«Ցենտր ենք». երրորդմասցի Լյովիկի սպանության գործով նիստը չկայացավ

Հասարակություն 31 Հունվար, 2018 0:20

«Երրորդմասցի Լյովիկի» եւ 2 ընկերների սպանության գործով դատական նիստն այսօր՝ հունվարի 30-ին, տեղի չունեցավ: Երեւան քաղաքի ընդհանուր իրավասության դատարանի Էրեբունի եւ Նուբարաշեն վարչական շրջանների նստավայրում տեղի ունեցող դատական նիստին չէին ներկայացել ամբաստանյալների պաշտպաններն ու տուժող կողմի իրավահաջորդի ներկայացուցիչը: Ամբաստանյալների շահերի պաշտպաններ Լուսինե Սահակյանն ու Երվանդ Վարոսյանը դատարան դիմում էին ուղարկել, որով տեղեկացրել էին, որ երկրում չեն եւ չեն կարող ներկայանալ դատական նիստին: Տուժողի իրավահաջորդի ներկայացուցիչ Երեմ Սարգսյանն էլ տեղեկացրել էր, որ դատական նիստին չի կարող ներկայանալ մեկ այլ նիստի ծանրաբեռնվածության պատճառով:

Դատավոր Արտուշ Գաբրիելյանը ամբաստանյալներից հետաքրքվեց՝ արդյոք ցանկանում են նիստը շարունակել առանց իրենց պաշտպանների, որին Վահան Հակոբյանը «Գաստիկը» պատասխանեց՝ «Չէ, հարգելի դատարան, որ չկան, ո՞նց շարունակենք...»:

Նիստի մեկնարկին երբ ամբաստանյալները դատական նիստերի դահլիճ բերվեցին, նրանց ընկերները հետաքրքրվեցին նրանց որպիսությամբ, հարցին՝ «Տղերք, ո՞նց եք» , ամբաստանյալներից Սարգիս Հախանումյանը «Տլեն» պատասխանեց՝ «Ցենտր ենք, ախպերս»:

Այս գործով հաջորդ դատական նիստը տեղի կունենա փետրվարի 6-ին՝ Երեւան քաղաքի ընդհանուր իրավասության դատարանի Ավան եւ Նոր Նորք վարչական շրջանների նստավայրում:

Ըստ մեղադրական եզրակացության՝ Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը («Ծգլ») նախնական համաձայնությամբ ապօրինի ձեռք են բերել եւ պահել զենք:

2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են: