Մանե Գրիգորյանը վերադառնում է եթեր

Հաղորդավարուհի Մանե Գրիգորյանը 7 տարվա դադարից հետո վերադարձել է հեռուստաեթեր։ Նա վարում է Հանրային հեռուստաընկերության նոր «Անկախ տարիքից» հաղորդաշարը, որի շրջանակում պլաստիկ վիրաբույժը, ատամնաբույժը, բժիշկ-էսթետիստն ու ոճաբանները աշխատելու են հերոսուհիների հետ և օգնելու են նրանց վերականգնել գեղեցկությունը, հմայքը, ինքնավստահությունը և նոր կյանք սկսելու ցանկությունը: Հեռուստաեթեր վերադառնալու մասին առաջին հարցազրույցը Մանեն վստահել է Tert.am Life–ին։

 

«Էկրանային դադարս տևեց 7 տարի, քանի որ մեծացնում էի երեխայիս։ Այս ընթացքում շատ նախագծերի առաջարկներ էի ստանում, բայց ներքին ձայնս ասում էր` սպասիր։ Երբ ստացա այս առաջարկը, հասկացա, ինչու չէի շտապում,– ասաց Մանեն ու հավելեց, որ այս նախագիծը շատ մասշտաբային է։ –Այն իր մեջ ներառում է և՛ կյանքի պատմություն՝ փոքրիկ ֆիլմ է, և՛ հոգեբանական շատ պահեր կան, և՛ էսթետիկ գեղեցկության ու պլաստիկ վիրահատությունների հետաքրքիր ոլորտներն են ներառված։ Ամեն ինչ այնքան հագեցած է, որ հնարավոր չէ մեկ նախադասությամբ ասել, թե ինչը գրավեց ինձ այս առաջարկում»։

 

 

Հաղորդավարուհին ոգևորությամբ նկատեց, որ պարզապես չի վարում նախագիծը, նաև հանդիսանում է դրա գծային պրոդյուսերը, որը հեռուստատեսությունում նոր փորձառություն է Մանեի համար. «Ես շատ ուրախ եմ, որ Առաջին ալիքի ղեկավարությունը ինձ ընձեռեց ոչ միայն հաղորդավարի, այլև գծային պրոդյուսերի աշխատանքը:

Այստեղ ես շատ բան եմ սովորում մեր գլխավոր պրոդյուսեր Լիլիթ Մարտիրոսյանից։ Առհասարակ, շատ պրոֆեսիոնալ թիմ է հավաքված, որտեղ բոլորս բոլորիցս սովորում ենք, միասին աշխատում և ուրախանում արդյունքներով»:

 

 

Մանեի համար հետաքրքիր է աշխատել կանանց հետ, որոնք իրենց կյանքի փոփոխությունները վստահում են հաղորդաշարին։ «Կանանց` իմ հերոսուհիների հետ աշխատելու առանձնահատկություններից կնշեի համբերությունը, մարդկանց հետ շփվելու, ամենացավոտ հարցերում եզրեր գտնելու առանձնահատկությունները, որոնք իմ մեջ նորովի եմ հայտնաբերել։ Ամենաբարդ խնդիրներով մարդիկ, ովքեր երեկ արդեն որոշել էին ամեն ինչ փոխել, վաղը մտածում են, որ դա ոչինչ էլ չի տա իրենց, իսկ մյուս օրը երջանիկ նամակներ են գրում քեզ... Էմոցիաների մի ծաղկեփունջ է, որը ես հաճույքով տանում եմ»,– ասաց հաղորդավարուհին։ 

 

 

Էկրանային դադարի ընթացքում Մանեն ինտենսիվ աշխատում էր հարազատ Երգի թատրոնում, բեմադրություններ անում։ Վերջերս նա լսարանի դատին հանձնեց մանկական «Չա՞ր, թե՞ Բարի» ինտերակտիվ մյուզիքլը։ Էկրանային աշխատանքը Մանեն կարոտել էր, չնայած փաստում է, որ այս նախագիծը տարբերվում է իր վարած մյուս հաղորդումներից։ «Բառի ուղիղ իմաստով, երբեմն, աշխատում ենք օրը 24 ժամ։ Այս պահին միաժամանակ նկարահանվում է 8 հերոսուհու թողարկում, իսկ դա նշանակում է, որ կան օրեր, երբ օրը սկսում ենք մի հերոսուհու նկարահանմամբ, ցերեկը ու երեկոյան մյուսին ենք նկարում, իսկ առավոտյան 5–ին գնում ենք հիվանդանոց՝ վիրահատարան, ուր կատարվում է մեկ այլ հերոսուհու վիրահատությունը»,– ասաց Մանեն, սակայն դա նրան չի խանգարում շարունակել աշխատել նաև Երգի թատրոնում, որտեղ ապրիլի 14–ին և 15-ին ունի նոր ներկայացումներ։