ATV հեռուստաընկերության «Կայարան» հեռուստասերիալն ապրիլի 13–ին ավարտվում է։ Նախագծի պրոդյուսեր Ելենա Արշակյանը  Tert.am Lif–ին հայտնեց, որ նախագծի հանգուցալուծումն արդեն հայտնի է իրենց, թեև նկարահանումներն ամբողջությամբ չեն ավարտել։ Կան տեսարաններ, որոնք դեռ չեն նկարահանվել։

«2016-ի սեպտեմբերից եթերում ենք։ Սերիալը մոտենում է իր տրամաբանական ավարտին։ Շատ ուրախ եմ, որ արեցի այս նախագիծը, որովհետև «Կայարանի» միջոցով էկրան բարձրացան տաղանդավոր նոր դերասաններ։ Դա իմ կարևորագույն խնդիրներից մեկն է։ Ամեն անգամ նոր նախագիծ սկսելիս իմ առջև խնդիր եմ դնում հետաքրքիր սյուժե ունենալուց զատ էկրան բերել նոր դեմքերի»,– ասաց Ելենան ու հավելեց, որ նախագծում աշխատել է նաև այնպիսի դերասանների հետ, որոնց հետ համագործակցության տարիների փորձ ունի` ի դեմս Արմեն Էլբակյանի, Ալեքսանդր Բաբասյանի և այլոց։

«Արմեն Էլբակյանի ներկայությունը կարևոր էր նախագծում։ Նա նաև սովորեցնում էր  երիտասարդներին։ Շնորհակալ եմ ամբողջ թիմին` սկսած տեխնիկներից մինչև ռեժիսոր ու օպերատոր։ «Կայարան» հեռուստասերիալն ինձ համար ընտանիքի պես էր դարձել։ Կարելի է ասել, ATV–ում իմ առաջին նախագիծն էր։ Այս դեպքում ռիսկային քայլ արեցի. չգիտեմ, մարդիկ  որքանով  են տեղյակ, սակայն նախկին թիմից շատ քիչ մարդիկ մնաց մեզ մոտ, եկան մարդիկ, ում հետ ես սովոր եմ աշխատելու, ինչպես նաև Թատերականն ավարտած նոր մարդիկ։ Օրինակ, մեր նկարչուհին նոր էր ավարտել Թատերականն ու անմիջապես աշխատանքի տեղավորվեց «Կայարանում»։ Ես ոչ միայն դերասանական կազմն եմ թարմացնում, այլև ստեղծագործական, որպեսզի նոր աշխատատեղեր ստեղծվեն»,– ասաց Ելենան։

Պրոդյուսերը նկատեց, որ թիմը ավելի քան մեկուկես տարի ջանասիրաբար աշխատել է, քնել–արթնացել նկարահանման հրապարակում, ինչը բավականին բարդ է. «Քնել–արթնանալ փոխաբերական իմաստով չեմ ասում։ Եղել են նկարահանումներ, որ տևել են մինչև 24 ժամ։ Նրանք ավելի շատ ժամանակ անցկացրել են նկարահանման հրապարակում, քան իրենց ընտանիքներում։ Իհարկե, բարդ է բաժանվել, սակայն կարծում եմ` անհրաժեշտ է, որպեսզի իրենք էլ հանգստանան։ Ինչու ոչ, հեռուստադիտողներն էլ պետք է հանգստանան դերասաններից, որովհետև շաբաթը 5 օր էկրաններին նույն դերասաններին տեսնելը կարող է նաև  հոգնեցնել»։

Անդրադառնալով «Կայարանի» հանգուցալուծմանը և հարսանիք լինել–չլինելուն` Ելենան ասաց. «Հարսանիքն ամենատրամաբանական լուծումն է բոլոր սերիալներում։ Հիմնականում  այդպես էլ  ավարտվում են սերիալները, իսկ թե ինչ է կատարվում հարսանիքից հետո, այլևս ոչ ոքի հետաքրքիր չէ։ Չեմ կարող ասել, թե ինչ ավարտ կլինի մեզ մոտ, սակայն ամեն ինչ տրամաբանական լուծում կստանա։ Բոլոր հարցերը կգտնեն իրենց պատասխանները»։

Ռեժիսորից հետաքրքրվեցինք, թե ինչ նոր նախագծեր հեռուստադիտողները սպասեն իրենից։ «2 նոր նախագծի վրա եմ  աշխատում։ Ինձ հետաքրքիր է աշխատել երկարատև նախագծերում, քանի որ այդ դեպքերում հանդիսանում եմ պրոդյուսեր։ Որպես ռեժիսոր` իմ քաղցը լրացնում եմ 25 մասանոց փոքր նախագծերում։ Հիմա աշխատում եմ այդ փոքր սերիալների ուղղությամբ։ Թիմը երկար ժամանակ չի ունենա հանգստանալու, ամռանը կսկսենք 25 մասանոց նոր նախագծի նկարահանումները»,– ասաց նա։ Մինչև նոր նախագծի մեկնարկը հեռուստադիտողները կարող են հետևել Ելենայի մեկ այլ նախագծի` «Կարմիր բլուրի» ընթացքին։