«Իրադարձությունները արագ են զարգանում». Անուշիկ Առաքելյանը՝ նոր հեռուստանովելի մասին

Ucom ցանցում գործող «Արմենիա Պրեմիում»-ի եթերում այսօրվանից` ապրիլի 7–ից, կհեռարձակվի «Ավազե դղյակ» 25 մասանոց հեռուստասերիալը, որում խաղում են Լուիզա Ղամբարյանը, Տիգրան Գասպարյանը,  Արթուր Կարապետյանը, Անուշիկ Առաքելյանը,  Անելիա Գուբրյանը, Վահագն Մարտիրոսյանը և այլք:

Tert.am Life-ը դերասանուհի Անուշիկ Առաքելյանի հետ խոսել է նախագծում իր մասնակցության ու մարմնավորած կերպարի մասին:  Հեռուստանովելի պատմությունը զարգանում է Առուշանյանների ու Մարգարյանների ընտանիքների միջև վաղեմի թշնամանքի շուրջ: Անուշիկն այստեղ մարմնավորում է հակամարտող ընտանիքներից մեկի մոր`Անժելայի  կերպարը:

Դերասանուհին նշեց, որ իր համար հետաքրքիր էր մարմնավորել տարիքով իրենից ավելի մեծ կնոջ, որն ունի հասուն երեխաներ:  «Կերպարը հետաքրքիր էր այնքանով, որ այն կինը, ով ապրում է առանց խնդիրների, ունի սիրող ամուսին և երեխաներ, մի հոգեվիճակից շատ արագ պետք է անցներ մեկ այլ հոգեվիճակի:

Այդ ձևաչափում մենք սովոր ենք սերիալներում խաղալ գոնե ամենաքիչը 6 ամիս, իսկ այս դեպքում իրադարձությունները զարգանում են շատ արագ։ Չգիտես, որպես դերասանի, այդ անցումը քեզ համար հե՞շտ է, թե՞ դժվար, դա նույնն է, որ երկու ժամանոց ֆիլմում  կարողանաս ցույց տալ դերասանական այդ աճը: Հուսամ, ստացվել է»,-ասաց դերասանուհին:

Նա նշեց, որ նախագծում նկարահանվելու առաջարկը ստացել է պրոդյուսեր Ռուբեն Արամյանից:  Անուշիկի խոսքով` ամբողջ ստեղծագործական թիմը սրտացավ աշխատել է նախագծի շուրջ: «Իրականում, ես ունեցել եմ նաև անհաջող աշխատանքային թիմի հետ աշխատելու փորձ, բայց այս պարագայում, իսկապես, շատ առողջ միջավայր էր: Մենք ունեցել ենք շատ լավ ռեժիսոր, ով փորձում էր ամեն գնով ամեն ինչ անել կադրի էսթետիկան ապահովելու համար, օպերատորները փորձում էին անհավանական բաներ անել նկարահանման հրապարակում, որոնք, գուցե, տեխնիկապես հնարավոր չէին: Իհարկե, անկախ ամեն ինչից, եթե դերասանը պրոֆեսիոնալ է, անելու է ամեն ինչ,  որպեսզի լավագույնը ստանա, բայց երբ տեսնում ես` թիմն էլ է քեզ հետ աշխատում, է՛լ ավելի ոգևորված ես աշխատում:  Երբ թիմը լավ չի աշխատում, հավատացեք, հեռուստադիտողը կադրից այն կողմ նկատում է այդ ներքին անհաշտությունը»,-ասաց նա:

Նախագծում Անուշիկի խաղընկերները եղել են դերասաններ,  ում հետ նախկինում չի աշխատել, այդ առումով էլ դերասանուհու համար հետաքրքիր է եղել մասնակցությունը:  Նա նշեց, որ անհամբերությամբ սպասում է ամիսներ առաջ նկարահանված նախագիծը եթերում տեսնելուն:

«Սա ինձ համար այն բացառիկ սերիալներից է, որի արդյունքը, ինչպես գեղարվեստական ֆիլմի դեպքում, պիտի հետո տեսնեմ: Որպես կանոն, սերիալները նկարելու ընթացքում մենք կարողանում ենք  հետևել մեր խաղին և ընթացքում շտկումներ անել: Ինձ համար հետաքրքիր է տեսնել` արդյոք կարողացել եմ  40–ն անց կնոջ կերպար մարմնավորել: Հագուստով, դիմահարդարմամբ փորձել ենք դրան գալ, բայց խաղն էլ է շատ կարևոր»,-ասաց նա:

Այս թեմայով Անուշիկ Ալավերդյանը մայիսմեկյան հանրահավաքից լուսանկար է հրապարակել «Ես ու նա հիմա գործընկեր ենք». Վարուժան Մարգարյանը` անձնական կյանքի մասին Անելյա Գուբրյանը՝ անչափահաս լինելով` սիրային տեսարաններում նկարահանվելու մասին Լուսանկարներ նոր սիթքոմի նկարահանման հրապարակից «Գաբին բացառություն է». Լուիզա Ղամբարյանը՝ դստեր մասին