Թուրքիան վախենալու հիմքեր ունի

Լրագիր |

Հայաստանի արտաքին գործերի նախկին փոխնախարար, դեսպան Արման Նավասարդյանը կարծում է, որ ԱՄՆ վերջնական նպատակը ռազմական գործողությունները Սիրիայից Թուրքիայի տարածք տեղափոխելն ու երկրի մասնատումն է: Դեսպանն այդ մասին խոսել է՝ մեկնաբանելով Վաշինգտոնի դիրքորոշումը Սիրիայի քրդերի դեմ թուրքական ուժերի գործողությունը:
Պենտագոնի ղեկավար Ջեյմս Մեթիսը նշել է, որ Թուրքիան վախենալու բան ունի: Նա ընդգծել է, որ «անվտանգության հարցերում Անկարայի մտահոգությունը հիմնավոր է»: ԱՄՆ-ն փաստացի «հասկանում է», որ Թուրքիային վտանգ է սպառնում քրդերից:
Թուրքիան ԱՄՆ-ին տեղյակ է պահել Վաշինգտոնից աջակցություն ստացող քրդական ջոկատներին հարվածելու մասին, հայտնել է Ջեյմս Մեթիսը: Նա սակայն չի նշել, թե արդյոք ամերիկացի զինվորականները թուրքերին խորհուրդ են տվել չիրականացնել մտադրությունը:
Ընդ որում, Մեթիսը նշել է, որ Սիրիայում քրդական ջոկատներն ապացուցել են իրենց արդյունավետությունը: «Նրանք մարդկային հազարավոր կորուստներ են ունեցել, սակայն... կոալիցիայի աջակցությամբ ջախջախել են ԻՊ խալիֆայությունը, եւ սա թվաբանության հարց է», ասել է նա:
Պենտագոնի ղեկավարը ասել է սակայն, որ ԻՊ դեմ պայքարում հաջողությունը չի նպաստել Թուրքիային անհանգստացնող բազմաթիվ հանգամանքների վերացմանը: Նա նշել է, որ դժվար չէ հասկանալ՝ Անկարան վախենում է, որ կոնֆլիկտը կտարածվի Սիրիայի սահմանից դուրս:
Թուրքիան կկարողանա՞ այնպես անել, որ հակամարտությունը Սիրիայի սահմաններից դուրս չգա: Այս հարցը, թերեւս, մտահոգում է տարածաշրջանի բոլոր դերակատարներին: Վաշինգտոնը, ճանաչելով Թուրքիայի անհանգստանալու «իրավունքը», միեւնույն ժամանակ չի հայտարարում քրդերին աջակցությունը դադարեցնելու մասին եւ «երաշխիք» չի տալիս, որ հակամարտությունը չի տարածվի Թուրքիայում:
Ռուսաստանի դիրքորոշումը նույնպես միանշանակ չէ. Սերգեյ Լավրովն ԱՄՆ-ին մեղադրել է Սիրիայի քրդերին «անկանոն զինելու» մեջ, միեւնույն ժամանակ Ռուսաստանն իր զորքերը դուրս է բերել մարտական գործողությունների շրջանից՝ կարծես թե թույլ տալով Թուքիային ավելի խրվել Սիրիայում:
Այսօր ԱՄՆ փոխնախագահ Մայք Փենսն սկսել է մերձավորարեւելյան շրջագայությունը: Նա նախ կայցելի Իսրայել: Թուրքիան շրջագայությունում չկա, սակայն ակնհայտ է, որ Փենսը պետք է ԱՄՆ դիրքորոշումը ներկայացնի Սիրիայում Թուրքիայի գործողության նկատմամբ: Հիշեցնենք, որ ավելի վաղ Փենսը հայտարարել է, որ ԱՄՆ-ն պաշտպանելու է Մերձավոր Արեւելքի քրիստոնյա փոքրամասնություններին:

Այս թեմայով Հայաստանի պաշտպանությունն ու հզորացումը՝ Հայաստան-Ռուսաստան-Իրան Ռազմաքաղաքական նո՛ր Դաշինքի մեջ. Խաչիկ Ասրյան Անկարան կրկին «դաշույն խրեց» Մոսկվայի մեջքին Մոսկվան նոր հարված ստացավ «Մեզ Թուրքիայի հետ է պետք հարաբերություն կարգավորել»․ Արթուր Դանիելյան Հարված Ռուսաստանին ու Թուրքիային. Իրանի զգուշացումը Բաքվում