«Ես պապա չեմ ունեցել». Թինա Քեյն՝ իր անձնականի ու տեսահոլովակի մասին

Կրկեսի արտիստ, ակրոբատ, պարուհի Թինա Քեյը, ով վերջին շրջանում ընտանիքի հետ միասին ապրում է Մոսկվայում, այս օրերին Հայաստանում է եւ հատուկ նպատակով:

Շատերը գիտեն, որ Թինան սովորել է Երեւանի Կոմիտասի անվան կոնսերվատորիայում եւ կրկեսի արտիստ լինելուց զատ նաեւ երգում է: Եվ ահա Թինան Երեւան է եկել իր նոր տեսահոլովակի նկարահանման նպատակով, որի մասին առաջինը պատմել է Life.panorama.am-ին:

«Ընտանիքիս հետ Երեւան ենք եկել ապրիլի 11-ին, որպեսզի նկարահանենք իմ՝ «Պապա» երգի տեսահոլովակը: Երգն իմ ձայնասկավառակից է, տեսահոլովակի ռեժիսորն էլ Վեռոնիկա Բարսամյանն է: Ասեմ, որ հոյակապ օպերատորական կազմ է աշխատել, որի համար շատ ուրախ եմ»,- նշեց Թինան:

Թինա Քեյը բազմիցս է նշել, որ առանց հայրիկի է մեծացել: Իսկ այսօր նա երգում է հոր մասին: Հարցին, թե ինչպես ստացվեց, որ նա որոշեց այս թեմային անդրադառնալ, իրեն հատուկ անկեղծությամբ պատասխանեց.

«Այո, ես պապա չեմ ունեցել եւ նրա բացակայությունն էլ իմ մեջ չեմ ներել: Երբ ինձ առաջարկվեց երգել այս երգը, սկզբում չէի համաձայնում, քանի որ չէի պատկերացնում, որ կկարողանամ անգամ արտասանել այդ բառը, այն էլ դա ասել զգացմունքային կերպով, չէ որ 35 տարի ես «պապա» չեմ ասել: Երգը հոգուս չէր կպնում, շատ բարդ էր, հետո համաձայնեցի: Հիմա վստահ եմ ասում, որ իմ կյանքից իմ հոր բացակայությունն անգամ օգնեց, որպեսզի այդ երգը լիներ շատ զգացմունքային. Երգում կա վիրավորանք, նեղացվածություն, որը ավելի զգացմունքայնություն է հաղորդում»:

Տեսահոլովակում Թինան պատմողի դերում է հանդես գալու, սյուժետային գծում նա ներգրավված չէ.

«Տեսահոլովակում մի փոքրիկ աղջնակի եւ իր հոր մասին պատմություն է նկարագրված: Անշուշտ, սյուժեն իմ կյանքի մասին չէ, քանի որ այն հոր ու աղջկա սերտ կապի եւ սիրո մասին է, որը ես երբեք չեմ ունեցել»,- հավելեց երգչուհին:

Թինան դժվարացավ ասել, թե երբ կլինի տեսահոլովակի պրեմիերան, բայց հույս հայտնեց, որ այդ օրերին կրկին Երեւանում կլինի: Երկու օրից ընտանիքի հետ միասին Թինա Քեյը կվերադառնա Մոսկվա, բայց կշարունակի ակտիվորեն աշխատել: Իր խոսքով՝ դեկրետային դադարը լիովին չեղարկված է:

Այս թեմայով Գեղասահք. Թինա Կարապետյան – Սիմոն Սենակալ զույգը 22-րդն է / տեսանյութ Գեղասահորդներ Թինա Կարապետյանն ու Սիմոն Պրու Սենեկալը հանդես են եկել Զագրեբի մրցաշարում Կապշեք, երբ տեսնեք, թե ինչպիսին է Թակուր Սահաբը իրական կյանքում և ով է նրա գեղեցկուհի կինը