«Հո մինչև կյանքիս վերջ չե՞մ մեկնաբանելու». Սուրենյանը պարզաբանում է

ՌԴ մայրաքաղաքի եղանակը Հայաստան չի «տեղափոխվի», նման օրինաչափություն չկա. Tert.am –ին հայտնեց ՀՀ ԱԻՆ Հիդրոմետ ծառայության օդերևութաբանական կենտրոնի պետ Գագիկ Սուրենյանը՝ պատասխանելով հարցադրմանը, թե բնակչության շրջանում նման մոտեցում կա, որ ՌԴ մայրաքաղաք Մոսկվայում ինչ եղանակ լինում է, մի քանի օր հետո «գալիս է» Հայաստան, և հետևաբար, հնարավոր է, որ այդ եղանակը մի քանի օրից Հայաստանում լինի: Հիշեցենք, որ հիմա Մոսկվայում ձյան ռեկորդային տեղումներ են:

«10 տարի է՝ դա ենք մեկնաբանում, հո մինչև կյանքիս վերջ չեմ մեկնաբանելու, որ չկա նման բան: Ընդհանրապես, Մոսկվայից մեզ մոտ օդային հոսանք չի գալիս: Եվ շատ պարզ պատճառով. Հայաստանը Հյուսիսից անջատված է Կովկասյան լեռնաշղթայով»,-ասաց Գագիկ Սուրենյանը:

Անդրադառնալով առաջիկա 5 օրերի եղանակին՝ Գագիկ Սուրենյանը նշեց, որ լինելու է կրկին արևառատ և տաք շաբաթ։

«Ջերմաստիճանը 8-10 աստիճանով նորմայից բարձր է, երեկ 14 աստիճան տաքություն ենք ունեցել Արարատյան դաշտում, մինչև 19-20 աստիճան՝ Սյունիքի հովիտներում, մինչև 18՝ Տավուշի հովիտներում, Արցախում»,-ավելացրեց օդերևութաբանը:

Հարցին, թե այս տարի տեղումները սակա՞վ են, Գագիկ Սուրենյանը պատասխանեց, որ հունվարին եղել են նորմայի սահմաններում: Դե իսկ մինչև փետրվարի 10-ը տեղումներ չեն սպասվում: Բայց ընդհանուր առմամբ, փետրվարի համար կանխատեսվում են տեղումներ նորմայի սահմաններում: Ինչը նշանակում է, որ փետրվարի 10-ից հետո տեղումներ պետք է որ լինեն:

Այս թեմայով Ինչ եղանակ է սպասվում Եղանակը կփոխվի Ինչպիսի եղանակ է սպասվում Եղանակը կփոխվի․ մանրամասներ Եղանակը կցրտի