ԵԿՄ փոխնախագահին սպանել են «Ճոյտի» մարդիկ. նոր մանրամասներ

ԵԿՄ փոխնախագահ Նվեր Հովհաննիսյանը Էջմիածին քաղաքում սպանվել է ԱԺ նախկին պատգամավոր Հակոբ Հակոբյանի (Ճոյտ) կողմից ղեկավարվող սադրիչ խմբի կողմից: Այս մասին NEWS.am-ի հետ զրույցում նշեց Էջմիածնի քաղաքապետարանի լրատվության բաժնի պետ Մարիամ Պողոսյանը:

Նա նշեց, որ դեպքը տեղի է ունեցել ապրիլի 23-ին, Սերժ Սարգսյանի հրաժարականից ժամեր անց, երբ ոչ մի երթ քաղաքում չկար, հետեւաբար իրականությանը չեն համապատասխանում տեղեկությունները, թե դա տեղի է ունեցել ցուցարարների հետ կոնֆլիկտի ժամանակ:

«Այդ ժամանակ որեւէ երթ չկար: Սադրիչները խումբը ղեկավարել է նախկին պատգամավոր Հակոբ Հակոբյանը: Նրանք սադրել են անօրինական գործողությունների, ինչ-որ կոչերով են հանդես եկել, անհիմն մարդկանց փորձել են դրդել անօրինական գործողությունների, որ կոտրեն, ջարդեն, որի արդյունքում էլ Նվեր Հովհաննիսյանը մահացու վիրավորվել է»,-ասաց Մարիամ Պողոսյանը՝ հավելելով, որ գուցե Նվեր Հովհաննիսյանը միջամտել է, որ չկոտրեն, չջարդեն:

Ավելի վաղ NEWS.am-ը հայտնել էր, որ ապրիլի 23-ին, ժամը 18.55-ին կրծքավանդակի աջ կեսի կտրած-ծակած վերք նախնական ախտորոշմամբ Էջմիածնի հիվանդանոց է տեղափոխվել 46-ամյա Նվեր Հովհաննիսյանը, ով երեք ժամ անց մահացել է վիրահատության ժամանակ:

Նվեր Հովհաննիսյանը ԵԿՄ Էջմիածնի տարածքային բաժանմունքի փոխնախագահն էր: Նախկինում եղել է նաեւ քաղաքի մշակույթի տան տնօրենը: Նա մասնակցել է Արցախյան պատերազմին, ինչի հետեւանքով կորցրել է ձեռքն ու ոտքը, եւ այդ վիճակով մասնակցել է նաեւ Ապրիլյան պատերազմին։

Այս թեմայով Ճոյտը՝ նախագահ Լ․ Տեր-Պետրոսյանի մասին. «Սիրողական մակարդակով պետք չէ խոսել»