Ե՞րբ կնժդեհացնեն վարչապետին․ Shame.am

Shame.am-ը գրում է․

Անկուսակցական վարչապետ ունենալու խաղաքարտը կարծես թե իրեն չարդարացրեց: Կարեն Կարապետյանի ընտրության և նշանակման առաջին օրերից իշխանություններն ամեն քայլափոխի տարփողում էին այն մասին, որ ՀՀԿ-ն չի պատրաստվում երկիրն իրենով անել, և նրա դռները բաց են բոլորի առաջ: Իբրև ասվածի լավագույն ապացույց նշվում էր հենց նոր վարչապետի անկուսակցական լինելու փաստը: Այդ հանգամանքը գեղեցիկ կերպով մատուցվում էր նաև որպես նրա ազատ գործունեության երաշխիք: Նույնիսկ ինչ-որ պահի մտքեր հնչեցին, թե Կարապետյանի տարբերությունը Հովիկ Աբրահամյանից հենց այն է, որ Աբրահամյանը կաշկանդված էր կուսակցական լինելու փաստով:

Սակայն այժմ երաժշտությունը հետզհետե փոխվում է: Օրերս Հանրապետական կուսակցության խոսնակ Էդուարդ Շարմազանովը կուսակցության ԳՄ նիստից հետո չբացառեց, որ նորանշանակ վարչապետ Կարեն Կարապետյանը կարող է ընդգրկվել ՀՀԿ կազմում: «Նոր նախարարները և վարչապետ Կարեն Կարապետյանը մեր քաղաքական թիմի անդամներ են: Այս կառավարության համար Հայաստանի Հանրապետական կուսակցությունը կրում է ամբողջական պատասխանատվություն», - ասաց Էդուարդ Շարմազանովը՝ մի հարվածով մատուցելով վարչապետի ապագայի տեսլականը: Փաստացի Կարեն Կարապետյանին ներկա պահին կանգնեցրել են լուրջ ընտրության առաջ, որովհետև ինչ-որ պահի այդ ընտրությունը կձևակերպվի հետևյալ հարցադրումով. «Դու կամ մեզ հետ ես, կամ մեր դեմ»: Իսկ վարչապետը դեմ լինել չի կարող, քանի որ արդեն կատարել է իր ճակատագրական ընտրությունը՝ բազմել է վարչապետական աթոռին: Նա կդառնա հանրապետական, մեր օրերի Գարեգին Նժդեհը, և ինչպես Նժդեհը նահանջի տեղ չունեցավ Բուլղարիայից և հանձնվեց ՆԿՎԴ-ին, այնպես էլ նահանջի տեղ չի ունենա Կարեն Կարապետյանը: Ուղղակի այս պահի դրությամբ պարզ չէ, թե ում է հանձնվելու նա: