեց, որ առաջիկայի համար շատ ծրագրեր շատ ունեն, սակայն ժամանակից շուտ խոսել չի ուզում։ «Նա արդեն շատ լուրջ է պատրաստվելու, որովհետև սխալվելու տեղ չունենք։ Ինքն արդեն մեծ է և ցանկություն  ունի ներկայանալ այս ոլորտում։ Հիմա պետք է աշխատենք, որպեսզի առաջ գնանք, ոչ թե տեղում մնանք»,– նշեց Վիկան։

Վիկայի փոխանցմամբ` այս ուղին ընտրել է դուստրը, ինքը ստիպողաբար չէ աղջկան պահում այս ոլորտում։ «Եթե ինքը պատրաստ չլիներ, ես երբևէ զոռով չէի դրդի զբաղվել այս ամենով։ Նույնիսկ, երբ ինձ մոտ գալիս են պարի ընդունվելու, եթե մայրն ուզում է, որ երեխան պարի, փոքրիկը` ոչ, ես չեմ ընդունում։ Բացառվում է, որ ես իմ երեխային ստիպելով  երգացնեմ ու պարացնեմ։ Եթե ապագայում հետաքրքրություն չունեցավ, ես չեմ ստիպի, որ, օրինակ, պարով շարունակի։ Ինքը պետք է որոշի` ինչ մասնագիտություն ընտրել։ Այս պահին իր երազանքը կապված է երգչուհու կարիերայի  հետ։ Նա խելագարվում է այն պահի համար, որ լինի երգչուհի, միշտ բեմում` բարձրախոսը ձեռքին։ Իր տարերքը դեռ դա է, թե ինչ կլինի հետագայում, չգիտեմ»,– նշեց նա։