16-ամյա աղջկան ամուսնացնելուց հետո փեսային մեղադրել է իր աղջկան կուսազերծելու մեջ

1in.am 

Կոտայքի մարզի ընդհանուր իրավասության դատարանում Գեղամ Մարգարյանի նախագահությամբ ավարտվել է Երանուհի Գ.-ի ու նրա անչափահաս դստեր՝ Վերա Ա.-ի (անուն ը փոխված է) գործի դատական քննությունը:

Ըստ մեղադրանքի՝ Երանուհին իր անչափահաս՝ 2000 թվականի հուլիսի 29-ին ծնված դստերը՝ 16-ամյա Վերային, 2016 թվականի նոյեմբերի 15-ին ամուսնացրել է չափահաս Սամվել Մ.-ի հետ:

Վերջինս անչափահաս կնոջ հետ բնակվել է Գեղարքունիքի մարզում:

16-ամյա աղջկան ամուսնացնելուց մեկ շաբաթ անց՝ 2016 թվականի նոյեմբերի 22-ին, ժամը 22-ի սահմաններում Երանուհին զանգել է փեսային, բայց վերջինիս հեռախոսն անջատված է եղել:

Երանուհին տաքսի է վարձել ու Կոտայքի մարզից մեկնել է Գեղարքունիքի մարզ՝ Սամվել Մ.-ի տուն:

Նա, ըստ մեղադրանքի, առանց պատճառի ու բացատրությունների՝ հավաքել է մեկ շաբաթ առաջ ամուսնացած դստեր իրերը, նրան նստեցրել է տաքսի ու տարել է իրենց տուն: Երանուհին տաքսիստ Կարենին չի վճարել, խոստացել է կարճ ժամանակում վճարել ուղեվարձը՝ 14 հազար դրամը:

Հաջորդ օրը՝ նոյեմբերի 23-ին, Սամվելը զանգել է զոքանչին ու բացատրություն է պահանջել՝ կնոջը տանելու համար:

Զոքանչը, ըստ մեղադրանքի, սպառնացել է Սամվելի մասին արատավորող տեղեկություններ տարածել, եթե նա իրեն չտա 50 հազար դրամ կամ դրան համարժեք՝ ամուսնության առիթով կնոջը նվիրած ոսկե մատանին, որը մնացել էր նրա մոտ:

Երանուհին, ըստ մեղադրանքի, սպառնացել է Սամվելին, թե իր պահանջածը չստանալու դեպքում կդիմի ոստիկանություն ու նրան կմեղադրի դստեր նկատմամբ հանցավոր արարքներ կատարելու մեջ:
Սամվելը մերժել է զոքանչին:

Հաջորդ օրը՝ նոյեմբերի 24-ին, Երանուհին ոստիկանության բաժնում սուտ հաղորդում է տվել, իբր՝ 2016 թվականի նոյեմբերի 22-ին, ժամը 12-ին Սամվել Մ.-ն դպրոցի մոտից առևանգել է անչափահաս դստերը՝ Վերային, տարել է Գեղարքունիքի մարզում գտնվող իր տուն, որտեղ հաջորդ օրը դստեր կամքին հակառակ՝ բռնաբարել է, Վերային զրկել է կուսությունից:

Այնուհետև, ըստ մեղադրանքի, Երանուհի Գ.-ն «իր վերջնական նպատակին հասնելու, հանցագործության մասին իր նշած տեղեկությունները իրական ներկայացնելու նպատակով, որպես ծնող՝ կրելով իր անչափահաս դստեր՝ Վերայի դաստիարակության պարտականությունները, բռնություն գործադրելու՝ Վերային ծեծելու և տանից դուրս անելու սպառնալիքով նրան ներգրավել է հանցավոր արարքի կատարման մեջ, նրան դրդել է սուտ մատնություն կատարել»:

Անչափահաս Վերան մայրիկի դրդմամբ, նրա պահանջը չմերժելու անձնական այլ շահագրգռվածությունից ելնելով՝ 2016 թվականի դեկտեմբերի 8-ին ոստիկանության բաժնում կատարել է սուտ մատնություն, իբր՝ Սամվել Մ.-ն իրեն դպրոցի մոտից առևանգել է՝ բռնություն գործադրելով ու իր կամքին հակառակ՝ նստեցրել է անծանոթ մեքենա ու տարել է Գեղարքունիքի մարզում գտնվող իր տուն: Այնտեղ հաջորդ օրվա երեկոյան իր կամքին հակառակ՝ ձեռքերից քաշելով՝ պառկեցրել է մահճակալին ու բռնի կերպով իր հետ սեռական հարաբերություն է ունեցել՝ իրեն զրկելով կուսությունից:

Երանուհի Գ.-ին մեղադրանք էր առաջադրվել շորթման, սուտ մատնություն կատարելու, սուտ մատնություն կատարելուն դրդելու, անչափահասին հանցավոր արարքի կատարման մեջ ներգրավելու համար՝ ՀՀ քրեական օրենսգրքի 182 հոդվածի 1-ին, 165 հոդվածի 3-րդ մասերով, 333 հոդվածի 2-րդ մասի 1-ին, 38-333 հոդվածի 2-րդ մասի 1-ին կետերով:

Անչափահաս Վերա Ա.-ին մեղադրանք էր առաջադրվել սուտ մատնություն կատարելու համար՝ 333 հոդվածի 2-րդ մասի 1-ին կետով:

Մոր և դստեր խափանման միջոցը ստորագրությունն էր չհեռանալու մասին:

Երանուհի Գ.-ն առաջադրված մեղադրանքներում իրեն մեղավոր չի ճանաչել: Նա հայտնել է, որ դուստրը՝ Վերան, գիշերը զանգել ու խնդրել է գնալ իր հետևից: Ինքը զանգել է տաքսի ծառայություն: Եկել է Կարեն անունով տաքսիստը: Նա իրեն տարել է Սամվելի տուն՝ Գեղարքունիք: Երբ տեղ է հասել, աղջկա ամուսնուն ամաչել է ասել աղջկան տանելու պատճառը: Միայն ասել է, թե իր «աղջիկը նրան արժանի չէ», ու աղջկան տարել է տուն:

Ինքը Սամվելից գումար կամ մատանի չի պահանջել, ինքն իր երեխային չի ծախել…

Երբ ինքը դստերը տարել է, Սամվելը եկել է իրենց տուն, բայց ինքը հրելով նրան տանից դուրս է հանել, պահանջել է, որ նա ներկայացնի իր դստեր… սավանը: Սամվելը սավանը բերել է…

Ինքը ոստիկանությունում հաղորդում է տվել «փեսային ցավացնելու համար»: Քանի որ մատանի չի եղել, ինքը միայն բռնաբարության մասով է սուտ հաղորդում տվել, միայն այդ մասով է մեղքն ընդունում…

Անչափահաս Վերան իրեն մեղավոր է ճանաչել սուտ մատնություն կատարելու համար: Նա հայտնել է, թե սուտ հաղորդում է տվել, իբր՝ ամուսինն իրեն բռնաբարել է: Ինքն իր կամքով է ամուսնացել: Քանի որ իր կամքով էլ նրանից բաժանվել է, բնական է՝ նա պիտի նշեր, իբր ինքը կույս չի եղել… Ինքը նման մարդու հետ ցանկություն չունի համատեղ ապրելու…

Իրեն բռնաբարելու վերաբերյալ՝ կարծում է՝ «լավ է արել, որ նման ձևով է գրել», իրեն ոչ ոք չի դրդել: Երբ ամուսնանալու ժամանակ Սամվելն իրեն ցանկացել է իր տուն տանել, խոստացել է, որ մատը մատանի է դնելու, բայց մատանի չի դրել, քանի որ մատանի չի էլ ունեցել… Ինքը Սամվելից բաժանվել է այն պատճառով, որ նա իրեն մեղադրել է… կույս չլինելու համար…

Գործով տուժող ճանաչված Սամվելը հայտնել է, որ ծանոթուհու միջոցով ծանոթացել է Երանուհու և նրա դուստր Վերայի հետ: Իր եղբայրը զոհվել էր քառոօրյա պատերազմի ժամանակ, տանը մնացել էին ինքն ու քույրը: Քույրն աշխատում էր, չէր հասցնում տնային գործերն անել: Այդ պատճառով ինքը որոշել է ամուսնանալ:

Ծանոթուհին առաջարկել է իրեն ծանոթացնել լավ աղջկա հետ: Ինքը հավանություն է տվել այդ առաջարկին:

Նա զանգել է Երանուհուն, նույն առաջարկն է արել: Երանուհին չի մերժել:

Հաջորդ օրը քրոջ հետ գնացել է Երանուհու տուն, որ ծանոթանա աղջկա հետ: Մոտ կես ժամ զրուցել են: Քույրն ասել է, թե համաձայն է, որ ինքն ու Վերան ամուսնանան: Աղջկա մայրը՝ Երևանուհին էլ տվել է իր համաձայնությունը:

Մոտ քսան օր իրենք շփվել են հեռախոսով: Ինքը նորից է հարցրել Երանուհուն՝ համաձա՞յն է, որ նրա աղջկան իրենց տուն տանի: Նա համաձայնել է:

Ընկերոջ հետ գնացել են Երանուհու տուն: Երանուհին Վերայի հագուստներն իջեցրել է բակ, դրել է մեքենայի մեջ, «հաջող է արել» աղջկան: Ինքը Վերային ոսկե մատանի է նվիրել ու տարել է իրենց տուն:

Երկու օր հետո Երանուհին զանգել ու ասել է, թե աղջկան կարոտել է, ուզում է տեսնել: Ինքը Վերային տարել է մոր տուն, իրենք մնացել են Երանուհու տանը:

Առավոտյան Վերայի հետ գնացել են Մարտունի, հինգ օր մնացել են այնտեղ: Երանուհին գիշերը զանգել, Վերայի հետ խոսել է: Ինքը Վերային ասել է՝ հեռախոսն անջատի, ուշ ժամ է: Գիշերը ժամը 2-ի սահմաններում տան մուտքի դուռը թակել են: Ինքը բացել, տեսել է Երանուհին ոտքով խփում է դռանը: Նա մտել է տուն, մտել է ննջարան, հարվածել է Վերային, ապա պահանջել է, որ նա իրերը հավաքի, իրենք գնում են:

Վերան հավաքել է իրերը ու գնացել է մոր հետևից: Ինքը Երանուհուն հարցրել է՝ ո՞ւր է տանում Վերային, ի՞նչ է անում: Երանուհին ասել է՝ դուք ո՞վ եք, որ հեռախոսն անջատում եք, տանում եմ աղջկաս նորից ամուսնացնեմ:

Վերան մոր հետ նստել է տաքսի, ու հեռացել են:

Ինքը նրանց հետևից գնացել է, լուսադեմին հասել է նրանց բակ: Նորից է հարցրել Երանուհուն՝ ինչո՞ւ նման բան արեց: Նա պատասխանել է, թե Վերային նորից է ամուսնացնելու:

Հաջորդ օրը նա զանգել է իրեն ու ասել է՝ կամ 50 հազար դրամ պիտի տաս, կամ ոսկե մատանի, որ ոստիկանությունում բողոք չգրեմ: Ինքը հրաժարվել է նրա պահանջը կատարելուց:

Հետո ոստիկանությունից իրեն ասել են, որ իր դեմ բողոք կա: Ինքը ոստիկանությունում ճիշտը պատմել է:

Սկզբում ոստիկանները չեն կարողացել գտնել Երանուհուն ու Վերային: Հետո պարզվել է՝ նրանք գնացել են Գավառ: Երանուհին այնտեղ նորից ամուսնացրել է Վերային…

Դատարանը հաշվի է առել, որ Երանուհի Գ.-ի խնամքին է անչափահաս դուստրը՝ Վերան, իսկ Վերայի խնամքին է մանկահասակ երեխան…

Դատարանը Երանուհի Գ.-ին մեղավոր է ճանաչել մեղսագրված արարքների համար ու վերջին հաշվով դատապարտել է 3 տարի 8 ամիս 27 օր ազատազրկման, նրա նկատմամբ պայմանական դատապարտություն է կիրառել ու սահմանել է 2 տարի փորձաշրջան:

Վերա Ա.-ն մեղավոր է ճանաչվել, դատապարտվել է 3 ամիս ազատազրկման, նրա նկատմամբ պայմանական դատապարտություն է կիրառվել, սահմանվել է 1 տարի փորձաշրջան:

Այս թեմայով Հանրահավաքից հետո վարչապետ Փաշինյանն ընտանիքի հետ նշում է դստեր 3-ամյակը Սեքսոլոգները բացատրել են, թե ինչու են կանայք օրգազմ ձևացնում Որքան հաճախ է տղամարդը համբուրում կնոջը, այնքան․․․ Հետազոտություն Աղջիկն ունի հիանալի և պիրկ կուրծք, որովհետև պահպանում է հետևյալ կանոնները 10 զզվելի բաներ, որ անում է աղջիկների 99%-ը, բայց չի խոստովանում