«Ընտանիք ունենալն ինքնանպատակ չէ»․ Ջուսն անկեղծանում է

Կանանց տոներին ընդառաջ` Life.panorama.am-ը «Ե՞րբ է կինը երջանիկ» խորագրի ներքո կներկայացնի հայտնի կանանց հետ զրույցներ ու կպարզի, թե երբ են նրանք իրենց երջանիկ զգում, որպես կին` ի՞նչ վախեր ու անվստահություններ ունեն, ինչպես նաեւ` տղամարդու, ո՞ր հատկանիշներն են ամենաշատը կարեւորում:

Մեր շարքի առաջին զրուցակիցն է սկանդալային, բայց նաեւ մշտապես պարզ ու անկեղծ արտահայտվող երգչուհի Ջուսը:
«Երջանկությունը ամեն կնոջ համար տարբեր ընկալումներ ունի: Կանայք կան, ովքեր իրենց երջանկության մեջ պարտադիր տղամարդ են տեսնում, իսկ օրինակ ես հիմա շատ երջանիկ եմ, որ ազատ եմ, քանի որ իմ ամուսնությունը ինձ համար իսկական գաղութ էր: Հիմա ինձ շատ երջանիկ եւ գլխավորը ազատ եմ զգում: Ես այն կանանցից չեմ, որ չեն կարող առանց տղամարդու ապրել, ես ինքնաբավ մարդ եմ ու կարողանում եմ ինձ լիակատար զգալ նաեւ միայնակ: Ինձ համար շատ կարեւոր է, որ ունեմ իմ սիրելի աշխատանքը, շրջապատված եմ լավ ընկերներով, ես իմ ողջ էներգիան բեմին եմ տալիս»,- նշեց երգչուհին:

Հարցին, թե առանց կողակցի իրեն միայնակ չի՞ զգում կամ ապագայում մենակ մնալու վախ չունի՞, պատասխանեց.
«Բացարձակ: Իհարկե, հասկանում եմ, որ կնոջը պետք է ընտանիք, ամուսին, երեխա, բայց, ես ուզում եմ, որ այդ ամենը իմ կյանքում ոչ թե ինքնանպատակ լինի, այլ իմ պատերացումներին համապատասխան լինի, հակառակ դեպքում` չեմ ուզում: Ես չեմ վախենում մենակ մնալուց, այդ ուղղությամբ չեմ էլ մտածում: Նաեւ գիտակցում եմ, որ շատ կանայք կան, ովքեր ընտանիք, երեխա ունեն, բայց վերջում դարձյալ մենակ են մնում: Այսինքն` պետք է չմտածել, որ եթե տղամարդ ու երեխա չունես, ուրեմն մենակ կմնաս»:
Ջուսի երազանքներում ապրում է այն տղամարդն, ում նա պատկերացնում է իր կողքին, բայց նաեւ գիտակցում է, որ այդ բոլոր հատկանիշները մեկ մարդու մեջ գտնելը դժվար է:

«Իմ տղամարդը իմ նկատմամբ շատ ուշադիր պետք է լինի: Պետք է սիրի ինձ, եւ զգա, թե ինչ եմ ուզում առանց իմ խոսքերի: Ինձ համար շատ կարեւոր է տղամարդու ջենտլմենությունը, ես սիրում եմ, երբ իմ տղամարդն ինձ անակնկալներ է մատուցում, ռոմանտիկ քայլեր է անում, բայց նաեւ նա պետք է շատ ուժեղ լինի, որպեսզի իր կողքին ես ինձ ապահով զգամ: Տղամարդը պետք է իր վրա որոշակի պարտավորություններ վերցնի եւ հիշի, որ իր կինը իր հայելին է, եթե նա իր կնոջը լավ վեարաբերվի, ապա կինը միշտ կծաղկի: Ինձ համար շատ կարեւոր է նաեւ, որ տղամարդը բաբնիկ չլինի, չստի, չծխի եւ չխմի: Միաժամանակ` ինքս էլ շատ լավ գիտակցում եմ, որ այս հատկանիշները մեկ տղամարդու մեջ գտնելը գրեթե անհնար է»,- հավելեց նա:
Ջուսի համար շատ կարեւոր է, որ տղամարդն իրեն սիրի, բայց նաեւ խոստովանում է, որ հարաբերություններում նյութական կողմը եւս մեծ նշանակություն ունի:

«Միանշանակ, ինձ համար սերը մեծ տեղ ունի, ես չեմ կարող առանց սիրո հարաբերություններ սկսել ու նաեւ չեմ կարող լինել մի տղամարդու կողքին, ով ինձ չի սիրի: Բայց սիրո հետ զուգահեռ շատ կարեւոր են նաեւ նյութական արժեքները: Գիտեք, սոցիալական խնդիրների պատճառով սերը շուտ մեռնում է, սկսում են կռիվենր, անհաշտություններ եւ այլն: Ես այդ փորձն ունեմ: Կինն ինչքան էլ սիրի իր տղամարդուն, եթե վերջինս կնոջ ցանկությունները անկատար թողնի, ապա ժամանակի ընթացքում հարաբերությունները անհետաքրքիր են դառնում: Չկարծեք, թե ես միայն նյութական մարդ եմ, եթե ինձ համար նյութականը հետաքրքիր լիներ, հիմա լավ «սիրածներ» կունենայի եւ այժմ էլ նման առաջարկներ ունեմ: Առանց սիրո ինձ նյութական ոչինչ պետք չէ, եւ հակառակը` սեր ու ոչ մի բան` եւս ինձ հարկավոր չէ»,- շեշտեց նա:

մանրամասն՝ կայքում