«Հին արքաները» «Ֆուլ հաուսին» հավասար բարձր ռեյթինգ է ունեցել

Tert.am Life–ն իր ընթերցողներին պատմել է, որ «Հին արքաներ» պատմական հեռուստաֆիլմը հունվարի 8–ից ցուցադրվում է Արմենիա TV–ով։ Ժան Նշանյանի, Մուրադ Ջանիբեկյանի, Ռուբեն Մուրադյանի, Շողեր Թովմասյանի, Արման Նշանյանի, Շաքե Թուխմանյանի, Աննա Գրիգորյանի և այլ դերասանների մասնակցությամբ հեռուստաֆիլմը ցուցադրման առաջին օրերից բարձր վարկանիշ է ունեցել։

«Արմենիա TV»–ի գլխավոր պրոդյուսեր Ռուբեն Մխիթարյանը Tert.am Life–ի հետ զրույցում ասաց, որ այսպիսի վարկանիշը կոտրում է կարծրատիպը, թե որակյալ հեռուստաարտադրանքը սպառող չի ունենում։

«Սա այն էքսպերիմետն էր, որին «Արմենիա TV»–ն գնաց` ներդնելով ֆինանասական մեծ միջոցներ։ Մենք ուզում էինք մեր հեռուստադիտողներին ցույց տալ նախագիծ, որն ունի թե՛ գեղարվեստական արժեք, թե՛ պատմական է, թե՛ դաստիարակչական։ Առաջին 3 սերիաների վարկանիշը գալիս է փաստելու, որ հեռուստադիտողը չի նախընտրում միայն այլ երկրների արտադրանք»,– ասաց պրն Մխիթարյանը։

Պրոդյուսերը կարևորեց, որ հեռուստադիտողների 35-40 տոկոսը դարձել է «Հին արքաների» կայուն լսարանը։ «Սա ահռելի ցուցանիշ է։ «Հին արքաները» բացարձակ հավասար վարկանիշ ունի «Ֆուլ հաուսին», «Չեմպիոնների լիգայի» եզրափակիչ խաղին և այլն։ Մենք մտածում էինք, որ ռեյթինգը բարձր կլինի, սակայն մեզ համար այս ժանրի հեռուստասերիալը պետք է ունենար մոտ 18-20 տոկոս լսարան։ Դա մենք կհամարեինք  հաջողություն, որովհետև «Հին արքաները» առանձնահատկություններ ունի` լեզուն տարբերվող է, մարդիկ սովոր չեն նման բան նայելու։ Այն հավաքեց կրկնակի լսարան` ևս մի անգամ փաստելով, որ մեր հեռուստադիտողը կարողանում է գնահատել որակյալ արտադրանքը։ Կարևոր փաստ է, որ վարկանիշը հաստատուն է։ Որքան էլ դու անոնս անես նախագիծը, անոնսն աշխատում է մինչև առաջին սերիայի եթեր գնալը։ Որքան ուզում ես ասա, որ որակյալ աշխատանք ես արել, առաջին սերիայից հետո աշխատում է ոչ թե ծանուցումը, այլ հեռուստադիտողի կարծիքը։ Եթե բարձր վարկանիշը հաստատուն է, ուրեմն իրոք որակյալ աշխատանք ենք արել»,– նշեց նա։

Ռուբեն Մխիթարյանը հայտնեց, որ այսօրինակ նախագծերը «Արմենիա TV»–ի եթերում շարունակական են լինելու։ «Մեզ համար որոշել ենք, որ սա շարունակական է լինելու։ Այս օրերին  բազմաթիվ արձագանքներ ենք ստանում, «Արմենիա TV»–ի ընդունարանի հեռախոսը չի լռում։ Մարդիկ հարցում են կրկնության ժամը կամ արդյոք հնարավոր է ավելի շուտ տեսնել` ինչպես է վերջանալու սերիալը։ Ասում ենք, որ Ucom ցանցում գործող «Արմենիա Պրեմիում» հեռուստաալիքի տեսավարձույթ բաժնում կան բոլոր սերիաները, սակայն եթե չունեք դրա հնարավորությունը, «Արմենիայի» եթերում դիտեք մյուս 12 սերիաները»,– եզրափակեց պրոդյուսերը։