«Նեմրայի» համերգի հետաքրքիր պահերն ու հայտնի հյուրերը․ լուսանկարներ

Daisy, Connection Lost, Born in 94, I’m a lier, «Նարե» և մի շարք այլ սիրված երգեր «Նեմրան» երեկ ներկայացրեց երկրպագուներին` մենահամերգի շրջանակում։ «Տարվա լավագույն ռոք խումբն» անհավանական էներգետիկայով լի համերգ ունեցավ Տիկնիկային թատրոնում։ Ռոք խմբերին հաճախ համերգային հարթակ տրամադրող թատրոնն արդեն սովոր է այսպիսի իրարանցումների։ Տիկնիկայինում նստած մարդ այս անգամ չկար։ «Նեմրայի» երկրպագուները մինչև համերգի մեկնարկը հավաքվել էին բեմի մոտ` հնարավորինս մոտ լինելու սիրելի կատարողներին։

 

Tert.am Life–ը ներկայացնում է համերգի հետաքրքիր դրվագները։

 

Բեմում անհավանական էներգետիկա կար, որը խումբն ու երկրպագուները փոխանցում էին միմյանց։ Թեև «Նեմրան» առավել մեծ հայտնիություն ձեռք բերեց «Դեպի եվրատեսիլ» նախագծից հետո, որտեղ 1 քայլ էր հեռու հաղթանակից, այսպիսի էներգետիկայով համերգները խմբի համար նորություն չեն։ «Նեմրացիները», ինչպես սիրում է երկրպագուներին դիմել Վանը, միշտ ապահովել են լեփ–լեցուն դահլիճներ, խմբին հավասար երգել բոլոր ստեղծագործությունները և ոգևորել անդամներին ջերմ ծափողջույններով։

 

 

Համերգի ընթացքում իրենց գույները բերեցին նաև հյուրերը` Գոռ Սուջյանը, նախկին The Beautified Project խմբի մենակատար Անդրե Սիմոնյանը, որոնք զուգերգով ներկայացան «Նեմրայի» հետ։ Անդրեն նշեց, որ շատ հաճելի է լինել «Նեմրա պլանետ»–ում

 

Հանդիսատեսը մեծ ջերմությամբ ընդունեց նաև Վանի կատարումը Մարեկ Զաբորսկիի հետ, երբ հարվածային գործիքների առջև նստած երաժիշտը բեմում հանդես եկավ որպես երգիչ ու, ինչպես Վանը նշեց իրեն բնորոշ հումորով, մի քիչ «հաչացին»։ Ի դեպ, Only Dog is Barking երգի շրջանակում Մարեկը  «հաչաց» բառի ուղիղ իմաստով։

 

«Դեպի Եվրատեսիլ» նախագծից հայտնի դարձած Լուսինե Մարդանյանն իր կատարումներով լցրեց փոքրիկ դադարը, որի ընթացքում «Նեմրայի» անդամները փոքր–ինչ շունչ քաշեցին, հանգստացան ու վերադարձան բեմ` էներգիայի նոր չափաբաժնով։ Ի դեպ, «Դեպի եվրատեսիլի» մասնակիցներից Գևորգ Հարությունյանն ու Ռոբերտ Քոլոյանն էլ «Նեմրային» սատարում ու երգերը վայելում էին հանդիսատեսի շարքերից։

 

 

Արդեն հիթ դարձած I’m a lier երգը կատարելուց առաջ Վանը շնորհակալություն հայտնեց Հանրային հեռուստաընկերության թիմին. «Երբ որոշեցինք գնալ Հանրային, պատկերացնում էինք, թե ժեկի նման տեղ է, որտեղ մարդիկ մուննաթով են, բայց գնացինք ու պարզվեց հակառակն է։ Այնտեղ շատ հզոր թիմ կա»։

 

Լեփ–լեցուն դահլիճում կայացած համերգի տոմսերը սպառվել էին օրեր առաջ, ինչը «Նեմրային» ստիպեց  ևս մեկ համերգ նախատեսել ապրիլի 23–ին։ Ի դեպ, Վանը մտաբերեց զավեշտալի իրավիճակ, երբ երկրպագուներից մեկը զանգահարել էր տոմսարկղ ու հարցրել, արդյոք ունեն «Նեյմարի համերգի» տոմսեր։) Իրեն բնորոշ հումորով նա փորձում էր պարզել, թե ներկաներից ով է եղել զանգի հեղինակը։)

 

2 ժամից ավելի տևած համերգը եզրափակվեց խմբի հիթերից մեկով` Connection Lost–ով։ Վանը շնորհակալություն հայտնեց հանդիսատեսին, իսկ հանդիսատեսն իր շնորհակալությունը հայտնեց  ջերմ ծափողջույններով «բրավո՜» բացականչելով։

 

Լուսանկարները` Շաքե Հովհաննիսյանի