«Շատ եմ սիրում երգս. այն արժանի է «Եվրատեսիլին»». Ամալիյա Մարգարյանը` արձագանքների մասին

Tert.am Life–ը շարունակում է ներկայացնել «Դեպի Եվրատեսիլ» նախագծի մասնակիցներին։ Երիտասարդ երգչուհի Ամալիյա Մարգարյանին լսարանը կարող է հիշել ուկրաինական X Factor և «Ռուսաստանի ձայնը» նախագծերից։ Հիմա Ամալիյան ներկայացված է «Դեպի Եվրատեսիլ» նախագծում։ Նա պայքարում է հաղթանակի համար  Waiting For The Sun երգով, որի համահեղինակներն ինքն ու Վահրամ Յանիկյանն են։

Ամալիյան նախորդ տարի ևս մասնակցել է «Դեպի Եվրատեսիլին», սակայն երրորդ փուլից դուրս է մնացել։ «Այս տարի ևս որոշեցի մասնակցել, քանի որ ձևաչափն է փոխվել` մենք մեր երգերով ենք ներկայանում։ Բացի այդ, նախորդ տարի այնքան էլ ինքավստահ չէի, այս տարի ավելի վստահ եմ դարձել»,– ասաց նա ու հավելեց, որ նախորդ տարի իրեն փորձել է տարբեր ոճերում։ Այս տարի ներկայանում է իրեն հոգեհազաատ ոճում։

Երիտասարդ երգչուհին կարևորում է կատարումը։ Ասում է` ինքն ավելի զգացմունքային երգ է ներկայացրել, քանի որ հենց այսպիսի երգեր է կարողանում հասցնել մարդկանց. «Յուրաքանչյուր կատարող պետք է իրեն համապատասխան երգ ներկայացնի։ Դու կարող ես համոզիչ լինել քո կերպարի մեջ։ Պետք է լավ ներկայանաս քո ոճի մեջ»։

Երգչուհին ասաց, որ «Դեպի Եվրատեսիլի» բեմում կներկայանա իր երգին հաապատասխան շոուով, սակայն այդ մասին բացահայտումներ անել չցանկացավ։

«Երգը գրել ենք շատ էմոցիոնալ վիճակում։ Մենք ունեինք երաժշտությունը, սակայն երկար ժամանակ խոսքերը չէինք գրում. մոտ 3 ամիս թեմայի փնտրտուքների մեջ էինք։ Այս տարի ԱՄՆ–ում փոթորիկներ եղան, մարդիկ տուժեցին։ Երբ իմացանք այդ մասին, ստուդիայում էինք, այդ տպավորությունների մեջ մոտ 10 րոպեում շարադրեցինք խոսքերը։ Երգն այն մասին է, որ մարդիկ կորցնում են իրենց տները, իրենց հույսը, իրենց լույսը, սակայն գիշերվանից հետո միշտ գալիս է առավոտ։ Ես գուցե չեմ բախվել աղետների, սակայն այս բառերը կարելի է այլ իրավիճակի էլ վերագրել ու վերապրել»,– ասաց նա։

Թեև Ամալիյան կարևորում է հաղթանակը «Դեպի Եվրատեսիլում», ասում է` չհաղթելու դեպքում շատ չի հիասթափվի։ «Ես շատ մեծ աշխատանք եմ տանում, որպեսզի իմ ելույթը համոզիչ լինի։ Ինձ համար շատ կարևոր է հաղթանակը։ Ես իմ երգը շատ եմ սիրում և համարում եմ, որ իմ երգն արժանի է ներկայանալու, սակայն եթե ես չհաղթեմ, շատ մեծ  հիասթափություն չի լինի։ Կարծում եմ` շատ արժանի մրցակիցներ և երգեր կան։ Ի վերջո, մենք Հայաստանն ենք ներկայացնում, եթե հաղթողը լինի ինձանից ավելի լավը, ես դա կընդունեմ։ Քանի որ երգի թեման գլոբալ ստացվեց, ես ուզում եմ հանրությունը լսի այս երգը։ Երեկ նամակ էի ստացել մի հունգարացու կողմից, որը կույր է։ Նա գրել էր, որ գրանցված չէ սոցիալական ցանցերում, նամակն էլ անձամբ չի գրում, սակայն շատ էր ցանկանում արտահայտել իր հիացմունքը։ Միգուցե,  իմ երգն այդ մի մարդուն է հասել, սակայն ես ինձ համարում եմ լսված»,– ասաց երգչուհին։

Թե որոնք է համարում այն արժանի երգերը, որոնց հաղթանակի դեպքում չի սրտնեղի, Ամալիյան նշել չցանկացավ։ «Մենք` 20 կատարողներս, արդեն ընտրվել ենք, և ես յուրաքանչյուր երգ լսելիս մտածում էի` ինչ հետաքրքիր միտք է։ Ես չեմ ունեցել այս միտքը, ինչու չեմ ունեցել։ Յուրաքանչյուր երգ իր մեջ «իզյումինկա» ունի»,– դիվանագիտորեն պատասխանեց երգչուհին։

«Եվրատեսիլի» ֆան էջերի քվեարկությունների ժամանակ Ամալիյան առաջատար դիրքեր չի զբաղեցնում։ Մասնակիցներից ոմանք իրենց ընկերներին պարբերաբար կոչ են անում քվեարկել։ Երգչուհին այս առումով լուռ է։ «Ինչ–որ առումով դա սկզբունքային եմ համարում։ Ես իմ հարազատներ կարծիքը երգիս մասին արդեն գիտեմ։ Ուզում եմ հասկանալ` մարդիկ իսկապե՞ս հավանում են իմ երգը, թե՞ ոչ։ Ես չեմ ուզում պարտադրել, որ ինձ սատարեն։ Այդպես չեմ հասկանա, թե իմ աշխատանքն ինչպես է գնահատվում մարդկանց կողմից»,– նշեց նա։