«Ծառուկյան» դաշինքը առաջարկել է՝ հողագործներին ազատել հարկերից

Առաջարկվում է ֆերմերների կողմից հարկերի վճարման նվազեցմանն ուղղված լրացումներ կատարել Հայաստանի Հանրապետության Հարկային օրենսգրքում: Այս մասին հունվարի 11-ին տնտեսական հարցերով մշտական խորհրդարանական հանձնաժողովի նիստին հայտարարել է «Ծառուկյան» դաշինքի խորհրդարանական խմբակցության քարտուղար Վահե Էնֆիաջյանը:

Նրա խոսքով՝ եթե բնական աղետների հետեւանքով, ինչպիսիք են կարկուտը, սառնամանիքները եւ այլն, գյուղատնտեսական արտադրանք արտադրող ֆերմերները 40 տոկոսից ավելի էական կորուստներ ունենան, պետությունը պետք է ընդառաջ գնա նրանց եւ կոնկրետ տարում ազատի հարկերից:

«Մենք գիտենք, որ գյուղատնտեսական արտադրությամբ զբաղվող գյուղացիների զգալի մասը արտադրության զարգացման նպատակով դիմում է բանկերին՝ վարկերի ձեռքբերման համար: Մինչդեռ հասցված վնասների պատճառով նրանք թաղվում են պարտքերի մեջ եւ չեն կարող շարունակել իրենց գործունեությունը»,- բացատրել է Էնֆիաջյանը` առաջարկելով այդ քաղաքացիներին համապատասխան աջակցություն ցուցաբերել պետական մակարդակով:

Հանձնաժողովի նախագահ, Հայաստանի իշխող Հանրապետական կուսակցության պատգամավոր Խոսրով Հարությունյանը իր հերթին նշել է, որ այդպիսի աջակցությունը հնարավոր չէ, քանի որ դա կարող է հանգեցնել գյուղական համայնքների բյուջեների լուրջ կրճատման:

Չնայած տնտեսական հարցերով հանձնաժողովի բացասական եզրակացությանը՝ «Ծառուկյան» դաշինքը օրինագիծը կներկայացնի խորհրդարանի քննարկմանը:

Այս թեմայով Վարչապետի կասկածելի հանձնարարականը «Վսյո, բացառվում ա. ներում այլևս չի լինելու». Վարչապետն զգուշացրեց գյուղացիներին