Նառան դարձավ 51 տարեկան․ ինչպես է անցել երգչուհու ծնունդը / լուսանկարներ

Երգչուհի Նառան ապրիլի 8–ին նշել է ծննդյան տարեդարձը։ Որքան էլ շատերին  կարող է անհավատալի թվալ, նորաձև, թիթիզ, միշտ երիտասարդ Նառան բոլորել է 51 տարին, ինչի առթիվ ամուսինը նրան գեղեցիկ անակնկալ է մատուցել։ Նառան տարեդարձը նշել է Եգիպտոսում, իսկ մանրամասները պատմել է  Tert.am Life–ին և տրամադրել լուսանկարներ։

«Ամուսինս ինձ անակնկալ մատուցեց` Հրաչ Քեշիշյանի հետ պայմանավորվել էին, Հրաչն իր կնոջ, ամուսինս՝ ինձ հետ մեկնեցինք Շարմ էլ Շեյխ, որտեղ էլ նշեցինք ծնունդս։ Շատ հաճելի անակնկալ էր։ Մինչև վերջին պահը չգիտեի, որ նման մտադրություն ունի։ Տարեդարձիցս 2 օր առաջ մեկնեցինք Եգիպտոս։ Այնտեղ անցկացրինք 4 օր` մի լավ հանգստացանք, ծնունդս նշեցինք և վերադարձանք Հայաստան»,– պատմեց Նառան։

Երգչուհին հայտնեց, որ Եգիպտոսում հաճելի պատահական հանդիպում են ունեցել Սոֆի Մխեյանի և Նազենի Հովհաննիսյանի հետ։ «Իմ և Սոֆի Մխեյանի տարեդարձը նույն օրն է։ Պարզվեց Սոֆին և Նազենին էլ են այնտեղ։ Շատ ուրախ եմ այդ պատահական հանդիպման համար։ Արդեն երեկոյան բոլորով հավաքվեցինք ու շատ լավ նշեցինք երկուսիս ծնունդը։ Շատ լավ ժամանակ անցկացրինք, ուրախ օր ունեցանք։ Օրը տոնեցինք նեղ միջավայրում, բայց շատ գեղեցիկ օր ունեցանք»,– ասաց Նառան, ով երեկ գիշերն է վերադարձել Հայաստան։ Այսօր արդեն երգչուհին կհյուրընկալի ընտանիքի անդամներին ու մտերիմներին։ Երեխաններն ու 2 թոռնիկները Նառային շնորհավորել են տեսազանգով։

Կյանքի 51 տարիները Նառային շատ բան են սովորեցրել։ Երգչուհին ներդաշնակ է իր տարիքի հետ, թեև իրեն անհամեմատ ավելի երիտասարդ է զգում, չի կոմպլեքսավորվում նշել, թե քանի տարեկան է։ «Իմ տարիներն իմ ապրած իմաստություններն են։ Ես չեմ հրաժարվում իմ տարիքից։ Իհարկե, ինչպես այս տարիքի յուրաքանչյուր մարդ, ես էլ չեմ զգում, որ 51 տարեկան եմ։ Ըստ իս, ես մնացել եմ 35-38 տարեկանում։ Դա իմ զգացողությունն է, իսկ կինը երևում է այն տարիքի, որքան զգում է իրեն ներքուստ»։

Որքան էլ Նառան համարում է , որ իր տարիներն իր ապրած իմաստություններն են, փաստում է, որ ամեն օր նոր բան է հասկանում։ «Ամեն օր հասկանում եմ, որ ոչինչ չեմ հասկացել։ Մինչև մահ ամեն օր սովորում ես»,– նկատեց նա։

Երգչուհին իր կյանքի ամենամեծ ձեռքբերումը համարում է իր ընտանիքը` իր երեխաներին։ Ներդաշնակ ու խաղաղ ընտանիք ունենալու համար Նառան ունի իր բանաձևը. «Ամենակարևորը համբերությունը, իմաստությունն ու սերն են։ Ամեն տեղ, այդ թվում` ընտանիքում, լինում են  դժվարություններ, որոնք պետք է սիրով ու համբերատարությամբ հաղթահարել»։

Երգչուհին չի դադարում երազել, սակայն իր երազանքներն անիրական չեն։ Նա վստահ է երազանքները պետք է նպատակներ դառնան և իրականան։ «Եթե մարդը չունենա նպատակներ, կյանքն անիմաստ է։ Ես չունեմ հեքիաթային երազանքներ, ունեմ նպատակներ, որոնք  պետք է իրագործեմ։ Ես երազում եմ այնպիսի բաների մասին, որոնք կարող եմ իրականացնել»,– ասաց Նառան, սակայն երազանքները բացահայտել չցանկացավ։