«Չէի կարող խախտել ավանդույթը»․ Իբրահիմովիչ

Անգլիական «Մանչեսթեր Յունայթեդից» «Լոս Անջելես Գելաքսի» տեղափոխված Զլատան Իբրահիմովիչն ամերիկյան ակումբում տպավորիչ նորամուտից հետո կիսվել է տպավորություններով։ MLS-ում շվեդ հարձակվողի նորամուտի խաղում «Լոս Անջելես Գելաքսին» 4։3 հաշվով գերկամային հաղթանակ էր տարել լիգայի նորեկ «Լոս Անջելեսի» նկատմամբ, իսկ Իբրահիմովիչը փոխարինման էր դուրս եկել 71-րդ րոպեին եւ խփել դաշտի տերերի երրորդ ու չորրորդ գոլերը։

«Ես միշտ գոլ եմ խփում նորամուտիս խաղում եւ չէի պատրաստվում խախտել ավանդույթը։ Երբ թիմը պարտվում է 0։3 հաշվով, ուղեղը սկսում է ավելի ակտիվ աշխատել, որպեսզի շտկի իրավիճակը։ Երկրպագուները պահանջում էին Զլատանին, եւ ես տվեցի նրանց Զլատանին։ Ինձ համար հեշտ է խաղալ այստեղ, սակայն պետք է դրական պահեր ապրեմ թիմի հետ, որպեսզի ավելի մտերմանամ»,- 36-ամյա Իբրահիմովիչի խոսքը մեջբերում է Fox-ը։

Հիշեցնենք, որ մինչեւ 61-րդ րոպեն հյուրերը հաղթում էին 3։0 հաշվով, սակայն «Լոս Անջելես Գելաքսին» դարձավ ֆանտաստիկ «քամբեքի» հեղինակ։ «Լոս Անջելեսի» ուրուգվահայ հարձակվող Դիեգո Ռոսին մեկնարկային կազմում հանդես եկավ առանց փոխարինման եւ դարձավ գոլային փոխանցման հեղինակ։

Զլատան Իբրահիմովիչն օրեր առաջ խզել էր անգլիական «Մանչեսթեր Յունայթեդի» հետ պայմանագիրը եւ տեղափոխվել ԱՄՆ։ Շվեդիայի հավաքականի նախկին ավագի պայմանագիրը «Լոս Անջելես Գելաքսիի» հետ նախատեսվեծ է մինչեւ 2019 թվականի ավարտը, իսկ նրա տարեկան աշխատավարձը կկազմի 1․6 միլիոն եվրո։ Նախկինում շվեդ հարձակվողը հանդես է եկել նաեւ շվեդական «Մալմյոյում», Ամստերդամի «Այաքսում», իտալական «Ինտերում», «Յուվենտուսում» ու «Միլանում», կատալոնական «Բարսելոնայում» ու ֆրանսիական ՊՍԺ-ում։

Այս թեմայով Իբրահիմովիչը հեռանու՞մ է Մոուրինյոն նշել է կոնկրետ ժամկետ, թե երբ կվերադառնա Իբրահիմովիչը Իբրահիմովիչը նորություն ունի «Իբրա, շարժիր հետույքդ». նոր մանրամասներ ծեծկռտուքից «Մանչեսթեր Սիթիի» ֆուտբոլիստները ծաղրել են Իբրահիմովիչին