Արամ MP3–ի, Իվետայի, Սոսի, Խորենի, Միշոյի, Շանթի և այլոց մասնակցությամբ «Մեր երազանքների ճանապարհը» ֆիլմի փակ դիտումն ու մանրամասները

«Մեր երազանքի ճանապարհը». 7 տարբեր սյուժե, 7 տարբեր ռեժիսոր ու տարբեր մոտեցում միավորվել են մի գաղափարի շուրջ ու ստեղծել ֆիլմ, որն ամփոփում է Հայաստանի կենսագրության վերջին 26 տարիները։ Այսօր կայացել է ֆիլմի պրեմիերան, որին ներկա է եղել նաև  Tert.am Life-ը։

«Շարմ հոլդինգի»և Առաջին ալիքի նոր նախագծի աշխատանքներ սկսվել էին դեռևս 2 տարի առաջ։ Արցախյան պատերազմի մասին «Բարև, սիրելիս»–ը (ռեժ. Արամ Շահբազյան), Հանրապետության հրապարակի ժամացույցի զանգերի նախապատմության մասին «Ֆա»–ն  (ռեժ. Արկա Մանուկյան), պապիկի երազանքն իրականացնելու մանկական ուժգին ցանկության մասին «Ձյուն»–ը (ռեժ. Արեն Մալաքյան), հայ–թուրքական պետական սահմանի 300 մետրանոց ձորակն անցնելու համար 3000 կմ ճանապարհ գնալու ու սեփական գյուղին «հեռվից» նայելու անզորության մասին «Սիմոնի ճամփան», Մեր ծնողներին գնահատելու ու առօրյա վազքի մեջ ամենակարևորի` մեր սիրելիներին չմոռանալու մասին «Հայրը» (ռեժ. Հրաչ Քեշիշյան), Էմոցիոնալ ու պոռթկուն, սիրելու ու երազանքներն իրականացնելու զանազան ճանապարհների մասին «Մեղրամիսը» (ռեժ. Արշալույս Հարությունյան) ներկայացնում են հայաստանյան կյանքի գունապնակը։ Այս բոլոր պատմությունները հատվում են Մհեր Մկրտչյանի «Սեր, երազանքներ» ֆիլմում։

Թվում է` այս պատմությունները չափազանց տարբեր են ու հատման ոչ մի կետ չունեն, մինչդեռ  հատման կետերը շատ են։ Ֆիլմի պրոդյուսերները նշում են, որ դրանք հիմնված են իրական պատմությունների վրա։ Պրոդյուսեր Արման Միտոյանը նկատեց, որ իրենք չեն գնացել պատմությունների հետքերով, սակայն սցենարիստներն ասել են, որ պատմությունները հիմնված են իրական փաստերի վրա։

Սյուժեի իրական հիմքը պետք չէ փնտրել կոնկրետ ճակատագրերում, քանի որ պատմությունների զգալի մասը մեր ու մեր հարազատների կյանքից են։ Բոլոր պատմությունների հատման կետերը հենց այդտեղ են թաքնված։

Ռեժիսորներից յուրաքանչյուրը ֆիլմերում ցուցաբերել է իր մոտեցումն ու ձեռագիրը։ Պրոդյուսեր Կարեն Ղազարյանը նկատեց, որ ֆիլմերը, որպես առանձին պատմություններ, ներկայացված են տարբեր փառատոնների։

«Որպես պրոդյուսեր` մենք չենք հետապնդել նպատակ, որ բոլոր ռեժիսորներին բերենք մի կաղապարի մեջ։ Ֆիլմը կոչվում է «Մեր երազանքի ճանապարհը» և պատմում է անկախության տարիներին մեր անցած ճանապարհի մասին։ Այդ կյանքը մի կաղապարի մեջ չի եղել։ Տարբեր մոտեցումներ, էմոցիաներ ու զգացմունքներ են եղել։ Մենք մտածեցինք, որ ֆիլմերն էլ պետք է լինեն շատ տարբեր։ Յուրաքանչյուր ռեժիսոր պատմության մեջ պետք է ներդնի իր ապրածն ու կյանքը, որպեսզի հանդիսատեսը ստանա Անկախությունից հետո մեր ապրած կյանքի ամբողջ գունապնակը»,– ասաց պրոդյուսերը։

Ֆիլմերի դերասանական կազմում ընդգրկված են Դավիթ Ամալյանը, Սոս Ջանիբեկյանը, Խորեն Լևոնյանը, Միշոն, Արամ MP3-ը, Շանթ Հովհաննիսյանը, Իրինա Հարությունյանը, Անի Պետրոսյանը, Իվետա Մուկուչյանը, Բաբկեն Չոբանյանը, Ժան Նշանյանը, Շաքե Թուխմանյանը, Եգոր Գլումովը, Արման Մարգարյանը, Լևոն Հարությունյանը և այլք։

Լուսանկարները` Շաքե Հովհաննիսյանի