«Ես միշտ ծաղկման մեջ եմ». Իննա Խոջամիրյանը` նոր ֆոտոշարքի ու վթարային իրավիճակում հայտնվելու մասին

Գարնանային վառ տրամադրություն, նուրբ երանգներ, սեր. Իննա Խոջամիրյանի նոր ֆոտոշարքը  ծաղկած ծիրանենիների բույր ունի։ «Էլենի օրագիրը» և «Սահմանին» նախագծերի դերասանուհին գարնանային գեղեցիկ ֆոտոշարքը տրամադրել է Tert.am Life–ին և խոսել դրա նախապատմության, ֆոտոշարքից հետո տեղի ունեցած միջադեպի և գարնանային իր տրամադրության մասին։ Իննայի նոր ֆոտոշարքի հեղինակն ընկերուհին է` լուսանկարիչ Ամին Ավագյանը։

«Բողբոջած ծիրանենիների ամենագեղեցիկ շրջանն է, ինչպե՞ս կարելի էր դա բաց թողնել։ Մտահղացումն Արմինեինն էր, իսկ ես նրա բոլոր մտքերի հետ համաձայն եմ առանց բացառության։ Նույնիսկ ճոճանակն ինքն էր պատրաստել։ Այն բացառիկ մարդկանցից է, ում մոտ երևակայությունն անմիջապես իրողության է վերածվում»,– ասաց դերասանուհին, ում համար գարունը վայրիվերումներով է անցնում։ Իննայի տրամադրությունն այս եղանակին փոփոխական է` ճիշտ եղանակի պես։

«Գարունն ինձ համար ամենագունեղ, պայծառ, ամենախենթ, բայց և դեպրեսիվ եղանակն է։ Ինչպես եղանակն է փոփոխական, այնպես էլ տրամադրությունս` ծայրահեղ ուրախությունից ծայրահեղ սթրես,– ասաց դերասանուհին, ով գիտի սթրեսից դուրս գալու ամենակարճ ճանապարհը,– Միայն այն, որ առավոտյան տանից դուրս ես գալիս և մոտակա բողբոջած ծառերի բույրն ու մեղմ արևը լցնում են օրդ, փաստ է»։

Շատերը գարունն ասոցացնում են սիրո ու ոչ միայն բնության, այլև մարդու ծաղկունքի հետ։  Իննան փլիսոփայական մոտեցում ունի այս հարցին. «Կինը ծառի նման է. գարնանը բողբոջում է, ամռանը բերք տալիս, աշնանը տերևաթափ լինում, ձմռանն ամեն գնով փորձում դիմակայել, որպեսզի գարնանը կրկին ծաղկի։ Իսկ ծառը խնամել է պետք։ Եթե մեզ խնամում են, հոգ են տանում մեր մասին, սիրալիր են, ուշադիր և մեզ շրջապատում են սիրով՝ մենք ծաղկունքի մեջ ենք։ Ես միշտ ծաղկման մեջ եմ, որովհետև իմ ընկերներն ու հարազատներն անընդհատ հոգ են տանում իմ մասին ու սիրում են ինձ»։

Նկարահանումների ժամանակ միջադեպերի մեջ ընկնելը Իննայի դեպքում այնքան սովորական է դարձել, որ, ինչպես դերասանուհին նկատեց, այս մասին հարցը հնչում է այն հաստատելու համար։ Միջադեպ, իհարկե, եղել է, սակայն այս ամենն Իննան հիշում է ժպիտով։ Ֆոտոշարքը բարեհաջող ավարտելուց հետո դերասանուհին Երևան վերադառնալու ճանապարհին է պատմության մեջ ընկել և փրկվել վթարի ենթարկվելուց։

«Ինչպես կարող էր միջադեպ չլինել։) Երևան վերադառնալու ճանապարհի մի հատվածում որոշակի անսարքությունների պատճառով, փորձեցի խուսափել խոչընդոտից, փոխարենը հայտնվեցինք երթևեկելի գոտուց դուրս ու խիտ ավազների մեջ ընկանք, ինչը, ինչպես ժողովուրդն է ասում, փախցնում է մեքենան ու վտանգավոր է։ Մի քանի պտույտ կատարեցինք։ Առաջին անգամ հասկացա, թե ինչ է նշանակում չկարողանալ ղեկը կառավարել, բայց մեքենայում գտնվող 2 այլ կյանքերի համար պատասխանատվությունն ու իմ վախը, կարծես, ստիպեցին սթափ վարվել։ Բարձրացա մի փոքր հեռու գտնվող թմբի վրա, մի փոքր հարվածեցի մեքենայի ստորին հատվածում, բայց կանգ առանք։ Կարծես թե, ինձ տղամարդու պես պահեցի, բայց հենց վտանգն անցավ սկսեցի լաց լինել։ Արմինեն, չգիտես ինչու, բացարձակ չէր վախեցել, բայց անհանգստացել էր իմ վախից։ Օրն, իհարկե, որպես զավեշտալի պատմություն տպվեց մեր հիշողություններում՝ նա բացահայտեց իմ վախկոտ կողմը, ես` նրա մանիակալ դրսևորումները»,– պատմեց դերասանուհին։

Լուսանկարները` Ամին Ավագյանի