«Ոստիկանապետը մանթո ա մնացել ինձնից». նոր կրքեր Գորիսում

Գորիսի ոստիկանապետ Գեւորգ Ազիզյանի մասնակցությամբ տեղի ունեցած միջադեպի հետեւանքով տուժած եւ գործում որպես մեղադրյալ կալանավորված, ավելի ուշ գրավի դիմաց ազատ արձակված եւ արդարացված Արթուր Գեւորգյանին թմրանյութ օգտագործելու համար ենթարկել են վարչական պատասխանատվության: News.am-ի հետ զրույցում Արթուր Գեւորգյանը պատմել է, որ քննիչը որոշում է կայացվել իր նկատմամբ քրեական հետապնդումը դադարեցնելու վերաբերյալ, սակայն, դրանից հետո որոշել են վարչական պատասխանատվության ենթարկել՝ առանց հիմքի:

«Ոստիկանապետն իմ վրա ակտ է գրել: Քննիչը գրել է՝ հետապնդում չիրականացնել, բայց բաժնի պետը բռնել վարչական իրավախախտման արձանագրություն է կազմել, բայց թե ինչն են հիմք ընդունել, պարզ չէ: Փորձագետը գրել է՝ ոչ կարող ենք հերքել, որ օգտագործել է թմրանյութ, ոչ էլ կարող ենք հաստատել, որ չի օգտագործել: Վաղեմության ժամկետի խնդիր կա՝ չեն կարողացել ապացուցել: Այսինքն՝ չի երեւում ոչ մի բան ու չեն էլ կարող գրել, որ ոչ մի բան չի երեւում՝ 50/50 է: Ես պնդել եմ ու պնդում եմ, որ չեմ օգտագործել, դրա օգտագործման ձեւն էլ չգիտեմ: Հնարավոր է իմ մոտ ծխած լինեն ու կարող է դա շնչել եմ, դրա համար էլ տված լինի, որ օգտագործել եմ: Փորձագետն էլ է ասում, որ հնարավոր է նման բան: Ես հիմա պնդում եմ, որ նորից անալիզ անեն ինձ, բայց չեն անում: Հիմա դրա համար բողոք ենք ներկայացրել Վարչական դատարան»,-ասաց նա:

Արթուր Գեւորգյանը նշեց, որ վստահ է, որ սա Գորիսի ոստիկանապետ Գեւորգ Ազիզյանի «ձեռքի գործն է». «Ոստիկանապետը սարքել է իր սեփական հիմնարկը, ոնց ուզի, տենց անում է: Ուզեցել է իմ վրա մի բան լինի, մանթո է ինձանից մնացել, դրա համար էլ սենց ա անում»:

Հիշեցնենք, որ NEWS.am-ի հետ զրույցում Արթուր Գեւորգյանը պատմել էր, որ Գորիսի ոստիկանապետի մասնակցությամբ միջադեպից հետո, երբ իրեն կալանավորել էին, այդ ժամանակ ստուգել են իրեն եւ ըստ ստացված եզրակացության՝ ինքն իբր թմրանյութ օգտագործած է եղել:

Նշենք, որ ՀՀ քննչական կոմիտեի Սյունիքի քննչական բաժնում Արթուր Գեւորգյանի՝ թմրանյութ օգտագործելու մասով քննություն էր ընթանում:

Գորիսի ոստիկանապետի մասնակցությամբ միջադեպի գործով հարուցված քրեական գործը կարճվել է՝ ՀՔԾ-ն ոստիկանապետի գործողություններում հանցանք չի տեսել: Հանցանք չի տեսել նաեւ Արթուր Գեւորգյանի գործողություններում, որին որպես մեղադրյալ էին ներգրավել գործում:

Ի դեպ, միջադեպից հետո պաշտոնից ազատված ոստիկանապետը օրեր առաջ վերականգնվել է:

Հիշեցնենք, որ մամուլում տեսանյութ էր հայտնվել, որտեղ երեւում էր, թե ինչպես է Գորիսի ոստիկանապետ Գեւորգ Ազիզյանը ծեծում մի քաղաքացու: Պարզվել էր, որ միջադեպը տեղի էր ունեցել մարտի 8-ին՝ ժամը 22:15-ի սահմանում, Գորիսում գտնվող «Դիանա» հյուրանոցային համալիրին հարող տարածքում, ծեծվել էր ոստիկանապետի տեղակալի եղբայրը՝ Արթուր Գեւորգյանը: Տուժած Արթուր Գեւորգյանը հետագայում ներգրավվել էր գործում որպես մեղադրյալ ոստիկանի նկատմամբ բռնություն գործադրելու մեղադրանքով, նա կալանավորվել էր, ապա ազատ արձակվել: Գործը քննչական կոմիտեից տեղափոխվել էր ՀՔԾ, որոշ ժամանակ անց կարճվել՝ հանցակազմի բացակայության հիմքով:

Նշենք, որ միջադեպից հետո՝ մարտի 22-ին, ոստիկանապետի հրամանով Գեւորգ Ազիզյանի լիազորությունները դադարեցվել էին: