Լուիզա Ղամբարյանը բացել է փակագծերը

Tert.am Life–ն իր ընթերցողներին պատմել է Հանրայինի նոր` «Բացի՛ր աչքերդ» հեռուստանովելի մասին։ Դերասանուհի Լուիզա Ղամբարյանն այստեղ խաղում է ծերանոցի տնօրենի կերպար և առաջին անգամ հեռուստադիտողին ներկայանում է սառնասիրտ կնոջ կերպարով։ Առաջին հայացքից առանց զգացմունքների կնոջ հոգում, սակայն, բազմաթիվ հույզեր կան, որոնք նա խնամքով թաքցնում է։ Tert.am Life–ի հետ զրույցում Լուիզան ասաց, որ իր համար շատ հետաքրքիր է խաղալ այս կերպարը։

«Ալլան արտաքուստ սառնասիրտ թվացող մարդ է, որի էությունը բոլորովին այլ է։ Կյանքի և իրավիճակների բերումով նա պաշտպանողական դիմակ է կրում, քանի որ անձնական կյանքում նա միայնակ է, իսկ ի պաշտոնե ղեկավարում է կոլեկտիվ, որտեղ տարբեր հոգեբանությամբ և խնդիրներով տարեց մարդիկ կան։ Նրա էությունն իրականում այլ է։ Կին է, որը սիրելու և սիրվելու կարիք ունի։ Պարզապես, սերը դեռ հյուր չի եկել նրան։ Աստված ամեն մեկին իր ժամանակին է սեր տալիս։ Ալլան դեռ կժպտա հոգու խորքից, նրա աչքերը կբացվեն և կփայլեն»,– նշեց Լուիզան։

Դերասանուհին առաջին անգամ է ֆիլմում ներկայանում այսպիսի կերպար։ Նա նկատեց, որ այն իրեն հնարավորություն է տալիս նորովի ներկայանալ լսարանին։ «Ինձ հետաքրքիր է, քանի որ առաջին անգամ հնարավորություն ունեցա էկրաններից ներկայանալ այլ բնավորությամբ ու գույնով։ Կերպարս մասնագիտական բավականին նուրբ աշխատանք է պահանջում։ Սա տրիվիալ բացասական կերպար չէ։ Եթե փորձենք վերլուծել կերպարները, կհասկանանք, որ երբեք չի կարելի միանշանակ ասել` սա դրական է, սա` բացասական, սա զոհ է, սա` հաղթող։ Ամեն կերպար ունի իր պատճառահետևանքային կապը։ Ես աշխատանքային շատ նուրբ շերտերի վրա եմ կառուցում իմ և՛ խոսքը, և՛ շարժումները, և՛ հարաբերությունների զարգացումը։ Դա ինձ հաճույք է պատճառում»,– նկատեց նա։

Հեռուստատեսային նախագծերում ամենամեծ խնդիրը լավ սցենարի բացակայությունն է։ Այս դեպքում սցենարի հեղինակը դրամատուրգ Աննա Աղասարյանն է։ Այս փաստը շատ է ոգևորել Լուիզային։ «Առաջին հերթին, նախագիծն ինձ գրավեց նրանով, որ Աննան ունի դրամատուրգիական մեծ ճանապարհ, ինչն անհետևանք չէր կարող լինել»,– ասաց դերասանուհին, ապա հավելեց, որ ռեժիսորն էլ Արտյոմ Հարությունյանն է, որի հետ աշխատել է «Կյանքի գինը» և այլ հեռուստանովելների շրջանակում։

Ի դեպ, Լուիզայից տեղեկացանք, որ ի սկզբանե ֆիլմաշարը կազմված էր 40 մասից, սակայն հաշվի առնելով հեռուստադիտողների ցուցաբերած հետաքրքրությունը, որոշել են այն դարձնել 52 մաս։ Ըստ Լուիզայի` կերպարներն ու սցենարը դրանից չեն տուժել, փոփոխությունը չի ազդել կուռ կառուցվածքի վրա, քանի որ տարբերությունը մեծ չէ։ Դերասանուհին կարևորեց, որ այս նախագիծն ունի սկիզբ, կուլմինացիա և ավարտ։

Այս փուլում Լուիզան նկարահանվում է նաև մեկ այլ հեռուստանովելում, որի փակագծերն առայժմ չի կարող բացել։

Այս թեմայով «Ես ու նա հիմա գործընկեր ենք». Վարուժան Մարգարյանը` անձնական կյանքի մասին Լուիզա Ղամբարյանն ընդունելի չի համարում պայքարի այս ձևը «Չեմ անում մի քայլ, որ իմանան բոլորը»․ Լուիզա Մելքոնյան Անելյա Գուբրյանը՝ անչափահաս լինելով` սիրային տեսարաններում նկարահանվելու մասին Լուսանկարներ նոր սիթքոմի նկարահանման հրապարակից