Արմեն Սարգսյանը պաշտոնապես առաջադրվեց ՀՀ նախագահի պաշտոնում

Իշխող կոալիցիան՝ Հայաստանի Հանրապետական կուսակցությունն ու «Հայ Յեղափոխական Դաշնակցությունն» այսօր պաշտոնապես Արմեն Սարգսյանին առաջադրեցին որպես ՀՀ 4-րդ նախագահի թեկնածու: Այսօր լրագրողների հետ զրույցում պատասխանելով Tert.am-ի հարցին՝ նման հայտարարություն արեց ԱԺ «Հայաստանի Հանրապետական կուսակցություն» խմբակցության ղեկավար Վահրամ Բաղդասարյանը: Նա հավելեց, որ առաջադրման համար անհրաժեշտ ¼ ձայները հավաքվել են և ուղարկվել ԱԺ քարտուղարություն։

«Այսօրվա հանդիպումն ամփոփում էր, քանի որ Արմեն Սարգսյանը ներկայացրեց իր՝ տարբեր խմբերի հետ ունեցած հանդիպման արդյունքները, ասաց, թե ինչու է որոշել այս ծանր բեռը վերցնել իր վրա: Այսօր միասնական՝ ՀՅԴ-ի հետ միասին, ստորագրահավաք կազմակերպեցինք և որոշեցինք Արմեն Սարգսյանին առաջադրել հանրապետության 4-րդ նախագահի թեկնածու»,- նշեց Բաղդասարյանը:

Ինչ վերաբերում հարցին՝ արդյո՞ք Արմեն Սարգսյանի առաջադրման հետ կապված լայն կոնսոլիդացիա եղավ, ինչպես պատկերացնում էր ՀՀ նախագահ Սերժ Սարգսյանը, Վահրամ Բաղդասարյան ասաց, թե դա պարզ կլինի քվեարկության ժամանակ, երբ հստակ կլինի, թե որքան ձայն է Արմեն Սարգսյանը հավաքել ԱԺ-ում:

«Ինձ թվում է՝ Արմեն Սարգսյանն այն թեկնածուն է, որի շուրջ լայնախոհություն ու կոնսոլիդացիա կլինի»,- շարունակեց նա:

Հարցին, որ տեսակետ կա, թե Արմեն Սարգսյանի թեկնածության շուրջ նույնիսկ ՀՀԿ-ում կոնսոլիդացիա չի եղել, պարզապես ՀՀԿ-ն այն կուսակցությունն է, որտեղ նախագահ Սերժ Սարգսյանի որոշումը միաձայն է ընդունվում, արդյո՞ք ՀՀԿ-ում նախագահի թեկնածուի շուրջ քննարկում եղել է, Վահրամ Բաղդասարյանը պատասխանեց. «Միանգամից փարատեմ կասկածները՝ լայն կոնսոլիդացիայի հետ կապված: Ես մի անգամ պետք է առաջարկեմ, խնդրեմ, որ մեր Գործադիր մարմնի նիստերը բաց լինեն, որպեսզի տեսնեք, թե մեզ մոտ ինչպիսի քննարկումներ են լինում: Այդ քննարկումները շատ երկար են տեղի ունենում՝ այդ թվում նաև նախագահի թեկնածուի հետ կապված: Բոլորիդ տեղյակ պահեմ, որ Սերժ Սարգսյանն իր կարծիքը հայտնել է ամենավերջում: Բնական է, որ բոլորը չեն կարող ունենալ նույն կարծիքը, բայց երբ բանավեճերի ու ընդհանուր քննարկումների արդյունքում քաղաքական ուժը որոշում է կայացնում, քաղաքական որոշումը բոլորն են հարգում»:

Ըստ ՀՀԿ խմբակցության ղեկավարի՝ իրենց կուսակցությունում նախագահի թեկնածուի համար նաև այլ անունների շուրջ է քննարկում եղել, նաև այն անունների, որոնք արծարծվել են մամուլում:

Խոսելով «Ելք»-ի՝ Սահմանադրական դատարան դիմելու նախաձեռնության մասին առ այն, որ ՀՀ նախագահի 4-րդ թեկնածու ընտրվի համապետական ընտրությունների արդյունքում՝ Վահրամ Բաղդասարյանն ասաց. «Մասնագիտական հարց է, իրենց իրավունքն է: Քաղաքական ուժը, խմբակցությունը ցանկացած հարց իրավունք ունի բարձրացնել, վիճարկել, իսկ ՍԴ-ն կտա իր պատասխանը»:

Այս թեմայով Հայաստանի պաշտպանությունն ու հզորացումը՝ Հայաստան-Ռուսաստան-Իրան Ռազմաքաղաքական նո՛ր Դաշինքի մեջ. Խաչիկ Ասրյան Նառա Սարգսյանը՝ հղիության, բալիկի սեռի և անվան ընտրության մասին Նախագահը հանդես է եկել հայտարարությամբ ՀՀ նախագահը կարգադրություններ է արել Նախագահը հանդիպել է Սերժ Սարգսյանի և Կարեն Կարապետյանի հետ