Ինչի՞ մասին է Արմանի, Ֆելիքսի, Սոֆյայի մասնակցությամբ նոր սիթքոմը. ֆոտոշարք

Տարեվերջին  Tert.am Life–ն իր ընթերցողներին հայտնել էր, որ Հանրային հեռուստաընկերությունը նկարահանում է նոր սիթքոմ` «Տանդեմ» խորագրով։ Շուտով սիթքոմը կլինի Առաջին ալիքի եթերում։ Մինչ այդ Tert.am Life–ն իր ընթերցողներին է ներկայացնում սիթքոմի ռեժիսոր և գլխավոր դերակատար Արման Նշանյանի հարցազրույցն ու լուսանկարներ նկարահանման հրապարակից։

Արման Նշանյանի և Սոս Ջանիբեկյանի մասնակցությամբ «Կենտ զույգը» ներկայացման մասին հանդիսատեսը, հավանաբար, չի մոռացել։ «Տանդեմը» «Կենտ զույգի» սփին–օֆֆն է, որտեղ չափազանց կոկիկ ու մաքրասեր հերոսին կրկին մարմնավորում է Արման Նշանյանը, իսկ փնթի ու թափթփված հերոսի դերն այս անգամ խաղում է Ֆելիքս Խաչատրյանը։

2 ընկերների համատեղ կյանքի արդյունքում ստեղծված խառնաշփոթը զավեշտալի իրավիճակներ է ստեղծում։ ««Տանդեմը» նմանություններ ունի իմ ներկայացմանը, որն արել էի Սոս Ջանիբեկյանի հետ, սակայն լրիվ այլ ուղղություն ունի։ «Կենտ զույգ» հասկացողությունը 1940-ական թվականներից բեմադրվել է տարբեր դրսևորումներով։ Ինչ խոսք, կան նմանություններ «Կենտ զույգի» հետ, դա թաքցնել պետք չէ։ Ներկայացված է «պլյուսի» և «մինուսի» փոխազդեցությունը, որից կոնֆլիկտներ են առաջանում»,– ասաց Արմանն ու հավելեց, որ թեև պատմությունը զվարճալի է, զուգահեռ փորձել են ներկայացնել նաև պատճառահետևանքային կապերը, գնալ դեպի հերոսների մանկություն և ցույց տալ, թե ով ինչու է այդպիսին դարձել։ «Այն, ինչ մենք անում ենք, մեր ներքին խառնվածքի արտացոլանքն է և ունի իր նախապատմությունը»,– նկատեց նա։

Արմանի հերոսն ամերիկաբնակ հայ է, որն ամուսնալուծությունից հետո գալիս է Հայաստան, ապրում երևանցի ընկերոջ հետ և փորձում գտնել իրեն։ «Նա շատ վատ վիճակում է գալիս Հայաստան, բայց, ի վերջո, գտնում է իրեն։ Կարևորն այն գաղափարն է, որ ամեն ինչ չփնտրենք դրսում, մարդը կարող է այստեղ էլ գտնել իրեն, հեռու գնալ պետք չէ։ Իհարկե, սա կոմեդիա է, բայց հիմքում դրել ենք նաև այն գաղափարը, որ Հայաստանը լավ տեղ է»,– ասաց Արմանը։

Դերասանից հետաքրքրվեցինք` արդյոք կերպարն ինչ–որ առումով իրեն է բնութագրում` որպես Ամերիկայում մեծացած հայ, ով կյանքի ինչ–որ փուլում որոշեց վերադառնալ Հայաստան. «Ես իմ բոլոր կերպարների մեջ կամ։ Յուրաքանչյուր դերիս մեջ դնում եմ ինչ–որ կտոր իմ պատմությունից, իմ ցավերից, իմ վշտից։ Ներկայացնում եմ  նաև այն, ինչ չեմ սիրում Հայաստանում»։

«Տանդեմը» նկարահանելիս Արմանը ոգեշնչվել է մուլտֆիլմերից և որոշ գծեր վերցրել, օրինակ, հերոսները մշտապես ներկայանում են նույն հագուստով և կերպարով, ինչը բնորոշ է մուլտֆիլմերին։ «Մենք սովոր ենք  մի ձևաչափի սիթքոմի։ Չեմ կարող ասել` լա՞վ է, թե՞ վատ, բայց մեր նախագիծը մի քիչ այլ ձևաչափի մեջ է։ Մեր սիթքոմն ավելի թատերականացված է։ Շատ ունենք նախագծեր նատուրալիզմի մեջ, թող մերն էլ ավելի թատերականացված լինի։ «Տանդեմում» պարբերաբար ունենալու ենք  հյուրեր, ինչը բարդացնում է մեր աշխատանքը։ Հնարավոր է, մի ամբողջ սերիա հիմնված լինի հյուրի վրա։ Պետք է կարողանաս ճիշտ քասթինգ անել, լավ կերպար ընտրել, ինչը դժվար է աշխատանքային տեմպի մեջ, բայց կփորձենք իրականացնել»,– նշեց Արմանը։

Որպես ռեժիսոր` Արմանը փորձել է ընտրել այնպիսի դերասանների, որոնց հեռուստադիտողները նորովի բացահայտելու հնարավորություն կունենան։ Օրինակ, Անահիտ Հարությունյանն առաջին անգամ է ներկայանում որպես դերասանուհի, Սոֆյա Պողոսյանն առաջին անգամ է ներկայանում հումորային ժանրում։

«Ի սկզբանե պատմությունը կազմված էր իմ և Ֆելիքսի կերպարների վրա։ Հստակ էր միայն մեր մասնակցությունը։ Մյուս կերպարների համար շատ երկար քասթինգ էինք անում։ Ես տեսա Սոֆային մի կողմից, որը դեռ չէր օգտագործվել եթերում։ Ամբողջ աշխարհում ընդունված է դերասաններին ներկայացնել այն ոճում, որում նա արդեն ներկայացրել է։ Որպես դերասան` ինքս դրանից հեռու եմ մնում, որովհետև դա իմ դեմ էլ է օգտագործվում։ Ես ուզեցի Սոֆային ներկայացնել այնպես, ինչպես արդեն չի խաղացել։ Ստացվեց շատ լավ կերպար»,– ասաց նա։

Նախագծի երաժշտական մասն ապահովել է Ֆելիքս Խաչատրյանը։ Ռեփերն ու Արման Նշանյանն արդեն զուգերգ են ձայնագրել և տեսահոլովակ նկարահանել, որը դառնալու է «Տանդեմի» սաունդթրեքը։

«Տանդեմի» իրականացման համար Արմանը կարևորեց պրոդյուսեր Արման Միտոյանի դերը, որը հավատացել է գաղափարին և աջակցել դրա իրագործմանը։