Ամանորյա շպար ամենահամարձակ երեւանցի աղջիկների համար

Ամանորյա գիշերը բոլորն էլ ուզում են զարմացնել իրենց հանդերձանքով, սանրվածքով ու հատկապես շպարով, որի մասին էլ մենք այսօր կխոսենք։ Բյութի թրենդերի մասին նույնիսկ ամենաքիչ իրազեկված մարդը գիտի , որ գալիք  Դեղին շան տարին անցնելու է «shine bright» -ի հովանու ներքո։ Ընդ որում փայլերը տեղին կլինեն կոպերին, թարթիչներին, այտերին, էլ չասենք հագուստի մասին։ Մենք սովոր ենք տեսնել գլիթեր միայն մոդելների վրա կամ էլ թեմատիկ երեկույթի համար էքստրավագանտ կերպարի ստեղծման համար։ Բայց նորաձեւության կանոններն այսօր մեզ թույլ են տալիս օգտագործել փայլեր նաեւ ամենօրյա կյանքում։ Հատուկ NEWS.am STYLE-ի համար վիզաժիստ Սաթի Պողոսյանը ցուցադրել է ամանորյա գլիթերով շպարի տարբերակներ ու պատմել, թե ինչպես է ճիշտ օգտագործել ու համադրել փայլերը։

Մի քանի տարի առաջ ոչ մեկի մտքով անգամ չէր կարող անցնել, որ գլիթերները կսկսեն շուրթերին քսել։ Բայց այսօր դա շպարի ամենաաղմկահարույց թրենդն է։

Իրականում շուրթերի վրա նման շերտ ստանալու համար Ձեզնից երկու բան է պահանջվում՝ շրթներկ՝ ցանկալի է քսուքային հիմքով, որպեսզի փայլերը լավ կպնեն շրթերին, ու մանրացված գլիթեր։ Սկզբում շուրթերին քսում են շրթներկը, իսկ հետո վրձինով ամբողջ մակերեսը պատում ենք գլիթերով։ Փայլերով շուրթերը շատ գրավիչ ու գեղեցիկ տեսք են ստանում։

Մեզ համար ավելի սովորական է համարվում աչքերի վրա փայլերի գործածումը։ Գլիթերը հատկապես գեղեցիկ է սմոքիի վրայից։ Նախ կոպի վրա ավելի ջերմ երանգների ստվերաներկ ենք քսում, ոսկեգույնին, դեղձագույնին կամ շագանակագույնին մոտ, այնուհետեւ կարող ենք օգտագործել մուգ մոխրագույն ստվերաներկեր, սեւից ցանկալի է հրաժարվել։ Ու լավ տարածում ենք, որպեսզի «սմոքի այս» ստացվի։ Իսկ հիմա ՝ փայլը։ Փայլերով փշրվող ստվերաներկերը ցանկալի է ամրացնել սոսնձի միջոցով։ Իսկ եթե ստվերաներկերը քսուքաձեւ են, ապա դրանք կարելի է պարզապես քսել կոպի վրա վրձինով կամ մատներով։

Ահա եւ ամբողջ գաղտնիքը։