Ալաշկերտի նախկին ֆուտբոլիստը գործակալ է դարձել և նպատակ ունի օգնել հայկական ֆուտբոլին

«Ալաշկերտի» նախկին ֆուտբոլիստ Տիգրան Գրիգորյանը երևանյան ակումբից տարիներ առաջ հեռանալուց հետո ուժերը փորձել է եվրոպական մի քանի ակումբներում, սակայն արդյունքում որոշել է խաղակոշիկները կախել մեխից, և այժմ զբաղվում է ֆուտբոլային գործակալի աշխատանքով:

«Արդեն 4 տարի է` Եվրոպայում եմ: Ի սկզբանե նպատակս եղել է միայն ֆուտբոլ խաղալը, բայց երբ հնարավորություններդ ճիշտ չես օգտագործում, չպետք է հուսահատվես և մտածես ֆուտբոլը թողնելու մասին, որին նվիրվել ես գրեթե ողջ կյանքդ»,- մեզ հետ զրույցում խոստովանեց Տիգրանը:

26-ամյա նախկին ֆուտբոլիստի խոսքով ինքը հետագա գործունեությունը ևս որոշել է ծավալել ֆուտբոլում.

«Որոշեցի մնալ ֆուտբոլում և հնարավորություն ստեղծել այն խաղացողների համար, ովքեր իսկապես դրա կարիքը ունեն և ովքեր իսկապես աշխատասեր են ու պրոֆեսիոնալ են ապրում և մտածում: Իմ նպատակն է օգուտ տալ հայկական ֆուտբոլին, հայ ֆուտբոլիստների համար եվրոպական ակումբներ տեղափոխվելու հնարավորություն ստեղծել»,- ասում է մեր զրուցակիցը:

Նա նաև հայտնեց, որ իրենք աշխատում են 4-ով, իսկ ինքը հիմնականում համագործակցում է բուլղարական, շվեդական, նորվեգական և դանիական ակումբների հետ.

«Հիմնականում 4 հոգով ենք աշխատում: Ես, հայ ընկերս` Նարեկ Մովսիսյանը, ով շատ պրոֆեսիոնալ է, 6-ից ավել լեզուների է տիրապետում: Ֆարիդ Խալաֆը, որը շատ հանրահայտ գործակալ է, աշխատում է այնպիսի թիմերի հետ, ինչպիսին են ՊՍԺ-ն, «Չելսին» և այլն: Եվ Ալան Բեզոուի հետ, որը մեծ կապեր ունի բելգիական և ֆրանսիական ակումբների հետ»,- նշեց Տիգրան Գրիգորյանը և հայտնեց, որ այժմ բանակցություններ են ընթանում հայ 5 ֆուտբոլիստների հետ.

«Ակումբներ կան, որոնք հետաքրքրված են հայ ֆուտբոլիստների ծառայություններով, մասնավորապես «Բերոե» բուլղարական ակումբն ու «Բոտև Պլովդիվը» հետաքրքրված են Միհրան Մանասյանի և Գագիկ Դաղբաշյանի ծառայություններով: Իսկ Մարկ Գրիգորյանի ծառայություններով, որն իմ կարծիքով շատ հեռանկարային դարպասապահ է, հետաքրքրված են ֆրանսիական Նասիոնալում հանդես եկող երկու թիմեր»:

Նրա խոսքով այս ֆուտբոլիստների հետ բանակցություններն ընթացքի մեջ են, իսկ բուլղարական ֆուտբոլում կապեր հաստատելու հարցում իրեն օգնել է «Ալաշկերտի» նախկին ֆուտբոլիստ Վիկտոր Շիշկովը:

Տիգրան Գրիգորյանի խոսքով, ինքն արդեն հասցրել է երկու գործարք իրականացնել.

«ՖԻՖԱ-ի նոր օրենքների համաձայն ֆուտբոլային գործակալ որպես այդպիսին այլևս գոյություն չունի: Կա ֆուտբոլային միջնորդ հասկացությունը: Ֆուտբոլային գործակալի աշխատանքը միայն գումար վաստակելը չէ, կամ ակումբի հետ պայմանագիր կնքելն ու վերջ: Պետք է հասկանաս ֆուտբոլիստի հոգեբանությունը և մտնես իրավիճակի մեջ: Ուժ տաս նոր նպատակների հասնելու համար. ես դա լավ գիտեմ, քանի որ ինքս էլ եղել եմ ֆուտբոլիստ և ունեցել եմ դրա կարիքը:

Երբ Ֆրանսիայում էի, նկատեցի երկու շատ տաղանդավոր ֆուտբոլիստների, որոնք կորցրել էին հավատը սեփական ուժերի հանդեպ: Նրանց հետ խոսելուց հետո մենք դարձանք մեկ թիմ ու փորձաշրջան անցնելուց հետո նրանք երկուսն էլ պայմանագիր կնքեցին «Բուլոն» ակումբի հետ, որը հանդես է գալիս ֆրանսիական Նասիոնալում և բավականին հայտնի ակումբ է. այստեղ հանդես են եկել Ֆրանկ Ռիբերին և Էմանուել Կանտեն: Ես այդ գործարքից ոչ մի գումար չեմ ստացել, բայց երջանիկ էի ... իսկ հիմա նրանք իմ ֆուտբոլիստներն են համարվում»,- եզրափակեց իր խոսքը Տիգրան Գրիգորյանը:

Այս թեմայով «Ալաշկերտի» վերջին ձեռքբերումը «Ալաշկերտի» հերթական ձեռքբերումը. տեսանյութ 20-ամյա բրազիլացին՝ «Ալաշկերտում»