«Այլևս շատ բաց կերպարներով չեմ ներկայանա». Անահիտ Հարությունյան

Մոդել Անահիտ Հարությունյանի անձնական կյանքը լայն քննարկումների առիթ է դարձել` նրա 26–ամյակի խնջույքի օրվանից, երբ սիրելին Անահիտին բնական մորթուց թանկարժեք մուշտակ նվիրեց, և զույգն առաջին անգամ միասին ներկայացավ։

Որոշ ժամանակ առաջ Անահիտը խոսում էր, որ սիրելին Բելգիայից բիզնեսմեն է, սակայն տղամարդը, ում հետ նա ներկայացել է խնջույքին այլ մարդ է։ Անահիտը բաժանվել է տվյալ բիզնեսմենից։

Tert.am Life–ի հետ զրույցում մոդելը պատմեց, որ ներկայիս ընկերոջ հետ հանդիպում է արդեն 1 տարի, թեև ծանոթ են 2014-ից։ Չնայած Անահիտը չի բացահայտում սիրելիի ով լինելը, մեր լսարանի համար պարզաբանեց, որ այս անգամ ևս ընտրյալը Հայաստանից չէ, ԱՄՆ–ից է, ազգությամբ հայ չէ, սակայն չնշեց, թե ինչ ազգի ներկայացուցիչ է։ Անահիտի ընտրյալը ծնվել և մեծացել է ԱՄՆ–ում։ Նրա խոսքով` սիրելին Հայաստանի հետ կապող այլ օղակներ չունի։

«Սիրելիիս ով լինելը չեմ բացահայտի մեր սուրբ լսարանի առաջ։ Անձի մասին տեղեկություններ ունենալու դեպքում մի շարք բարոյական հետաքրքրասերներ, գուցե, իրենց պարտքը համարեն մտնել անձնական տարածք։ Ինձ դուր չի գալիս, որ անհասկանալի ծագումով մարդիկ իրենց սուրբ պարտքն են համարում ինձ բարոյականություն քարոզել` հաշվի առնելով նման մասսայի ինտելեկտը և դաստիարակության բացահայտ բացակայությունը»,– ասաց նա։

Լայն քննարկումներն Անահիտին առանձնապես չեն անհանգստացնում։ Նա կախված չէ հասարակական կարծիքից։ «Փառք Աստծո, ադեկվատ դաստիարակություն եմ ստացել»։ Հարցին, թե ինչպես է ընտրյալն արձագանքել այս քննարկումներին, Անահիտը պատասխանեց, որ նա մի փոքր ցնցված է, սակայն չի սրտնեղել, որ իրեն ներկայացնում են որպես զոհ, ում կողքին 26-ամյա մոդելը փողերի համար է գտնվում. «Չի սրտնեղել, բայց շատ զարմացած է վերջին խոսակցություններից։ Մենք գիտենք, որ քննադատողների վարկածները սխալ են»։

Մոդելն ավելի հեշտ լեզու է գտնում այլազգի տղամարդկանց հետ։ Ըստ նրա` ինքն ընդունակ չէ ընդունելու «հայկական ավանդական» մտածելակերպը։ «Այն մարդկանց չի թողնում զարգանալ, ստիպում է ապրել տաբուներով։ Նման մարդկանց հետ շփվելն ինձ համար տհաճ է։ Ինձ համար առաջնային է մարդու հետ տարրական շփումը` ինտելեկտը, հետաքրքրությունների առկայությունը։ Շատերի համար նորմալ է համարվում, որ կինը պետք է լինի չխնամված, տանջված, անհետաքրքիր և դժբախտ։ Ես դա չեմ ընդունում։ Ես մազոխիստ չեմ»,– ասաց նա։

Անահիտը, որպես մոդել ներկայանում է բաց կերպարներով, շատ տղամարդիկ ավելի սեփականատիրական, խանդոտ բնավորություն ունեն։ Մոդելի խոսքով` ընտրյալը բացառություն չէ։ Նա նշեց, որ այլևս շատ բաց կերպարներով չի ներկայանա։ Դիտարկմանը, որ զարմանալի է իրենց նման բան լսելը, Անահիտն արձագանքեց. «Պետք է հավատալ հրաշքներին։ Ինձ համար կարևոր է հարաբերությունների ներդաշնակությունը։ Պետք է գնալ փոխզիջման»։

Անահիտը նկատեց, որ սիրելիի տարիքի մասին խոսակցություններն ուռճացված են, սակայն նա տարիքը բացահայտել չցանկացավ։ Այն, որ նրանց միջև սերնդային տարբերություն կա, ըստ մոդելի, չի բարդացնում հարաբերությունները։ «Մեր հետաքրքրությունները նույնն են։ Ես չունեմ իմ տարիքին բնորոշ հետաքրքրությունները։ Մենք բոլոր առումներով համապատասխանում ենք իրար»,– ասաց նա և նշեց, որ հարաբերություններում սիրելին ավելի երիտասարդանում է, ինքը` հասունանում։

Մոդելի փոխանցմամբ`  տարածությունը ևս չի խանգարում հարաբերություններին, քանի որ սիրելին հաճախ է գալիս Հայաստան իրեն տեսնելու համար։ ԱՄՆ տեղափոխվելու մասին խոսել Անահիտը չի շտապում, ասում է` ժամանակն ամեն ինչ ցույց կտա։

Ինչ վերաբերում է քննարկումներին, որ ընտրյալը մեծահարուստ է, Անահիտը չցանկացավ նշել, թե ինչով է նա զբաղվում։