«Ցավում եմ»․ Կարեն Կարապետյանը խոսել է Վանաձորի ընտրությունների մասին

Ազգային ժողովի պատգամավոր Կարեն Կարապետյանը «Հրապարակ» թերթի հետ զրույցում հաստատել է, որ Վանաձորի ավագանու ընտրություններում ինքը աջակցել է ՀՀԿ-ի ցուցակի առաջին համարը զբաղեցնող Մամիկոն Ասլանյանի թեկնածությունն առաջադրելու հարցում:

«Այո, դրական վերաբերմունք ունեցել եմ, և Մամիկոն Ասլանյանի՝ որպես ցուցակի առաջին համարի թեկնածության առաջադրման փուլում իմ դիրքորոշումն այդպիսին է եղել: Սակայն ընտրական գործընթացի ժամանակ չեմ արտահայտվել մի պարզ պատճառով. հասարակությունն ինքը պետք է իր որոշումը կայացնի և հետագայում նաև պահանջի իր կողմից ընտրված համայնքի ղեկավարից», ասել է Կարապետյանը, ով ժամանակին զբաղեցրել է Սերժ Սարգսյանի աշխատակազմի ղեկավարի պաշտոնը:

Հարցին՝ «Իսկ այն, ինչ կատարվեց ավագանու առաջին նիստում, երբ 13 (ՀՅԴ-ն էլ հետը՝ 15) մանդատ ունեցող թեկնածուն 19 քվեով ընտրվում է քաղաքապետ, նորմա՞լ եք համարում», ՀՀԿ-ական պատգամավորը ասել է. «Որքան էլ ես շահագրգիռ կողմ լինեմ, միևնույն է, զուտ քաղաքականության տեսակետից ցավում եմ կատարվածի համար: Ոչ թե նրա համար, որ ՀՀԿ թեկնածուն է ընտրվել, այլ նրա համար, թե ինչ կատարվեց իրականում: Եթե ընտրողների մոտ որպես ընդդիմադիրներ ներկայացած քաղաքական ուժերը համատեղ համաձայնագիր են ստորագրում, բնականաբար ենթադրելի է, որ պետք է պահպանեին իրենց իսկ կնքած համաձայնությունը: Սակայն այսօր ունենք այն, ինչ ունենք: Եվ առկա վիճակից առաջին հերթին եզրակացություններ պետք է անեն հենց այդ ուժերը, քանզի եթե մի լոկալ տարածքում երեք քաղաքական ուժեր չեն կարողանում գտնել 18 վստահելի, հավատարիմ մարդ, ապա դա ինքնին մտահոգիչ է հատկապես եկող տարի կայանալիք խորհրդարանական ընտրությունների շեմին, երբ պետք է կարողանան վերահսկել ընտրական գործընթացը»: