Տիգրան Կարապետյանի «երկրորդ ամուսնությունը» Ղարաբաղում և մեղրամիսը Դուբայում

Life 21 Ապրիլ, 2018 17:20

Երգիչ Տիգրան Կարապետյանը, ով լսարանին հայտնի դարձավ «Հայաստանի ձայնը» 4-րդ նախագծից, այս ամիս ամուսնացավ, իսկ ապրիլի 18–ին արդեն սիրելիի` Անի Աղաջանյանի հետ հարաբերություններն օրինականացրել է զագսում։

Նրանց երկրորդ ամուսնությունը՝ այս դեպքում՝ զագսի արարողությունը տեղի է ունեցել Տիգրանի ծննդավայրում՝ Արցախում: Tert.am Life-ի հետ զրույցում Տիգրանը պատմեց ամուսնությունից հետո իր կյանքի փոփոխությունների, նոր կարգավիճակին հարմարվելու և երաժշտական գործունեության հետագա ծրագրերի մասին:

Պսակադրությունից հետո զույգը մեղրամիսն անցկացրել է Դուբայում, այնուհետև Տիգրանն ու կինը գնացել են Արցախ՝ երգչի հայրական տուն:

«Կյանքիս այս փուլում ամեն ինչ շատ լավ է. ոգեշնչված, ուրախ ու երջանիկ եմ»,- ասաց Տիգրանը՝ ավելացնելով, որ աստիճանաբար փորձում է հարմարվել իր նոր կարգավիճակին:

Տիգրանի հարսանիքը կայացել է երգիչ Սարոյի քավորությամբ: Խոսելով իրենց մտերմության մասին` Տիգրանն ասաց, որ Սարոյի հետ ընկերությունն ինքնըստինքյան ստացվեց։ Հաշվի առնելով իրենց մտերմությունը` Տիգրանը ցանկություն է հայտնել, որ նա լինի իր հարսանիքի քավորը։

Տիգրանի խոսքով` շոու բիզնեսում շատ ընկերներ ունի, այս հարցում նպաստել է նաև «Հայաստանի ձայնը» նախագիծը։ Նա ընկեր է ձեռք բերել նաև ի դեմս իր մարզչի` Արամեի, որը ևս ներկա է եղել իր հարսանիքին։ «Արամեի հետ մեր հարաբերությունները շատ ջերմ են: Նախագծի ավարտից հետո էլ մեր շփումը շարունակվում է։ Նա իմ հարսանիքի սպասված հյուրերից էր»:

Ըստ երգչի` «Հայաստանի ձայն»-ը նախագիծն իրեն նաև հայտնիություն բերեց։ Առաջիկայում Տիգրանը պատրաստվում է ներկայանալ նոր երգով ու տեսահոլովակով: Այժմ նա շարունակում է հանդես գալ ակումբներում։ «Ակումբային գործունեությունը երգչի համար, կարծում եմ, պետքական փուլ է: Երգիչը պիտի անցնի այդ փուլը, որովհետև, նախ և առաջ, դա ամենօրյա փորձ է տալիս, ամեն օր նոր հանդիսատես ես ձեռք բերում»,– եզրափակեց նա։