Ո՞ր ապրանքներն են էժանացել Հայաստանում

«Ծառուկյան» խմբակցության պատգամավոր Իվետա Տոնոյանը ԱԺ-Կառավարություն հարցուպատասխանի ժամանակ անդրադարձավ ԱԺ-ում վարչապետի մատնանշած ԱՎԾ տվյալներին, թե գնաճը 2,6% է եղել ու սարսափելի չէ:

«Առանձին ապրանքներ թանկացել են 40%-ով, 30%-ով, միգուցե դա ձեզ համար սարսափելի չէ, բայց սարսափելի է, մարդիկ գոյատևելու համար վարկեր են վերցնում»,-ասաց նա:

Տոնոյանը նշեց, թե մեկ շաբաթ է անցել նախագահի հանձնարարականից՝ ուսումնասիրել իրավիճակը և լուծումներ գտնել, ապա հարցրեց, թե ինչ է արձանագրվել, կան արդյոք տնտեսվարողներ, ովքեր անձնական գրպանների համար հարստահարել են ժողովրդին:

Հարցին պատասխանեց փոխվարչապետ Վաչե Գաբրիելյանը, ով նշեց, որ արձանագրված 2,6% գնաճը վերաբերում է սպառողական զամբյուղին, որն ընդգրկում է լայն սպառման առարկաներ և արտացոլում է հասարակության սպառումը:

«Անգամ այս պայմաններում, երբ ունենք առանձին ապրանքների գնաճ, որը ոչ ցանկալի արդյունք է, միաժամանակ ունենք մի շարք ապրանքների մասով նվազում, որի արդյունքում էլ գրանցվել է 2,6%: Քաղաքականությունը տարվում է ընդհանուր մակրոտնտեսական տրամաբանությամբ»,-ասաց նա և թվարկեց առաջին անհրաժեշտության ապրանքներ, որոնց գները նվազել են:

«Հավի թարմ մսի գինը 22%-ով նվազել է, ձեթը՝ 5%ով, բարձր տեսակի ալյուրը՝ 6%-ով, ոսպը՝ 37, հնդկաձավարը՝ 52, թթվասերը՝ 4%: Սրանք ևս լայն տեսակի սպառման ապրանքներ են, որոնք հակակշռվելով՝ ստանում ենք այդ 2,6%-ը»,-ասաց նա:

Ինչ վերաբերում է նախագահի հանձնարարականներին, ապա Վաչե Գաբրիելյանը նշեց, թե ունեին գործողություններ, որոնք անմիջապես պետք է կատարվեին, և հանձնարարականներ, որոնք պետք է մշակվեին երկար ժամանակի համար: Ըստ փոխվարչապետի՝ մշտադիտարկումներ են արել դիզվառելիքի, սեղմված գազի և բենզինի շուկայում: Մոնիտորինգի արդյունքում պարզվել է, որ որևէ ավել բարձրացում, քան նախատեսվածն էր, չի գրանցվել: «Բոլոր ԱԳԼՃԿ-ներում ստուգումներ են արվել և 7-ում է 210-ի փոխարեն 220 դրամ եղել, որը փոխանցվել և շտկվել է: Մնացած միջոցառումները ավելի երկարատև քննարկումների արդյունք պետք է լինեն, որը կներկայացվի»,-ասաց նա:

Այս թեմայով Կարագն էլի թանկացավ. որ ապրանքներն են էժանացել Ազգային անվտանգության դեկորատիվ սպառնալիքը «Խոզի միս չկա՝ սխտոր կերեք. գիտեք ինչ օգտակար է». Նիկոլ Փաշինյանը հեգնեց իշխանություններին. ՏԵՍԱՆՅՈՒԹ Թանկացումների հարցը ԱԺ-ում է. ուղիղ միացում Սերժ Սարգսյանի մոտ քննարկել է թանկացումների հարցը