Լարված մթնոլորտ․ մանրամասներ ՀՀԿ Գերագույն մարմնի երեկվա նիստից

Մամուլում մանրամասներ են հրապարակվում նախօրեին տեղի ունեցած ՀՀԿ ԳՄ նիստից, որի ընթացքում քննարկվել է կառավարության նոր ծրագիրը, որն էլ պետք է ներկայացվի խորհրդարանի հաստատմանը:

Դատելով մամուլ սպրդած տեղեկություններից՝ ծրագրի քննարկումը անցել է ներքին բավականին լարված և նյարդային մթնոլորտում, կամ դրսևորվել է արդեն իսկ եղած նյարդային մթնոլորտը, որ ՀՀԿ-ում առաջացել է Հովիկ Աբրահամյանի հեռացումից և Կարեն Կարապետյանի նշանակումից հետո:

Դրվագներից մեկում, որ հրապարակվել է մամուլում, ՀՀԿ-ական Վարդան Այվազյանը Կարեն Կարապետյանին հիշեցրել է, որ կառավարության լիազորության մեջ չի մտնում գազի գնի իջեցումը, երբ Կարապետյանն ասել է, որ ունեն նման մտադրություն: Հետաքրքրական է, օրինակ, որ երբ գազի գնի իջեցման մասին Մեդվեդևին նամակ էր գրել Հովիկ Աբրահամյանը, ՀՀԿ-ականները կարծես թե որևէ դիտողություն չեն ունեցել այդ առիթով: Կարեն Կարապետյանը Վարդան Այվազյանին հիշեցրել է, որ ինքը գիտի կառավարության լիազորությունները:

ՀՀԿ-ում ժամանակի ընթացքում ավելի ու ավելի ակնառու են դառնալու Կարեն Կարապետյանի հետ հակադրությունները, եթե նա սկսի իսկապես աշխատել: Ընդ որում, այդ հակադրությունները կարող են լինել նաև նրա աշխատանքի ինդիկատոր. եթե հակադրություններ կան, ուրեմն աշխատանք կա, եթե հակադրություն չկա, ուրեմն չկա աշխատանք:

Այստեղ, իհարկե, առանցքային է դառնում Սերժ Սարգսյանի դերը: Այսինքն՝ հարցն այն է, թե ինչ դիրքորոշում է ունենալու Սարգսյանը ՀՀԿ-ականների և վարչապետի հակադրության հարցում: Նա պահելու է ՀՀԿ-ի՞ն, Կարապետյանի՞ն, թե՞ «ոսկե միջինը» կամ այլ կերպ ասած՝ իր մանևրի հնարավորությունը:

Սերժ Սարգսյանը մոտավորապես տասը տարի նախագահում է՝ հենց իշխանական կամ ներիշխանական հակադրությունների վրա խաղալով, հաճախ հենց ինքն էլ գեներացնելով այդ հակադրությունները: Եվ ձևավորվել է կարծես թե բավականին ուշագրավ մի հաջորդականություն: Սարգսյանը նախ նշանակեց, այսպես ասած, իր վարչապետին՝ Տիգրան Սարգսյանին, հետո նրան զոհաբերեց ՀՀԿ մեծամասնությանը: ՀՀԿ մեծամասնությունը նշանակեց իր վարչապետին՝ Հովիկ Աբրահամյանին, բայց հետո Աբրահամյանը զոհաբերվեց, այսինքն՝ զոհաբերեց ՀՀԿ-ն: Հիմա կրկին Սերժ Սարգսյանը նշանակել է իր վարչապետին, այսինքն՝ ըստ էության եկել է Սարգսյանի զոհաբերության ժամանակը:

Այդպես Սերժ Սարգսյանն ու ՀՀԿ-ն հաջորդական զոհաբերություններով ըստ էության պահպանում են իրենց մշտական իշխանությունը: Ընդ որում՝ զոհերն էլ, ինչպես երևում է, ընդամենը կարճ ժամանակով են նեղսրտում:

Երեկ տեղի ունեցած ՀՀԿ ԳՄ նիստին մասնակցել է նախկին վարչապետ Հովիկ Աբրահամյանը, որը նեղացել ու հեռացել էր Դուբայ: Աբրահամյանը վերադարձել է՝ երևի թե հասկանալով, որ զոհաբերություններն արվում են հանուն բոլորի և հստակ հերթականությամբ, և մոտենում է Սերժ Սարգսյանի հերթը: Ընդ որում՝ շատ հավանական է, որ Սարգսյանը այդ հերթականությունը հաշվարկել է այնպես, որ երբ գա 2018 թվականին իր պաշտոնը թողնելու ժամանակը, լինի զոհաբերության ՀՀԿ-ի հերթը, և ՀՀԿ-ն այդ պաշտոնը «զոհաբերի» Սերժ Սարգսյանին:

Այդտեղ արդեն Սարգսյանն ըստ երևույթին ամեն ինչ կանի շղթան ընդհատելու և ՀՀԿ-ին այլևս հերթ չտալու համար:

1in.am