«Ինձ ծիծաղեցնելը սարսափելի դժվար է». Մաշան՝ «Սթենդ–ափ» շոուում իր մասնակցության և աղջիկ հումորիստ լինելու առանձնահատկությունների մասին

 

Մարիամ Մուրադյանը՝ Մաշան, ով  այս շրջանում հանդես է գալիս «Սթենդ–ափ» քոմեդի շոու նախագծում, ի սկզբանե, հումորիստ լինելու կամ դերասանուհի դառնալու նպատակներ չի ունեցել: Tert.am Life-ի հետ զրույցում Մաշան խոսել է հեռուստատեսությունում հայտնվելու, աղջիկ–հումորիստ լինելու դրական ու բացասական կողմերի և այլ հարցերի մասին:

 

Վոկալային կրթություն ստացած Մաշան առաջին քայլերը սկսել է որպես երգչուհի՝ մասնակցելով «Շանթ» հեռուստաընկերության «X Factor» երաժշտական նախագծին: «Այդ ժամանակ Գարիկ Պապոյանն ինձ նկատեց, հրավիրեց «Վիտամին» ակումբ: Այնուհետև հրավեր ստացա «32 ատամ» ակումբից: Հովհաննես Դավթյանը Stand up ժանրում նախագիծ ուներ, ինձ հրավիրեց  մասնակցելու, որտեղ էլ ինձ նկատեց մեր նախագծի պրոդյուսեր  Սարգիս Մնոյանը և կանչեց «Սթենդ–ափ» քոմեդի շոու: Երբևէ չեմ մտածել դերասանուհի դառնալու մասին, բայց փոքր տարիքում շատ ակտիվ երեխա եմ եղել։ Շատ էին ասում, որ դերասանությունն ինձ համար է:

Քանի որ սովորել եմ վոկալ բաժնում, ինձ պատկերացրել եմ որպես երգչուհի, բայց, փաստորեն, մարդիկ նկատել են դերասանական ջիղ, հավատացել են ու, կարծում եմ, չեն էլ սխալվել:)»,- նշեց նա:

 

 

 

Մաշան «Սթենդ–ափ» քոմեդի շոուի միակ հումորիստ աղջիկն է: Նրա խոսքով` տղաների միջավայրում աշխատելը շատ առավելություններ ունի, քանի որ ինքը միշտ ուշադրության կենտրոնում է:

 

Կին-տղամարդ հարաբերությունները, իրեն հանդիպող մարդկային տեսակներն ու իրավիճակները բեմից հումորային փաթեթավորմամբ ներկայացնող աղջկա խոսքով` ինքը երբևէ թեմաների պակաս չի ունենում:

 

«Կարող ես օրվա ընթացքում ինչ-որ բան նկատել, որը քեզ հետաքրքիր կթվա ու խոսել դրա մասին: Ի վերջո, պետք է լինի  ինչ-որ կին, որը կխոսի կին-տղամարդ խնդիրների մասին, մի քիչ  կբողոքի, մի քիչ էլ կբամբասի տղամարդկանցից: Լինում են դեպքեր, երբ հենց իմ կյանքից եմ օրինակներ վերցնում, լինում են դեպքեր, երբ ընկերներիս կյանքից եմ դրվագներ ներկայացնում: Ես հաճախ եմ խոսում նաև այն  աղջիկների մասին, ովքեր դիմել են բազմաթիվ պլաստիկ միջամտությունների: Ինձ համար դա շատ ծիծաղելի է: Ես ուղղակի չեմ ընդունում դա»,-  ասաց սթենդափերը: Հարցին` արդյոք հակադարձումներ կամ պատասխան քննադատություն  ստանում է, Մաշան հումորով արձագանքեց.«Դեռ ոչ ոք մազերս չի պոկել։)»:

 

 

Շատ աղջիկներ, որպես իդեալական տղամարդու պարտադիր չափորոշիչ, նշում են հումորի զգացումը: Մաշան այս հարցում իր պատկերացումն ունի. «Տղամարդը, որը կարող է գրավել իմ ուշադրությունը, պետք է լինի շատ լուրջ, բայց պարտադիր հասկանա հումորը: Իմ կողքի տղամարդը չի կարող անընդհատ հումորներ անել, ծիծաղել, դա կարող է նյարդայնացնել ինձ, բայց պետք է հասկանա հումորը, գոնե, զուտ նրա համար, որ երբ հումոր անեմ, ժպտա»:

 

Մաշան խոստովանեց, որ հասարակության մեջ շատերը թերահավատորեն են մոտենում հումորիստ–աղջկա կերպարին և, որպես կանոն, նրան ընկալում են որպես անլուրջ մարդու: «Ամենավատը դա է:  Եթե դու հումորիստ ես, մտածում են, պետք է 24 ժամ ինչ-որ հումորներ անես, լուրջ լինելը տարօրինակ են համարում: Դա ինձ բարկացնում է, հատկապես, երբ  սոցկայքերով են սխալ կարծիքներ գրում: Մտածում են՝ դու հումոր ես անում, ուրեմն` ցինիկ ես: Ես, երբեմն, կարող եմ  շատ կոպիտ լինել, հետո փոշմանել դրա համար: Հանրային կերպարը պարտավորեցնող է. հաճախ ստիպված ես լինում լավ վերաբերել դիմացինին, որ հանկարծ տպավորություն չլինի, թե հեռուստացույցով երևացել ես,  մեծամիտ ես պահում քեզ»,- նշեց նա:

 

 

Սթենդափերը նկատեց, որ հումորը կյանքում օգնում է  շրջանցել բարդ իրավիճակներն ու ավելի թեթև հաղթահարել ծանր պահերը: Մարդկանց ծիծաղեցնել փորձող Մաշային ծիծաղեցնելը, պարզվում է, հեշտ չէ: «Ինձ ծիծաղեցնելը սարսափելի դժվար է: Ես հենց այնպես չեմ ծիծաղում: Երբեմն, գործընկերներս գալիս, ասում են՝ այսպիսի հումոր եմ գրել, ծիծաղելի՞ է, ես որքան էլ գիտակցում եմ, որ դա ծիծաղելի է, ցույց չեմ տալիս բարձր ծիծաղով»,-եզրափակեց Մաշան: