Կարգին Հայկոն վերադառնում է եթեր

3-4 տարվա հեռուստատեսային դադարից հետո «Կարգին» թիմը վերադառնում է եթեր։ Հոկտեմբերի 31-ից «Ucom»-ի ցանցում գործող «Արմենիա Պրեմիում» հեռուստաալիքի եթերում կմեկնարկի «Ազիզյանները» նոր սիթքոմը։ ԲլոգNews-ը ներկայացրել է նոր նախագծի մանրամասները։

«Վերադարձս կապված էր ոչ թե կերպարի կամ ստեղծագործական պարամետրերի, այլ ֆինանսական մասի հետ։ Ֆինանսական մասը կարևոր էր այնքանով, որ ստանանք բարձր որակ։ Մենք ուզում էինք պատշաճ տաղավար, տեխնիկա... Ի վերջո, ստացվեց պայմանավորվել և այս պահին ունենք մեզ բավարարող որակ։ Մենք կփորձենք այդ ամբողջ բազայի վրա ստեղծել որակյալ պրոդուկտ, որը, հուսով եմ, դուր կգա հեռուստադիտողներին»,- ասաց Հայկը ու հավելեց, որ սա ընտանեկան սիթքոմ է։

«Ազիզյանները» սիթքոմում Հայկը մարմնավորում է Գառնիկ Ազիզյանին, ով հագուստի խանութի վաճառող է, ընտանիքում միակ աշխատողը: Տիկին Ազիզյանը ծուլանում է կատարել անգամ տնային տնտեսուհու պարտականությունները: Երեք երեխաներին էլ հոր խնդիրները չեն հետաքրքրում. դուստրը ցանցաբնակ է, ակտիվ բոլոր սոցցանցերում, ավագ որդին անհաջողակ գործազուրկ է, իսկ կրտսեր տղան՝ դպրոցական:
«Իմ երիտասարդության սիրելի սիթքոմից՝ «Married... with Children»-ից ոգևորված ենք ստեղծել այս նախագիծը։ Իմ ամենասիրելի սիթքոմերից է։ Մինչ օրս հաճույքով նայում եմ, թեև բավականին հին է։ Ես և իմ թիմը շատ ուրախ ենք, որ կարող ենք ստանալ հայկական ընտանիքի որակյալ պատմություն։ Միշտ երազել եմ, որ մի օր կարողանանք դրա նման մի բան անել, սակայն պատմել հայ ընտանիքի մասին։ Թեև մոտիվներն այս սիթքոմից են, սցենարը նոր է գրված։ Չէինք կարող կրկնօրինակել սցենարը, նախ, որովհետև այնտեղ ամերիկյան ընտանիք էր, երկրորդ՝ 1980-ականների։ Խոսքը բոլորովին տարբեր իրականությունների մասին է, պարզապես միտքը, որ հայրը աշխատում է, բոլորը ծախսում են, մեզ շատ է ոգևորել»,- ասաց դերասանն ու հավելեց, որ ընտանիքի անդամների շռայլությունները միշտ կոնֆլիկտի առիթ են դառնում։
«Ինձ համար կերպարիս մեջ գրավիչ էր այն, որ նա շատ նման է հայ ընտանիքների լավ հայրերին, ովքեր մտածում են իրենց ընտանիքի մասին, փող են վաստակում և, բնականաբար, միշտ դժգոհ են, թե ինչպես է այդ փողը ծախսվում։ Շատ արդիական է, իր մեջ ներվ կա, իսկ երբ կոնֆլիկտ կա, միշտ հեատաքրքիր է»,- նշեց Հայկը։

Ընտանեկան դիտման համար նախատեսված իրավիճակային կատակերգության հերոսներին մարմնավորել են Անի Լուպեն, Սաթենիկ Հազարյանը, Իշխան Ղարիբյանը, Սուրեն Առուստամյանը և այլ հայտնի դերասաններ: Նախագծի ռեժիսորը Արման Մարությանն է: Սիթքոմի պրոդյուսերներն են Արման և Հայկ Մարությանները։

Մանրամասն՝ սկզբնաղբյուրում