«Վառելիքս» վերջացել էր». Էմմա Ասատրյանը նորություն ունի

Հունվարի 25-ին՝ Հայաստանի երգի պետական թատրոնում, երգչուհի, երգահան Էմմա Ասատրյանն առաջին անգամ մեծածավալ մենահամերգով հանդես կգա, որի հատուկ հյուրերն են Ֆորշն ու Միքայել Ոսկանյանը:

«Նախկինում փոքրիկ մենահամերգներ ունեցել եմ թե այստեղ, թե Ավստրիայում, որտեղ սովորել եմ, սակայն նման մասշտաբի, երկու ծրագրով առաջին անգամ եմ ներկայանալու: Առաջին բաժնում կլինեն միայն իմ հեղինակած երգերը, որոնք ծանոթ են հանդիսատեսին տեսահոլովակների տեսքով, իսկ համերգին դրանք կհնչեն կենդանի նվագակցությամբ ու քիչ թե շատ՝ նորովի: Իսկ համերգի երկրորդ բաժնում կհնչեն մի քանի ջազային ստեղծագործություններ: Մեծ սիրով ուզում եմ նշել, որ որպես հատուկ հյուրեր բեմում իմ կողքին կլինեն Ֆորշը, ում հետ զուգերգ ունենք, որը զետեղվել է նրա ձայնասկավառակում, և Միքայել Ոսկանյանը, ում հետ վաղուց էի ուզում հանդես գալ որևէ գործով: Ինձ հետ բեմում կլինի նաև ամուսինս՝ Էմանուել Հովհաննիսյանը, ով պնդեց, որ ոչ մի տեղ չնշեմ նրա անունը»,-Life.panorama.am-ին պատմեց Էմման:

Խոսելով մենահամերգի նախապատական աշխատանքների մասին՝ երգչուհին ասաց. «Ամուսինս մեր ծանոթության առաջին իսկ օրից ինձ ժամանակ առ ժամանակ հարցնում էր, թե ինչու համերգով չեմ ներկայանում, բայց ես միշտ զարմացած հարցնում էի՝ ինչո՞ւ, ի՞նչ կարիք կա: Հետո համերգները մեր երկրում գնալով անկում են ապրում, և ինձ համար էլ կարծես ինչ-որ մի բան կասկածի պատճառ էր դառնում: Հետո ես սովորություն ունեմ՝ իմ յուրաքանչյուր տեսահոլովակից հետո մեկ տարի դադար եմ վերցնում, բայց իմ հերթական տեսահոլովակից հետո ամուսնացա, հետո որդիս ծնվեց, իմ ողջ ուշադրությունը նրան նվիրեցի, հետո դասախոսական գործունեությունս ինձնից մեծ կենտրոնացում պահանջեց, արդյունքում դադարս տարիներ տևեց: Ժամանակի ընթացքում ասես վառելիքս վերջացել էր, չէի ուզում որևէ գործով հանդես գալ, հետո կրկին Էմանուելը առաջարկեց, որ երգեմ, արդյունքում եկանք և հասանք այս կետին: Ի դեպ՝ հատուկ պետք է նշեմ մեր հրաշալի երաժիշտներին, առանց որոնց ես պարզապես ինձ չէի պատկերացնի բեմում: Ես խոնարհվում եմ նրանց առջև, առանց նրանց այս ամենը չէր լինի»,- պատմեց երգչուհին:

Երկարատև դադարից հետո Էմման խոստովանեց, որ մեծ հուզմունք ու պատասխանատվություն է զգում: «Պատասխանատվությունը անչափ մեծ է: Ես այնպիսի արտիստ չեմ, ում համերգի տոմսերը անմիջապես վաճառվեն, ում ամեն համերգի կտեսնեն, բայց մեծ ուրախությամբ եմ ասում, որ անգամ թատրոնի աշխատակիցներն են նշում, որ տոմսերի մեծ մասը 20 օր առաջ ավարտվել են: Մարդկանց ոգևորությունն ինձ կրկնակի ուժ ու պատասխանատվություն է հաղորդում: Աստված առաջ, հույս ունեմ, որ հուսախաբ չեմ անի մարդկանց»,- նկատեց նա:

Հարցին՝ ինչո՞ւ է ընտրել Երգի պետական թատրոնի բեմը, Էմման պատասխանեց. «Նախ պետք է ասեմ, որ ես միշտ վստահ եմ եղել՝ իմ առաջին մենահամերգը պետք է հենց իմ հարազատ թատրոնում լիներ, այլ կերպ պարզապես հնարավոր չէր: Բացի այդ, չեմ կարծում, որ շատ մեծ դահլիճում կկարողանային մենահամերգ իրականացնել: Հույս ունեմ, որ ապագայում դա էլ ինձ կհաջողվի»:

Այդ օրը Էմմա Ասատրյանը նաև պարելու է: Երգչուհին համագործակցում է «A.Era» պարախմբի հետ: Իր խոսքով՝ ամեն օր հաճախում է պարի լավ արդյունքի հասնելու համար:

Հարցին, թե սպասված մենահամերգին որդին՝ փոքրիկ Անրին, հանդիսատեսի շարքում կլինի՞, երջանիկ մայրիկը պատասխանեց. «Բոլորն այդ մասին են հարցնում, բայց ես մշտապես նույն պատասխանն եմ տալիս՝ «Եթե ուզում եք համերգը կեսից ավարտվի, ուրեմն Անրիին կբերեմ»: Բանն այնն է, որ տղաս շատ չարաճճի է, նա կարող է հանկարծ որոշել, որ ձեռքս պետք է բռնի ու խնդրի, որ տուն գնանք: Այդ օրը հնչելու է երեք երգի պրեմիերա, որոնցից մեկը օրորոցային է և նրան ու եղբորս է նվիրված: Ի դեպ, փոքրիկ եղբայրս հանդիսատեսի շարքում կլինի, հուսամ մյուս տարի ևս նման համերգ կունենամ և տղաս արդեն ներկա կլինի»:

Ի դեպ՝ Էմման նշեց, որ մենահամերգին հանդիսատեսի շրջանում հարցում կանցկացնի, թե երեք պրեմիերաներից, ո՞րը կցանկանան տեսահոլովակով տեսնել, ինչն էլ կհուշի, թե երգչուհին առաջիկայում, որ երգի հիման վրա տեսահոլովակ կնկարահանի:

Այս թեմայով «Չեմ ուզում խոսեն, թե իրենք են հրաժարվել համագործակցել ինձ հետ». Էլեն Ասատրյանը Հայաստանը չի ներկայացնի «Ամեն վատ արարք բարդել են ինձ վրա». Էլեն Ասատրյանն անկեղծանում է «Անգամ լաց եմ եղել»․ Էլեն Ասատրյանն անկեղծանում է Էմմա Մանուկյանը՝ իր երազանքի ու մարդկանց՝ թատրոն հաճախելու մասին Էմմա Մանուկյանը բացահայտել է՝ որոնք են կնոջ լավագույն հատկանիշները / լուսանկարներ