Հայտնի են դարձել ստյուարդեսայի վրա հարձակման մանրամասները

Air China ավիաընկերության բորտուղեկցորդին պատանդ վերցրած ուղևորը տառապում է հոգեկան հիվանդությամբ: Այս մասին ասվում է Չինաստանի Հենան նահանգի ոստիկանության հաղորդագրությունում, հաղորդում է «РИА Новости»-ն:

Հիշեցնենք, որ CA1350 չվերթն իրականացնող ինքնաթիռը մեկնել է Հունան նահանգի Չանշա քաղաքից տեղական ժամանակով ժամը 08:40-ին և պետք է վայրէջք կատարեր Պեկինի միջազգային օդանավակայանում՝ տեղական ժամանակով ժամը 11:00-ին, սակայն թռիչքի ժամանակ ուղևորներից մեկը հարձակվել է բորտուղեկցորդի վրա՝ սպառնալով ինքնահոս գրիչով, ինչի հետևանքով էլ ինքնաթիռն արտակարգ վայրէջք է կատարել ժամը 09:58-ին՝ Չժենչժոուի միջազգային օդանավակայանում: 

Իրավապահ մարմինների աշխատակիցների հաղորդմամբ՝  կասկածյալը Հունան նահանգի 41-ամյա բնակիչ է, որի մոտ թռիչքի ընթացքում նոպա է սկսվել:

«Նախնական քննության տվյալների համաձայն՝ տղամարդը, սպառնալով ինքնահոս գրիչով, պատանդ է պահել բորտուղեկցորդին, ինչի հետևանքով ինքնաթիռն արտակարգ վայրէջք է կատարել», - ասվում է ոստիկանության հայտարարությունում:

Վայրէջքից հետո բոլոր ուղևորները բարեհաջող լքել են ինքնաթիռը: Իրավապահ մարմինների աշխատակիցներին հաջողվել է ձերբակալել հարձակվողին:

Նշվում է, որ միջադեպի հետևանքով տուժածներ չկան: