Հրեա՞, թե՞ ղարսեցի․ Թուրքիայում քննարկում են Բոբ Դիլանի էթնիկ պատկանելությունը

Ամերիկացի երաժիշտ, գրող և կինոդերասան Բոբ Դիլանի՝ գրականության ոլորտում Նոբելյան մրցանակակիր դառնալուն պես թուրքական ԶԼՄ-ներն ակտիվորեն սկսել են քննարկել վերջինիս «թուրքական» ծագումը:

«Սաբահ» թերթը, անդրադառնալով Դիլանի հաղթանակին, գրել է, որ Բոբ Դիլանն «իրականում ծագումով թուրք է», որի նախնիները գաղթել են Տրապիզոնից: Որպես աղբյուր՝ «Սաբահ» թերթը մատնանշում է Դիլանի ինքնակենսագրական գիրքը, որում նա խոսում է իր տատիկի` տրապիզոնցի գաղթական լինելու մասին:

Իրականում Բոբ Դիլանն այսպես է ներկայացրել իր հորական տատի պատմությունն իր գրքում.
«Տատիկիս աչքերում միշտ հուսահատություն կար: Շատ ծանր կյանքի փորձ ուներ: Օդեսայից գաղթել էին ԱՄՆ: Իրականում Օդեսա էլ հասել էին մեկ այլ սևծովյա քաղաքից` Տրապիզոնից: Տատիկիս ընտանիքն իրականում ծագումով Հայաստանի սահմանին գտնվող Կարս քաղաքից էր: Պապիկիս ընտանիքն էլ է այնտեղից»:

Թուրքիայի հայ երիտասարդների մի մասը շտապել է արձագանքել թուրքական մամուլի` Բոբ Դիլանին թուրք հայտարարող հրապարակումներին և թեմայի վերաբերյալ տարբեր հրապարակումներ արել սոցցանցերում:
«Թո՞ւրք, կարսեցի հա՞յ, թե՞ տրապիզոնցի հույն», - գրել է ստամբուլահայ ակտիվիստներից մեկը ֆեյսբուքյան իր էջում:

Բոբ Դիլանը, ում իրական անունը Ռոբերտ Ալեն Ցիմերման է, ծնվել է 1941 թվականի մայիսի 24-ին ԱՄՆ Մինեսոտա նահանգի Դուլութ քաղաքում՝ մանրածախ առևտրականի ընտանիքում։ Նրա կենսագրության մեջ նշվում է, որ նրա ընտանիքը ծագումով հրեա էր` Ռուսական կայսրության տարագիրներ: Հորական կողմի տատն ու պապը՝ Աննա և Զիգման Ցիմերմանները, Օդեսայից մեկնել են ԱՄՆ՝ 1905 թվականի հրեական ջարդերի պատճառով։ Մորական կողմի նախնիները լիտվացի հրեաներ էին (Բենիամին և Լիբա Էդելշտեյն), որոնք գաղթել էին 1902 թվականին: Իր ինքնակենսագրականում Բոբ Դիլանը գրում է, որ մորական կողմի տատի տոհմը սերում է Թուրքիայից, որտեղ կրել են Կիրգիզ ազգանունը։ 1947 թվականին Ռոբերտի հայրը հիվանդացել է պոլիոմիելիտով, իսկ ընտանիքը տեղափոխվել հարևան Հիբինգ քաղաք։

Բոբ Դիլանը հինգ տասնամյակ շարունակ ռոք երաժշտության մեջ հանդիսանում է պաշտամունքային անձ։ Նրա երգերից շատերը, ինչպիսիք են Blowin’ in the Wind-ը և The Times They Are a-Changin’-ը, դարձել են քաղաքացիական իրավունքների պաշտպանության և հակապատերազմական շարժման հիմներն ԱՄՆ-ում։ Սկսել է ստեղծագործել 1960-ական թվականների սկզբներից։
2016 թվականին արժանացել է Գրականության Նոբելյան մրցանակի՝ «մեծ ավանդույթներ ունեցող ամերիկյան երգարվեստում պոետիկ նոր արտահայտչականություն ստեղծելու համար»: