Հայկոյի մենահամերգի հետաքրքիր պահերը՝ լուսանկարներով

Սիրառատ երեկո` ռոմանտիկ երգերի ներքո. Հայկոն ներկայացրեց «Սիրո հավերժ քաղաք» խորագրով մենահամերգը` այս անգամ ակումբային տարբերակով։ Նրա հանդիսատեսի շարքերում էին ինչպես երկրպագուները, այնպես էլ հայտնի գործընկերները, իսկ կինը` Անահիտ Սիմոնյանը, առջևում նստած ոգևորում էր ամուսնուն իր ծափողջույններով ու ձայնակցություններով։ Tert.am Life–ը ներկայացնում է համերգի մանրամասներն ու հետաքրքիր պահերը։

«Համալիրի համերգի ժամանակ ավելի լարված էի՝ նկարահանում էր, ձայնագրություն... Համերգից հետո նույնիսկ չէի հասկանում` լա՞վ էր, թե՞ վատ։ Հիմա շատ ուրախ եմ նորից տեսնել շատ մարդկանց, ովքեր  ներկա էին նաև համալիրի համերգին, մարդկանց, ովքեր առաջին անգամ են ներկա այս ծրագրին։ Սիրում եմ ձեզ։ Մենք ամեն ինչ արել ենք գեղեցիկ ու անմոռանալի երեկո ունենալու համար»,– ասաց երգիչը։

Երեկոյի ընթացքում Հայկոն կատարեց իր ռոմանսները, զուգերգերը, ֆիլմերի սաունդթրեքերն ու նոր երգերը։

1999 թվականին թողարկված «Ռոմանս» ձայներիզի երգերը կատարելիս Հայկոն նկատեց, թե այդ ձայներիզն ինչ մեծ նշանակություն է ունեցել իր կարիերայում։ «Ես միշտ կատակում եմ, որ այնքան հին եմ, որ 2 «կասետ» եմ ունեցել։ Հիմա, եթե երիտասարդ սերնդին ասենք` «կասետ», չի էլ հասկանա` ինչի մասին ենք խոսում, սակայն դա մեր Երևանի կյանքում հետաքրքիր, սիրուն պատմություն էր, որը կապված է իմ ու ընկերներիս հետ։ Այդ ձայներիզն իմ այցեքարտը դարձավ հայկական երաժշտական աշխարհ։ Այսօր մեր սիրելի Երևանում, երևի, ամենառոմանտիկ երեկոն է»,– ասաց երգիչը։

Ֆիլմերի սաունդթրեքները կատարելիս Հայկոն նկատեց, որ տարիներ առաջ Հրաչ Քեշիշյանը հավատաց իրեն ու մի ամբողջ պրոդյուսերական թիմի համոզեց, որ ինքը կարող է ֆիլմերի սաունդթրեք գրել։ «Մի վախեցիր» երգի առաջին նոտաների ժամանակ նա նշեց, որ հենց այդ նորտաներից սկսվեց սաունդթրեքներ գրելու իր ճանապարհն ու «եվրատեսիլյան» պատմությունը։

Երեկոյի ընթացքում Հայկոն ներկայացրեց նաև իր զուգերգերը։ Սակայն այս անգամ ոչ բոլոր հայտնի գործընկերներն էին ներկա։ Հռիփսիմե Հակոբյանի հետ «Քո սերը մի ուրիշ աշխարհ է» զուգերգը Հայկոն ներկայացրեց կնոջ` Անահիտ Սիմոնյանի հետ, քանի որ Հռիփսիմեն երկրում չէր։

«Տեսահոլովակներում երգիչները հաճախ են սեր խաղում, սա այն դեպքն է, երբ ամեն ինչ, իսկապես, անկեղծ էր, խաղալու կարիք չկար»,– սիրելիի հետ ելույթից հետո նկատեց Հայկոն։

Ռազմիկ Ամյանի հետ «Ես կամ նա» զուգերգն էլ Հայկոն ներկայացրեց Նիկ Էգիբյանի հետ։ «Սիրով ներկայացնում եմ մեր թիմից մի մարդու, որը շատ տաղանդավոր գործիքավորող ու երգիչ է։ Ես հումորով ասում եմ` կարո՞ղ է այնպես երգես, քեզնից հետո չուզեմ երգել»,– Նիկին ներկայացնելիս ասաց Հայկոն։

Քրիստինե Պեպելյանը ներկա էր և Հայկոյի հետ հանդիսատեսին 15 տարով հետ տարավ դեպի 2003 թվական, երբ նրանց զուգերգը` «Ուշացած խոսքերը», տարվա գլխավոր հիթերից մեկն էր։ «Քրիստինեն ինձ համար շատ թանկ մարդ է, իմ լավ ընկերը, որի հետ երկար տարիների ընկերությունը չի դադարում և շարունակվում է  նաև երաժշտական ասպարեզում։ Եզակի մարդկանցից է, որի հետ 3 զուգերգ ունեմ»,– ընդգծեց Հայկոն։

Երգիչը ներկայացրեց նաև նոր երգերը։ «Սիրուց հետո» երգը կատարելիս նա նկատեց, որ իր գրած երաժշտությամբ և Ավետ Բարսեղյանի խոսքերով երգը, անպայման, տեղ է գտնելու իր նոր ալբոմում։ «Շատ եմ սիրում այս  երգը։ Այն կարելի է դասել ոչ կոմերցիոն երգերի շարքին»,– նշեց նա։

Համերգային երեկոն Հայկոյի համար տպավորիչ էր ու գեղեցիկ։ «Շատ օրիգինալ երեկո է։ Իմ երգարվեստի պատմության գրքի մեջ, անպայման, գրվելու է այս օրը։ Ինձ միշտ ասում են` քո համերգներին մի տեսակ այլ մարդիկ են գալիս, ինչի համար ես ուրախ եմ։ Շատ եմ սիրում ձեզ, ուզում եմ յուրաքանչյուրիդ առանձին գրկել»,– էմոցիաներն այսպես արտահայտեց երգիչը։

Այս թեմայով «Մերժիր Սերժի Ժիլետին». Կարգին Հայկո / տեսանյութ Հայկոն անկեղծացել է ելույթի ժամանակ․ տեսանյութ «Սուպեր մամա 2»-ը ապօրինի տարածողին գտել են (տեսանյութ) Հայկ Մարությանը խոսել է «Սուպեր մամա 2»–ի ունեցած վնասների և նոր ֆիլմի մասին Հայկոն նոր տեսահոլովակ ունի