«Շատ երջանիկ եմ». Թամարա Պետրոսյանը՝ նոր նախագծի մասին

Դերասանուհի Թամարա Պետրոսյանն, ում շատերը ճանաչեցին ու սիրեցին «Քայլ ձիով», «Ուրիշի փոխարեն» ֆիլմերից, «Ընտանյոք հանդերձ», «Ֆուլ հաուս» սիթքոմներից, այս փուլում հեռուստատեսային որևէ նախագծում հանդես չի գալիս, սակայն, շարունակում է ակտիվ թատերական գործունեություն ծավալել:

Tert.am Life-ի հետ զրույցում Թամարան խոսել է առաջիկայում սպասվող երկու նոր ներկայացման մեջ իր զբաղվածության, հեռուստատեսային նոր առաջարկներ ստանալու, գործնական ու անձնական թեմաների մասին:

Այս օրերին Թամարան Նարեկ Դուրյանի բեմադրությամբ «Օրագիր» ներկայացման վերջին փորձերն է անցնում: Ներկայացման պրեմիերան տեղի կունենա ապրիլի 24-ին` «Բոհեմ» թատրոնում: Այն նվիրված է Արցախյան շարժման  30-րդ տարեդարձին և հիմնված է արցախցի աղջկա վարած անձնական օրագրի վրա:

«Ճիշտ է, մենք այնպես արեցինք, որ ներկայացումը հանձնվի  ապրիլի 24-ին, բայց ընդհանուր առմամբ, ներկայացումը նվիրված է Արցախյան շարժմանը:  Ներկայացումը  հիմնված է  երիտասարդ աղջկա անձնական օրագրի վրա։ Նա այն ժամանակ ուսանողուհի էր, 1983-1988 թվականներին երեք հայ ընկերուհիների հետ ապրում և սովորում էր Բաքվում։ Այդ հինգ տարվա ընթացքում իր ուսանողական կյանքը գրել է օրագրում, որտեղ տեղ է գտել պատմություն այն մասին, թե ինչ կատարվեց Սումգայիթում և դրանից հետո:  Այդ կինն իր օրագիրը տվեց Նարեկ Դուրյանին տասը տարի առաջ, երբ վերջինս Արցախ էր եկել և ասաց՝ սա իմ անձնական օրագիրն է, ես այնպիսի բաներ եմ գրել, որոնք մի օր կարող են պետք գալ ձեզ, հնարավոր է՝ որոշեք այս թեմայով որևէ բան բեմադրել: Ճիշտն ասած, պարոն Դուրյանը վախեցել էր օրագիրը վերցնել, որպեսզի չկորցնի, փոխարենն այդ կնոջ հեռախոսահամարն էր վերցրել։ Մոտ մեկ տարի առաջ պարոն Դուրյանը ներկայացում բեմադրելու մտահղացում ունեցավ, զանգեցինք այդ կնոջը՝ Լինային, վերցրինք  օրագիրն ու դրա հիման վրա կառուցվեց նոր ներկայացում»,- պատմեց Թամարան:

Նրա խոսքով` «Օրագիր»-ը փաստավավերագրական ներկայացում է, որում բացի անձնական օրագրի էջերից,  ներկայացվել են պատմական փաստեր, տարատեսակ հետաքրքիր պատմություններ:  «Պարոն Դուրյանը շատ ավելի է բացել այդ թեման, ներկայացրել իրեն հատուկ ոճում։ Մենք` դերակատարներս, բացի չորս ընկերուհիների հիմնական դերերը, ներկայացման ընթացքում մարմնավորում ենք նաև այլ կերպարներ»,- ասաց Թամարան:

Արցախյան թեման հոգեհարազատ է արցախցի դերասանուհուն: Թամարան անկեղծացավ, որ զբաղվածությունը թույլ չի տալիս ավելի հաճախ լինել այնտեղ` ընտանիքի կողքին. «Ես  այստեղ հորաքրոջս հետ եմ ապրում և կապս Արցախի հետ պահպանվում է այնքանով, որքանով ինձ թույլ է տալիս ժամանակը:  Ծնողներս, եղբայրներս, զարմիկներս ու զարմուհիներս այնտեղ են: Եթե անկեղծ ասեմ, երկու–երեք օրով Արցախ չեմ գնում, որովհետև մամաս չի թողնում:) Ասում է ՝գալիս ես, չենք հասցնում ոչ քեզ տեսնենք, ոչ  էլ հասկանանք, երբ եկար, երբ գնացիր։ Հենց մի շաբաթից տասն օր ազատ ժամանակ եմ ունենում, բնականաբար, միանգամից գնում եմ այնտեղ, ժամանակս ընտանիքիս, ընկերներիս հետ անցկացնելու»:

Այս շրջանում դերասանուհին զբաղված է նաև իրանահայ ռեժիսոր Սեդրակ Կոջամանյանի  Hotel California դրամատիկ կատակերգական ներկայացման մեջ, որը նախատեսված է երևանյան հանդիսատեսի համար:  Պրեմիերան տեղի կունենա մայիսին: Դերասանուհուց հետաքրքրվեցինք` արդյոք հեռուստատեսային նոր առաջարկներ ունի, ե՞րբ  նրան կրկին կտեսնենք հեռուստաէկրաններին. «Առաջարկներ կան, բայց ես սովորություն ունեմ չխոսել այդ մասին, մինչև ոտքս չդնեմ այնտեղ ու չսկսեմ աշխատել»:

Դերասանուհին կարծում է, որ այսօր մասնագիտությամբ, սիրած աշխատանքով զբաղվելն արդեն իսկ մեծ հաջողություն և ձեռքբերում է: «Մի շատ սովորական օրինակ բերեմ:  Տեսեք, որքան ուսանողներ են  ընդունվում Թատերական ինստիտուտ, ավարտում և քանիսն են մնում ոլորտում: Դա պայմանավորված չէ նրանով, որ լավն են կամ վատը, դա կախված է նաև նրանից, թե աշխատելու հնարավորություն ինչքանով ունեն։ Եթե չաշխատես, չես կարող հաց ուտել, չէ՞:  Շատ շատերն ուղղակի հրաժարվում են մասնագիտությունից աշխատանքի բացակայության պատճառով: Ես շատ եմ գնահատում, որ ինձ բախտ է վիճակվել  դեռ մնալ այս ոլորտում ու աշխատել: Մեծ բավականություն եմ ստանում այն ամենից, ինչ հիմա անում եմ, իմ սիրած աշխատանքի մեջ եմ ու երջանիկ եմ դրանով»:

Թամարան  ցավով է նշում, որ միայն թատրոնում ծավալվող գործունեությամբ դերասանն այսօր չի կարող լուծել նյութական խնդիրները, բացառությամբ կոմերցիոն ներկայացումների:

Բացի թատերական գործունեությունը, դերասանուհին տևական ժամանակ է` հանդես է գալիս «Արցախի ձայներ» խմբում, որը վերջերս է վերադարձել Ֆրանսիական շրջագայությունից: Առաջիկայում էլ պատրաստվում են նոր երգեր ու տեսահոլովակներ նկարահանել: Հարցին` արդյոք նպատակներ չունի առանձնանալու և երգչուհու անհատական կարիերա սկսելու, Թամարան պատասխանեց. «Գիտեք, դա գալիս է բավարարված կամ չբավարարված լինելուց:  Այսօրվա դրությամբ աշխատանքը, որը տանում եմ խմբում, ինձ իսկապես բավարարում է՝ չեմ զգում առանձնանալու կարիք: Վստահ եմ, եթե ցանկությունս մեծ լիներ, կարող է նաև որպես երգչուհի առանձին հանդես գալու զուգահեռ աշխատանքներ տանեի, բայց հիմա ինձ դուր է գալիս այն, ինչ անում ենք խմբով»:

Թամարան հստակ սահմաններ չի գծել աշխատանքային գործունեության և անձնական կյանքի միջև: Հարցին՝ կարողանու՞մ  է երկու ճակատներում էլ իրեն բավարարված զգալ, դերասանուհին իրեն բնորոշ հումորով պատասխանեց. «Երևի, որպես ղարաբաղցի, հնարավոր է, որ մի քանի ճակատներում էլ միանգամից գրավեմ:), ենթագիտակցորեն այդպես էլ անում եմ։ Չեմ կարող ասել` ես մտածել եմ, «այո»-ների ու «ոչ»-երի պլաններ եմ գծել: Ինքնահոսի վրա դրված ապրում եմ, աշխատում ու ստեղծագործում»,- ասաց նա՝ ավելացնելով, որ անձնական կյանքի մասին խոսել չի սիրում։ Կյանքի ներկայիս փուլը դերասանուհին  այսպես բնորոշեց. «Միայն կասեմ, որ ես շատ երջանիկ եմ ու չեմ մանրամասնի»:

Այս թեմայով Թամարա Գեւորգյանի 23-ամյակի լուսանկարներն ու զվարճալի միջադեպը Փաշինյանը՝ Լեւոն Տեր-Պետրոսյանի հետ հարաբերությունների մասին Շուշան Պետրոսյանը Սերժ Սարգսյանի նկարը դրել է ֆեյսբուքյան իր էջի «обложка» Ինչու հեռացավ Պետրոսյանը․ ինչ է տեղի ունեցել իրականում Նարինե Պետրոսյանը՝ փոքր տարիքում մայրանալու ու ընտանիքի մասին․ լուսանկարներ