Արտյոմ Կարապետյանի հուզիչ հանդիպումը ծնողների հետ 18 տարի անց, ու նրանց ծանոթությունը հարսի` Յուլյա Ֆինկի հետ. ընտանիքի վերամիավորման ամերիկյան պատմությունը

Հեռուստամեկնաբան Արտյոմ Կարապետյանը կնոջ` դերասանուհի Յուլյա Ֆինկի հետ օրերս է վերադարձել ԱՄՆ–ից, որտեղ նրանք առաջին անգամ էին։ Սա այն ճամփորդական փաթեթն էր, որն Արտյոմը նվիրել էր Յուլյայի տարեդարձին։ Արտյոմին և Յուլյային ԱՄՆ էր տարել ոչ միայն տուրիստական հետաքրքրասիրությունը։ 18 տարվա ընդմիջումից հետո հաղորդավարը հանդիպել է իր ծնողներին և, վերջապես, ծանոթացրել կնոջ` Յուլյայի հետ։

Tert.am Life–ի հետ զրույցում Արտյոմը պատմել է զգացմունքային հանդիպման և երազանքների երկիր համարվող Ամերիկան բացահայտելու մասին։

«Շատ հուզիչ, ես կասեի` պատմական հանդիպում էր։ Երբ նոր ես բաժանվում, սկզբում շատ ես կարոտում, հետո կարոտում ես, իսկ հետո գալիս է մի շրջան, երբ կարոտում ես, սակայն չես զգում դա։ Սովորում ես այդ կարոտին։ Թվում է` նույնիսկ կարող ես ապրել այդպես, սակայն երբ կայանում է հանդիպումը, հասկանում ես, որ այդպես չէ։ Հանդիպումից հետո ավելի դժվար է։ Ես չեմ կարող նկարագրել` ինչ զգացողություններ եմ ունեցել։ Ինձ թվում էր` շատ բան է փոխվել. ես կարծում էի` իրենք են փոխվել, իրենց թվում էր` ես եմ փոխվել, սակայն ընդամենը մի քանի ժամ անց, տպավորություն էր, որ չենք ունեցել այդ տարիների բաժանումը»,– պատմեց  նա։

Խոսելով ծնողների հետ կնոջ ծանոթության մասին` Արտյոմն ասաց, որ սա նրանց առաջին հանդիպումն էր, մինչև այդ հեռախոսով էին շփվել։ «Յուլյան մի քիչ մտավախություն ուներ, որ ավելի շատ ինձ են սպասում, ավելի շատ ինձ ուշադրություն կդարձնեն, սակայն այդպես չեղավ։ Իհարկե, ավելի շատ ինձ էին սպասում, սակայն իրենց հանդիպումն էլ էր շատ կարևոր ու հետաքրքիր։ Տպավորություն էր` ճանաչում են իրար, միանգամից մերվեցին։ Օտարություն չզգացին ո՛չ ծնողներս, ո՛չ Յուլյան,– պատմեց Արտյոմն ու հավելեց, որ մինչև  հրաժեշտը շատ ջերմ հարաբերություններ էին ձևավորվել կնոջ ու ծնողների միջև,– Նրանք հրաժեշտ տվեցին Յուլիային արդեն որպես դստեր, հարազատ մարդու։ Եթե սկզբում կար այն զգացողությունը, որ ես ավելի հարազատ էի, վերադառնալիս այդ զգացողությունը  չկար։ Ձևավորվել էր մեծ ընտանիքի զգացողությունը»։

Արտյոմը չի մտածում ԱՄՆ–ում ապրելու մասին։ Ասում է` Հայաստանում կայացել է և չի ցանկանա լքել երկիրը։ «Իմ ընտանիքը, լինելով ԱՄՆ–ում, երբեք չի ցանկացել, որ մենք էլ գնանք։ Երբ նրանք գնացին, ես արդեն ունեի իմ մասնագիտությունը, փորձում էի կայանալ լրագրության դաշտում, հայկական հեռուստատեսությունում։ Իրենք, հեռվից հետևելով այդ ամենին և ուրախանալով իմ հաջողություններով, չցանկացան, որ ես թողնեմ այդ ամենը և գնամ»,– նկատեց նա։

Ինչ վերաբերում է ԱՄՆ–ից ստացած տպավորություններին` հաղորդավարն ասաց, որ այն, իսկապես, երազանքների երկիր է. «Գուցե պրագմատիկ մարդիկ ասեն, որ դա միֆ է, սակայն նույնիսկ օդի մեջ կա այդ զգացողությունը, որ այնտեղ ապրելով` քո ամենանվիրական երազանքը մի օր կարող է իրականանալ։ Գուցե, դա ազդեցության ուժն է, բայց այդ տպավորությունը կա»։

Արտյոմն ԱՄՆ–ն ուսումնասիրել է նաև լրագրողական աչքով, որսացել հետաքրքիր շփումներ և բացահայտումներ արել իր համար։ Ասում է` իրեն տպավորել են և՛ երկիրը, և՛ կյանքի ռիթմը, և՛ մարդկանց կենսափիլիսոփայությունը։ «Ամենատպավորիչն ազատության զգացողությունն էր։ Կաշկանդում են միայն օրենքները, որովհետև մենք սովոր չենք օրինապահության, չնայած, վերջին 3 տարիների ընթացքում այս առումով Հայաստանում էլ են մարդիկ բավականին փոխվել։ Կարևոր է, որ դու ունես ընտրություն և կարող ես ընտրել։ Դու կարող ես լավ ապրել, կարող ես` միջին ապրել։ Իհարկե, ամենուր ամեն ինչ քեզանից է կախված, սակայն հարց է, թե ինչ մասշտաբներով»,– նկատեց նա։

Հեռուստամեկնաբանը եղել է Կալիֆորնիայի UCLA համալսարանում, որը համարվում է ԱՄՆ–ի տասը լավագույն համալսարաններից մեկը. «Այն, թերևս, ամենաշատն է տպավորվել։ Այն, ինչ տեսա համալսարանի տարածքում, ներսում և ուսանողական հարթակում, ցանկություն առաջացրեց  նորից հայտնվելու ուսանողի կարգավիճակում»։

ԱՄՆ–ում վառ տպավորությունների պակաս ամուսինները չեն ունեցել։ Արտյոմին և Յուլյային շատ է դուր եկել այցելությունը Universal Studios. «Վերջերս բացված ատրակցիոններից մեկը` Հարրի Փոթերը, փոքր քաղաք էր քաղաքի մեջ և իրական հեքիաթ։ Հետաքրքիր է, որ մենք, լինելով հասուն մարդիկ, մեզ երեխա էինք զգում»։ Հաղորդավարը նկատեց, որ ԱՄՆ–ում էին Ամանորին, երբ երկրում ստեղծված էր հեքիաթային շունչը, ինչն ավելի տպավորիչ էր։

Եվս մեկ խենթ օր ամուսիններն ունեցել են Լաս Վեգասում. «Այնտեղ իրական ցնծության, խաղային անվերահսկելի ազարտի, ազատության ու լիցքաթափման իրական զգացողություն էր, որը թույլ է տալիս ազատվել կուտակված նեգատիվից։ Այնտեղ նաև դիտեցինք "O" Cirque du Soleil շոուն։ Այն ևս շատ տպավորիչ էր»։

Ամուսիները դեռ կվերադառնան ԱՄՆ, քանի որ երկիրը մեծ է, բացահայտումներ անելու տեղ միշտ կա, սակայն իրենց ապագան տեսնում են Հայաստանում։