Միհրան Պողոսյանի վատությունը հասարակությանը. ԴԱՀԿ-ում համակարգային «բարդակ» է

Վերջին օրերին լրատվամիջոցները հաճախ են անդրադառնում ներկայիս ՀՀ գլխավոր հարկադիր կատարողի ժամանակավոր պաշտոնակատար Արմեն Հարությունյանին այդ պաշտոնում նշանակելու փաստին՝ արձանագրելով, որ ՀՀ «Դատական ակտերի հարկադիր կատարումն ապահովող ծառայության մասին» օրենքի համաձայն՝ ՀՀ գլխավոր հարկադիր կատարողի և տեղակալի պաշտոնները դասակարգված են որպես բարձրագույն խմբի պաշտոններ և այդ պաշտոնում նշանակվելու համար անհրաժեշտ է, որպեսզի թեկնածուն ունենա արդարադատության գեներալ-մայորի կոչում: Ա. Հարությունյանը, սակայն, կոչումով ընդամենը արդարադատության փոխգնդապետ է:

Կոչումների սանդղակում նա թռիչքային աճ է ունեցել՝ կապիտանից միանգամից ստանալով արդարադատության փախգնդապետի կոչում, որը նույնպես հաճախ հանդիպող երևույթ չէ, եթե չասենք՝ անհնարին: Կոչումների հարցում հերթականություն գոյություն ունի, և այդտեղ, որքան էլ թեկնածուն «գերազանցիկ»-ի համարում ունենա, այնուամենայնիվ, չի կարող մի քանի աստիճան շրջանցելով դառնալ փոխգնդապետ:

Ստացվում է, որ հրաշագործ ու ամենաստեղծ «աջի» զորությունն է նրան օգնել կոչումների «կարիերայում» նման աճ գրանցել, ինչը նույնպես օրենքի խախտում է: 

Ի դեպ, այդ նույն հրաշագործ ու ամենաստեղծ «աջի» նշանակած կադրի օրոք արդեն խոսվում է համակարգում բարդակի, հովանավորչության և կոռուպցիայի ծաղկման մասին, երևույթներ, որոնք երկար ժամանակ արդեն բացակայում էին հարկադիր կատարողների գործելաոճում:

Պատկերացնու"մ եք, թե որքան աղքատիկ է Հայաստանի կադրային բանկը, որ նման կարևորագույն պաշտոնի նշանակելու համար օրենքի պահանջները բավարարող թեկնածու չեն ''հայթայթում'': Արդեն երկար ժամանակ է` ԴԱՀԿ-ն ղեկավարվում է պաշտոնակատարի մակարդակով, այն էլ` օրենքի բազմաթիվ խախտումներով: Եվ այս կազուսի լուծումը, թվում է, չի երևում:

Բանն այն է, որ ԴԱՀԿ նախկին ղեկավար Միհրան Պողոսյանը, ով, արդարության համար պետք է նշենք, զրոյից կայացրել է այս կառույցը, համակարգը այնքան ամուր է պահել իր բռի մեջ և վերահսկողությունն այնքան խիստ է եղել, որ նորաթուխ պաշտոնյաների համար փակ է եղել կարիերայի սանդուղքով սլանալու հնարավորությունը: Այժմ, երբ հայտնի իրադարձությունների պատճառով նա հրաժարական է տվել, ԴԱՀԿ-ում չեն կարողանում գտնել որևէ պաշտոնյա, ով կարող է լրացնել Պողոսյանի բացը: Հենց այդ է պատճառը, որ այս կառույցում արդեն համակարգային բարդակ է տիրում:

Թե որն է լինելու խնդրի լուծումը` դժվար է ասել, բայց մի բան հստակ է. հեռանալուց առաջ Միհրան Պողոսյանը վատություն արեց հասարակությանը` համակարգը թողնելով անհույս և օրենքի խախտումներով պաշտոնավարումը քարշ տվող պաշտոնյայի հույսին:

Իսկ թե ինչու" է ՀՀ-ում նման կարևորագույն պաշտոնի հավակնորդը նշանակվում օրենքի խախտումներով` կներկայացնենք առաջիկա մեր հրապարակումներում:

Տիգրան Բարսեղյան