Գազի գինը կարող է նվազել

Հայաստան մատակարարվող գազի և էլեկտրաէներգիայի հնարավոր նվազումը քաղաքական տիրույթում լուծվող հարց է: Tert.am-ի հետ զրույցում այս մասին ասել է էներգետիկ քաղաքականության փորձագետ Վահե Դավթյանը:

«Պետք է լինի քաղաքական որոշում, որ ՀՀ-ում գազի ու էլեկտրոէներգիայի գները նվազեն»,- նշեց նա՝ համոզմունք հայտնելով, որ նորանշանակ վարչապետ Կարեն Կարապետյանը, հավանաբար, հենց այս հանգամանքը հաշվի առնելով, գների վերանայման առաջարկ է արել:

Փորձագետը նշեց, որ նույն հարցը դասական տնտեսագիտական տիրույթում դիտարկելու դեպքում ակներև է, որ իրական նախադրյալներ՝ գների իջեցման համար, չկան:

«Վերջին մեկ տարվա ընթացքում ՀՀ-ում էլեկտրաէներգիայի սպառման ծավալը նվազել է շուրջ 9 տոկոսով և սա բավական լուրջ ցուցանիշ է: Մենք ունենք էներգետիկ կարևոր ենթակառուցվածքներ, որոնք աշխատում են վարկերով և դրանք անմիջական ազդեցություն են ունենում արտադրած էլեկտրաէներգիայի վերջնական սակագնի վրա: Օրինակ՝ Ատոմակայանի դեպքում վարկերի ճնշումը սակագնի վրա 2 դրամով ազդում է»,- նշեց Վահե Դավթյանը:

Էներգետիկ քաղաքականության փորձագետի խոսքով՝ հնարավոր նվազումը գազի և էլեկտրաէներգիայի ոլորտներում Ռուսաստանի Դաշնության և ՀՀ կառավարության «բարի կամքի» դրսևորում կլինի:

Հարցին, թե որն է պատճառը, որ առանց տնտեսական նախադյալների կողմերը կարող են համաձայնել գների նվազեցման հարցում, Վահե Դավթյանը պատասխանեց, որ հարցը պետք է դիտարկել նաև ներքին լսարանին հաճոյանալու տիրույթում: «Մենք կարող ենք վաղն ունենալ ավելի ցածր սակագին, բայց քաղաքական գործիքների միջամտության հաշվին»,- նշեց փորձագետը:

Ըստ նրա՝ Հայաստանը միշտ արտոնյալ պայմաններով է գազը Ռուսաստանից գնել, եթե համեմատենք տարածաշրջանային այլ պետությունների հետ: Միաժամանակ, ըստ նրա, ՀՀ-ում գազի գինը ԵԱՏՄ անդամ-պետությունների գազի գների համեմատ բարձր է, որովհետև տարանցիկ ճանապարհով է հասնում հանրապետություն:

«Գազի գնի տատանումները միշտ էլ քաղաքական հարցերի լուծման հիմք են ունեցել: Քաղաքական հաշվեհարդարների կամ այլ հարցերի համար են արվել: Այսօր Հայաստանի Հանրապետության համար գազի գինը 150 ԱՄՆ դոլար է (նկատի ունի սահմանին), բայց կարծում եմ, որ մինչև 130 դոլար իջեցնելու հնարավորություն կա»,- ընդգծեց Վահե Դավթյանը: